Ndo Nyanga Dɛ Mɔ 27 - WE NU GALE 1995

Yakɔbɔ zu wila nui 'da baa a olo Ezau

¹ Izaka dɛa gbɛlɛ, nɛ gbali a mbɔkɔ, nɛ a zɔ́ 'bɔ mɔ gɔ. Nɛ ngba soe kpo, nɛ a sa mɔ hã kuti be 'da a Ezau na: “Be 'daa.” Nɛ Ezau kɔ̃ na: “Mi kɛ!”

² Nɛ Izaka tɔ̃ na: “Mɔ ĩ na, mi dɛa gbɛlɛ ia, nɛ mi ĩ̀ ti tũ fio 'da mi gɔ.

³ Hã mɔ kala kpili do nzabele 'da mɔ, nɛ mɔ lé zamɔ, hã mɔ gbɛ sa'de hã mi.

⁴ Nɛ mɔ gí mbe 'bili nɛ, ɔ nɛ kɛ mi kɔ̃a gɛnɛ nɛ ni, nɛ mɔ tɛ do ma hã mi, kɔ mi nyɔngɔ, nɛ mi wele nu mi tɛ mɔ, dati kɛ na mi fe ni.”

⁵ Ĩ na, fala kɛ Izaka tɛ wele we do be 'da Ezau ni, nɛ nde Rebɛka tɛ zele nɛ. Fala kɛ Ezau la zamɔ i ni,

⁶ nɛ Rebɛka tɔ̃ hã be 'da a Yakɔbɔ na: “Mi zila sɔ baa mɔ tɛ tɔ̃ hã nya mɔ Ezau na,

⁷ a lé zamɔ, hã a gbɛ sa'de tɛ do ma, nɛ a gi hã ɛ, ɔ nɛ kɛ ɛ kɔ̃a gɛnɛ nɛ ni, hã ɛ nyɔngɔ, hã ɛ wele nu ɛ tɛ̃ a gbali NWA, dati a kɛ na ɛ fe ni.

⁸ Kɔ mɔ zélé mi ɔ dia, be 'daa, nɛ mɔ dɛ mɛ kɛ mi nɛ tɔ̃ hã mɔ ni.

⁹ Mɔ nɛ kɔ ba'de i, nɛ mɔ saka odia be dua bɔa, nɛ mɔ tɛ do wa, hã mi gi hã baa mɔ, ɔ nɛ kɛ a kɔ̃a gɛnɛ nɛ ni.

¹⁰ Mɔ ba sɛ ma hã baa mɔ na, a nyɔngɔ, nɛ a wele nu a tɛ mɔ dati a kɛ na a fe ni.”

¹¹ Nɛ Yakɔbɔ gese hã naa ɛ na: “Mɔ ĩ na, nya mi Ezau do sala tɛ̃ a wena, nɛ mi do sala tɛ mi bina.

¹² Mbe gɔ, nɛ baa mi a tamba sɛ tɛ mi, nɛ a ĩ sɛ na, mi ɔkɔlɔ ɛ. Nɛ olo li kɛ na, a wele nu a tɛ mi ni, nɛ a fɔmbɔ sɛ mi.”

¹³ Nɛ naa a gese na: “Be 'daa, fala kɛ a fɔmbɔ mɔ nde, nɛ ma wia na gi'da nɛ te zu mi. Hã mɔ zélé we mi tɔ̃a hã mɔ gɛ, mɔ nɛ hã mɔ kala duanɔ tɛ do wa.”

¹⁴ Yakɔbɔ nɛa we zele ní, nɛ a nɛ, nɛ a kala oduanɔ tɛ do wa hã naa a, nɛ naa a gi ma de wena ɔ nɛ kɛ Izaka kɔ̃a ni.

¹⁵ Nɛ 'do nɛ, nɛ Rebɛka saka zã tulunɔ 'da Ezau, nɛ a ba mbe kɛ ma dia nɛ ge nde ni, nɛ a he'de ma hã Yakɔbɔ.

¹⁶ Nɛ a ba 'bɔ ndala dua, nɛ a kasa do tɛ 'baka a, do tɛ gɛlɛ a, kɛ fo sala se'de bina ni.

¹⁷ Nɛ a ba nyɔngɔmɛ kɛ a gi de wena ni do mapa, nɛ a e dɛ kɔ a.

¹⁸ Yakɔbɔ nɛa do ma hã baa a, nɛ a na: “Aa baa.” Nɛ baa a kɔ̃ na: “Mi kɛ! Kɔ mɔ a wio nde, be 'daa?”

