Ndo Nyanga Dɛ Mɔ 26 - WE NU GALE 1995

Izaka do nwa Abimelɛkɛ

¹ Zi dati, nɛ gba wɔ tia ngɔ nùi ni, do 'da fala kɛ Abrahama 'bana nza ni. Nɛ nde ngangga ni, gba wɔ tia 'bɔ mbé nɛ. Izaka nɛa we zɔ ní, nɛ a kulu ngɔ di ni, nɛ a la si Gerarɛ, tɛ ngɔ nùi 'da Abimelɛkɛ, nwa 'da Ofilisti.

² A hɔa i mɔ, nɛ NWA Gale bia tɛ̃ ɛ hã a, nɛ a tɔ̃ hã a na: “Mɔ tɛ nɛ̀ Ezipeto i gɔ, nɛ nde mɔ dɛ fala ɔi 'da mɔ tɛ fala kɛ mi be sɛ ma hã mɔ ni,

³ nɛ mɔ ɔ dɛ di ni. Mi sɛ fala nɛ kpo do mɔ, nɛ mi wele sɛ nu mi tɛ mɔ, nɛ mi hã 'bili tɛ nùnɔ gɛ vɛ̃ hã mɔ do obe zã mɔ. Na mɛ ni, nɛ mi dɛ sɛ mbuli kɛ mi kpua zi do baa mɔ Abrahama ni hã mɔ.

⁴ Mi dɛ sɛ na, obe zã mɔ wa dɛlɛ ɔ nɛ osɔlanɔ li nza gɛ, nɛ mi hã sɛ 'bili tɛ nùnɔ gɛ hã wa. Nɛ mi wele sɛ nu mi tɛ nu kɔnggɔ owinɔ ngɔ nù gɛ vɛ̃ do wala 'da wa,

⁵ we duzu kɛ Abrahama zila we nu mi, nɛ a dɛa ombulanɔ 'da mi vɛ̃.”

⁶ Izaka dɛa fala ɔi 'da a tɛ Gerarɛ.

⁷ Nɛ owinɔ di ni wa aka a we wuke 'da a, nɛ a gese hã wa na, a a boko nya ɛ. A kɔ̃̀ zi we tɔ̃ na Rebɛka a wuke 'da ɛ gɔ, we kɛ a dɛ zi kili na, mbe gɔ, nɛ owinɔ di ni ni wa gbɛ sɛ ɛ, we ba Rebɛka do wuko 'da wa, we duzu kɛ a de zɔnga wena.

⁸ Izaka ɔa dɛ di ni 'do nɛ nyɛla, nɛ mbe ngba soe kpo, nɛ nwa Abimelɛkɛ ma ngɔ ka mɔ do li holo tɔa 'da a dɛ nza i, nɛ a zɔ Izaka do Rebɛka, nɛ nde wa tɛ sɛ'bɛlɛ tɛ ngba wa.

⁹ Abimelɛkɛ nɛa we zɔ ní, nɛ a tombo wele hã Izaka na: “Mi ĩ na wuke ni a kɛnɛ mɔ. Kɔ gulu kɛ mɔ tɔ̃a zi na, a a boko nya mɔ ni we ge nde?” Nɛ Izaka gese na: “Mi tɔ̃a ni, we kɛ mi dɛa kili na, dɔ winɔ wa gbɛ́ mi we duzu a gɔ.”

¹⁰ Nɛ Abimelɛkɛ gese hã a na: “Mɔ dɛa do lɛ ni we ge nde? Kɔ fala kɛ mbe wele kpo sanga owinɔ gɛ ba sɔ wuko 'da mɔ kɔ mɔ, nɛ mɔ tɔ̃ sɔ na, lɛ dɛa 'dã mɔ nde?”

¹¹ Nɛ Abimelɛkɛ mbese owinɔ 'da a vɛ̃ na: “Wele kɛ a tulu wi wili gɛ tabi wuke 'da a nde, nɛ wa gbɛ sɛ a.”

¹² Do kɔ kpo sabɛlɛ ni, Izaka mi okpalɛ ngɔ nùi ni. Ma hɔa zɔlɔ kala ma, nɛ nde kpalɛ 'da a kua dɛlɛ nɛa ngɔ kɛ a mi zi ni fala kama, we duzu kɛ NWA Gale wila nu ɛ tɛ̃ a.

¹³ Nɛ kpamɛnɔ 'da Izaka ma gã zi dɛ dati gã fai, nɛ a zi do kpamɔ wena.

¹⁴ A do ba'de obata, odua, ongɔmbɔ, mba do gba gili owi dɛa to. Nɛ Ofilisti wa nɛa we zɔ ní, nɛ wa dɛ bɔnɛ hã a.

¹⁵ Nɛ wa nɛ tɛ nu kɔ lì kɛ baa a Abrahama zã zi ma do owi tonɔ 'da a dati fie 'da a ni, nɛ wa so nù dɛ kɔ nɛ, nɛ wa kpe ma vɛ̃.

¹⁶ Nɛ Abimelɛkɛ tɔ̃ hã Izaka na: “Mɔ fo tɛ mɔ ngɔ nùi 'da lɛ do'do, we kɛ mɔ do ngawi nɛa ngɔ lɛ.”

¹⁷ Izaka nɛa we zele ní, nɛ a kulu ngɔ, nɛ a la si dɛ kɔ gbangɔlɔ̃ Gerarɛ, nɛ a dɛ fala ɔi mɔ́ a i mɔ.

¹⁸ A dɛa ma do'do, nɛ a anga 'da kɔ lìnɔ owi dɛa tonɔ 'da baa a kɛ wa zã zi ma, nɛ Ofilisti wa kpia ma 'do fie 'da a ni. Nɛ Izaka gese linɔ kɛ baa a ia zi ma zu nɛ ni vɛ̃ dɛ olo nɛ.

¹⁹ Mbe ngba soe kpo, nɛ owi tonɔ 'da a wa zã kɔ lì, tɛ kɔ gbangɔlɛ̃ ni, nɛ wa kpa zu lì.

²⁰ Nɛ owi fɔmɔ onadalamɛnɔ tɛ Gerarɛ wa zɔa ni, nɛ wa ma ngɔ mɔ̃lɔ̃ zu nɛ do owinɔ 'da Izaka. Nɛ owi Gerarɛ wa tɔ̃ hã owi tonɔ 'da Izaka na, wele lì a mɔ́ lo. Ma kɛ Izaka ia li zu nɛ na, Ɛsɛkɛ. Gulu nɛ na: “Mɔ̃lã.” We duzu kɛ wa mɔ̃lɔ̃ do a ngɔ nɛ mɔ̃lã.

²¹ Owi tonɔ 'da Izaka wa zã mbé kɔ̃ lì, nɛ wa mɔ̃lɔ̃ 'bɔ zu nɛ. Nɛ a e li zu ki ni na Sitna. Gulu nɛ na: “Kpa we.”

²² 'Do ki ni, nɛ wa kulu ngɔ di ni, nɛ wa zã 'bɔ kɔ lì kɛ talɛ, nɛ wa mɔ̃̀lɔ̃̀ wá zu ki ni gɔ. Nɛ Izaka e li zu nɛ na Rɛhɔbɔtɛ. Gulu nɛ na: “Lɛ ngbɔa dɛ dati.” Nɛ a tɔ̃ 'bɔ na: “NWA gbala nu nùi 'da lɛ dɛ dati, takɔ lɛ kpa dia dungu dɛ fala gɛ.”

²³ A kulu ngɔ di ni, nɛ a la dɛ Bɛrseba.