¹⁹ Nɛ Yakɔbɔ gese na: “Wi a mi kuti be 'da mɔ Ezau. Mi dɛa nɛ kɛ mɔ tɔ́a sɔ ni ia. Kɔ mɔ kulu ngɔ, hã mɔ nyɔngɔ Sanggo ɛngga 'da mi, sɛ nɛ mɔ wele nu mɔ tɛ mi de.”

²⁰ Nɛ Izaka aka a na: “Mɔ dɛa do kɛ mɔ kpa sa'de dɔ̃ ní ni nɛ nde, be 'daa?” Nɛ Yakɔbɔ gese na: “NWA Gale 'da mɔ a gbaka mi, nɛ a ia a dɛ li wala 'da mi, nɛ mi gbɛa a.”

²¹ Nɛ Izaka tɔ̃ hã a na: “Aa be 'daa, mɔ ngbɔ́ dɛ nga, hã mi tamba tɛ mɔ hã mi ĩ, tabi mɔ ngboo a be 'da mi Ezau nde sɛ nɛ de.”

²² Yakɔbɔ ngbɔa tɛ̃ ɛ dɛ kɛ zã baa a, nɛ baa a tamba tɛ̃ a, nɛ a tɔ̃ hã a na: “Wala gɛlɛ mɔ ɔ nɛ wala gɛlɛ Yakɔbɔ ni, nɛ nde 'baka mɔ a 'baka Ezau.”

²³ Nɛ Izaka ĩ̀ zi na, wi a Yakɔbɔ ni gɔ, we kɛ sala tɛ 'baka a ma wia kɔ do sala tɛ 'baka Ezau. Nɛ nde a nɛa we wele nu a tɛ̃ a,

²⁴ nɛ a aka 'bɔ a na: “Mɔ ngboo a be 'da mi Ezau nde?” Nɛ Yakɔbɔ kɔ na: “Ĩi, wi a mi.”

²⁵ Nɛ Izaka tɔ̃ na: “Be 'daa, mɔ tɛ do Sanggo ɛngga 'da mɔ, hã mi nyɔngɔ, takɔ mi wele nu mi tɛ mɔ.” Nɛ Yakɔbɔ tɛa nɛ hã baa a, nɛ a nyɔngɔ, nɛ a hã 'bɔ dɔ̃ɛ hã a, nɛ a nɔ.

²⁶ A nyɔngɔ mɛ ia do'do, nɛ a tɔ̃ hã Yakɔbɔ na: “Be 'daa, mɔ ngbɔ́ tɛ mɔ dɛ 'da mi nga, hã mɔ ufu zala mi.”

²⁷ Nɛ a nɛ, nɛ a ufu zala baa a. Kɔ fala kɛ tulunɔ tɛ̃ a nɛa we unu baa a ni, nɛ baa a wele nu ɛ tɛ̃ a. Nɛ a na: “Fala tɛ be 'daa unu ɔ nɛ mbé fɔ, kɛ NWA wila nu ɛ tɛ nɛ.

²⁸ E kɔ Gale tombo mbɔɛ li nza dɛ nù, kɔ ma ko dɔa kpalɛ hã mɔ.

²⁹ E kɔ ogele nu kɔnggɔnɔ wa dɛ to hã mɔ, nɛ onu kɔnggɔ Owele, wa gu nù ti mɔ. Mɔ sɛ a gã wi ngɔ onya mɔ, nɛ wa gu sɛ nù ti mɔ. Gale a fɔmbɔ sɛ wi kɛ a fɔmbɔ mɔ ni, nɛ a dɛ sɛ de mɔ hã wele kɛ a dɛ de mɔ hã mɔ ni.”

³⁰ Izaka wila nu ɛ tɛ Yakɔbɔ do'do, nɛ a hɔ nza, nɛ a la. A nɛa we la nɛ́ iko, nɛ Ezau yolo kɔlɔ yali zamɛ, nɛ a hɔ do mɔ ɛngga 'da a.

³¹ Nɛ a gi ma de wena, nɛ a nɛ nɛ hã baa a, nɛ a tɔ̃ hã a na: “Aa baa, mɔ kúlú ngɔ hã mɔ nyɔngɔ Sanggo ɛngga kɛ mi tɛa do ma gɛ. Kɔ mɔ wélé nu mɔ tɛ mi.”

³² Nɛ Izaka aka a na: “Ki a mɔ wio nde?” Nɛ Ezau gese na: “Wi a mi Ezau, kuti be 'da mɔ.”

³³ Izaka nɛa we zele ní, nɛ tɛ̃ a tana, nɛ a aka na: “Wi kɛ a gbɛa sɔ sa'de, nɛ a tɛa nɛ hã mi ni a wio nde? We kɛ mi nyɔngɔ sɔ ma dati hɔa 'da mɔ gɛ, nɛ mi wila nu mi tɛ̃ a ia. Nɛ wila nui ni ma 'bana sɛ do a fai.”