²⁴ Do tũi 'do ki ni, nɛ NWA bia tɛ̃ ɛ hã a, nɛ a tɔ̃ hã a na: “Mi a Gale 'da baa mɔ Abrahama. Mɔ tɛ dɛ kili gɔ, we kɛ mi fala nɛ kpo do mɔ, nɛ mi wele sɛ nu mi tɛ mɔ. Mi dɛ sɛ na, obe zã mɔ wa dɛlɛ wena we duzu mbuli kɛ mi kpua zi hã wi toe 'da mi Abrahama ni.”

²⁵ Izaka dɛa gbagala do ta dɛ di ni, nɛ a dɔnggɔ Gale, nɛ a sa li a na NWA. A dɛa zi tɔa tandenɔ 'da a dɛ di ni, nɛ owi tonɔ 'da a wa zã 'bɔ mbé kɔ̃ lì.

Izaka dɛa na do Abimelɛkɛ

²⁶ Do 'da fala ni, nɛ Abimelɛkɛ kulu ngɔ tɛ Gerarɛ fala nɛ kpo do Ahuzatɛ, wi poe a, do Pikɔlɛ, gã wi ngɔ osodanɔ 'da a, nɛ wa nɛ we zɔ Izaka.

²⁷ Wa hɔa i mɔ, nɛ a aka wa na: “Gulu kɛ nɛ tɛa i nga we zɔ mi we ge nde? Nɛ kɔ̃̀ zi gɛnɛ mi gɔ, nɛ ndaka zi mi ngɔ nùi 'da nɛ ndaka gɔ nde?”

²⁸ Nɛ wa gese hã a na: “Ngangga ni, lɛ ĩ wá na, NWA fala nɛ kpo do mɔ boe. Nɛ lɛ lingga na, ma wia na lɛ dɛ mɔ kɛ ma be dɛa na sanga tɛ ngba lɛ do mɔ ni.

²⁹ Mɔ kɔ, nɛ mɔ zonggo tɛ mɔ hã lɛ na, mɔ dɛ sɛ 'dã mɔ do lɛ gɔ, we kɛ lɛ dɛ̀ zi 'dã mɔ do mɔ gɔ. Lɛ dɛa zi mɔ a dia, we kɛ lɛ ia mɔ, nɛ mɔ la do ba tɛ mɔ. Nɛ di dɔ ni lɛ ĩ na, NWA wila nu ɛ tɛ mɔ.”

³⁰ Wa wila wenɔ ni ia do'do, nɛ Izaka dɛa mɔ dɔ hã wa, nɛ wa nyɔngɔ mɔ, nɛ wa nɔ dɔ.

³¹ Fala sa titole belee, nɛ wa kulu ngɔ, nɛ wa zonggo tɛ wa hã ngba wa, nɛ Izaka kã wa, nɛ a e wa li wala, nɛ wa gɔnɔ sanga tɛ ngba wa do dia nɛ.

³² Do kpo kpo ngba soe ni, nɛ owi tonɔ 'da Izaka kɛ wa zã zi mbé kɔ lì ni wa hɔ, nɛ wa tɔ̃ hã a na, lo kpa lì.

³³ Nɛ a e li lì ni na Siba. Gulu nɛ na: “Kɔ̃ lì kɛ ma be zonggo tɛ wi.” Ma hã tia do sɔɛ gɛ wa sa li le ni na Bɛrseba, gulu nɛ na: “Kɔ̃ lì zonggo tɛ wi.”

Ezau kala owuko kɔ gele nu kɔnggɔ

³⁴ Fala kɛ Ezau ɔa zi sabɛlɛ 'bu nɛ nalɛ ni, nɛ a kala owuko bɔa. A ba Yɛhuditɛ be 'da Beri, do Basmatɛ be 'da Eloni. Wa bɔa nɛ zi a a oboko Hiti.

³⁵ Owukonɔ ni, wa hã zi ngamɔ hã Izaka do Rebɛka wena.