³⁴ Ezau nɛa we zele we baa a tɔ̃a ni, nɛ sila a dunu do mãlã, nɛ a zɛ nu a na: “Aa baa mi, mɔ wélé tɛ mɛ 'bɔ mbe nu mɔ tɛ mi gɔ nde!”

³⁵ Nɛ Izaka gese na: “Nya mɔ tɛa, nɛ a zũ wila nui kɛ mi nɛ wele sɔ tɛ mɔ ni vɛ̃ ia.”

³⁶ Nɛ Ezau na: “Li a a Yakɔbɔ gbãlã we, a a wi ɔkɔlɔ wi. A ɔkɔlɔ li mi fala bɔa. A zũ zi nwa kpasa wi 'da mi kɛ ma wia sɔ na, mi kpa ma olo baa lɛ ni. Kɔ dɔ ni, a zu 'bɔ wila nui kɛ na mi kpa sɔ ma ni.” Nɛ a tɔ̃ 'bɔ na: “Mɔ 'bànà mbe do tala wila nu we mi gɔ nde?”

³⁷ Nɛ Izaka gese na: “Mi ia a do nwa ngɔ mɔ, nɛ mi tɔ́a 'bɔ hã a na, onya a vɛ̃ wa hɔ sɛ owi tonɔ 'da a. Nɛ mi hã dɔa okpalɛ hã a. Mi wè 'bɔ do dɛ mɔ kpo we duzu mɔ gɔ, be 'daa!”

³⁸ Gɛnɛ kɔ ní, nɛ Ezau ala nu ɛ hã baa a tɛ mɛ ala fai. Nɛ a tɛ tɔ̃ na: “Aa baa mi, tala wila nu kpo iko ni 'bànà mbe gɔ nde? Mɔ wélé tɛ mɛ nu mɔ tɛ mi iko!” Nɛ a ma ngɔ he ma.

³⁹ Kɔ baa a zɔa na mɛ ni, nɛ a tɔ̃ hã a na: “Tɔa 'da mɔ ma nyɛlɛ sɛ do de nù mi kpalɛ, nɛ mbɔɛ li nza gɛ álá sɛ dɛ ngɔ fɔɛ 'da mɔ gɔ.

⁴⁰ Mɔ kpasa sɛ we kɔya bole 'da mɔ, nɛ mɔ dɛ sɛ to hã nya mɔ. Kɔ dunguu, nɛ mɔ bi sɛ a, nɛ mɔ kpasa sɛ ti kɔ a.”

Yakɔbɔ yu dɛ 'da yamba a Labanɛ

⁴¹ Ezau ba mãlã dɛ kɔ sila a nganda wena, we wila nui kɛ Yakɔbɔ kpa kɔ baa wa ni. Nɛ a tɔ̃ do kɔ sila a na: “Baa mi kɔlɔ fe nɛ ia. A fe do'do, nɛ mi gbɛ sɛ Yakɔbɔ.”

⁴² Nɛ Rebɛka nɛa we ĩ ti linggamɛnɔ zã Ezau ni, nɛ a sa mɔ hã Yakɔbɔ, nɛ a tɔ̃ hã a na: “Li mɔ sɔ sɛ, we kɛ nya mɔ Ezau kɔ̃a we bili nu gbã mɛ gɛ, kɔ a fa we gbɛ mɔ.

⁴³ Kɔ mɔ zélé mi ɔ dia, be 'daa. Mɔ kúlú ngɔ, hã mɔ yú dɛ 'da nya mi Labanɛ tɛ Haranɛ i.

⁴⁴ Mɔ ɔ sɛ i mɔ gbaa, hã nɔ̃lɔ̃ zã 'da nya mɔ ma gbɛsɛ,

⁴⁵ kɔ sila a mbɔkɔ ngɔ mɛ mɔ dɛa gɛ do'do, sɛ nɛ mi tombo sɛ hã mɔ na, mɔ kpolo tɛ mɔ de. Mi kɔ na obulu benɔ 'da mi, wa fe bɔa nɛ do 'da li kɔ gɔ.”

⁴⁶ Nɛ Rebɛka tɔ̃ hã Izaka na: “Oboko Hitinɔ kɛ Ezau kala wa gɛ, wa zɛlɛ tɛ mi wena, nɛ mi mbɔkɔ do wa do'do. Kɔ fala kɛ Yakɔbɔ ba 'bɔ wuko kɔ le 'da wa nde, nɛ mi sɛ 'bɔ do wɔ tɛ dungu nza bina.”