Ndo Nyanga Dɛ Mɔ 25 - WE NU GALE 1995

Mbe obe zã Abrahama

¹ Abrahama ba zi 'bɔ mbe wuko, li a a Kɛtura.

² Nɛ wuke ni kua obulu be hã a gazɛlɛ. Li benɔ ni a: Zimranɛ, Yokzanɛ, Mɛdanɛ, Madianɛ, Isɛbakɛ do Sua.

³ Yokzanɛ zi a baa Saba do Dedanɛ. Nɛ obe zã Dedanɛ zi a Oakuri, Olɛtusi do Olɛumi.

⁴ Nɛ li obenɔ 'da Madianɛ zi a Efa, Efɛrɛ Hanɔkɛ, Abida do Ɛlda. Owinɔ ni vɛ̃ zi a obe zã Kɛtura.

⁵ Abrahama la zi mɛnɔ 'da a vɛ̃ hã Izaka.

⁶ Nɛ nde 'da fala kɛ a 'bana zi nza ni, nɛ a kɛ̃a mbe mɛnɔ hã obe zã ko 'donɔ 'da a. A dɛa ni do'do, nɛ a tombo wa na, wa la si dɛ ngɔ nùi si 'biti gba wese, nɛ wa ɔ dɛ di ni, sɛ a wa nyɛlɛ do be 'da a Izaka de.

Abrahama fia

^7-8 Abrahama ɔa zi sabɛlɛ kama do 'bu nɛ sambo ngɔ nɛ mɔlɔ, nɛ a fe. A ɔa zi ngɔ nù gɛ gbaa, nɛ a dɛ gbɛlɛ kpɔkɔɔ, nɛ tũi 'da a ma wia, nɛ a fe.

⁹ Obenɔ 'da a, Izaka do Ismaɛlɛ wa mi a tɛ kɔ ta tɛ Makpela, kɛ ma dɔ̃ɔ do Mamre ni. Kɔ̃ɛ ni, ma a ngɔ nùi 'da Efroni, be 'da Soharɛ, wi Hiti.

¹⁰ Abrahama usa zi nùi ni kɔ obe zã Hɛtɛ, nɛ a mi zi wuke 'da a Sara dɛ di ni.

¹¹ 'Do kɛ Abrahama fia ni, nɛ Gale wila nu ɛ tɛ be olo a Izaka. Izaka ɔ zi dɔ̃ɔ do nu kɔ lì tɛ Lahai-Roi.

Obe zã Ismaɛlɛ

¹² Nɛ zélé li obe zã Ismaɛlɛ, bulu be kɛ Agarɛ, wuko Ezipetoe, wi toe 'da Sara kua zi a do Abrahama ni.

¹³ Li benɔ 'da Ismaɛlɛ yolo ngɔ kuti wele kɛ gbaa we hɔ ngɔ tala be ma kɛ: Nɛbayɔtɛ, Kedarɛ, Adbeɛlɛ, Mibsamɛ,

¹⁴ Misɛma, Duma, Masa,

¹⁵ Hadadɛ, Tema, Yɛturɛ, Nafikɛ, do Kɛdma.

¹⁶ Obenɔ 'da Ismaɛlɛ 'bu ngɔ wa bɔa gɛ wa a ni. Wele kpo kpo sanga wa ni zi a yaa nu fɛlɛ kula. Nɛ wa e zi 'bɔ li wa ngɔ lenɔ do ofalanɔ wa ɔ tɛ nɛ ni.

¹⁷ Ismaɛlɛ ɔa zi sabɛlɛ kama do 'bu nɛ talɛ ngɔ nɛ sambo, nɛ a fe.

¹⁸ Obe zã Ismaɛlɛ wa ba zi nùi ngbala le Havila do Surɛ, nɛ wa ɔ dɛ di ni. Surɛ kɔlɔ dɔ̃ɔ do Ezipeto si 'biti le Asurɛ. Nɛ obenɔ ni, wa dɛ̀ zi fala ɔinɔ 'da wa fala nɛ kpo do obe zã Abrahama gɔ.

Lɛnggɛ ngɔ Ezau do Yakɔbɔ

¹⁹ Nɛ zélé lɛnggɛ 'da Izaka be 'da Abrahama.

²⁰ Izaka zi do sabɛlɛ 'bu nɛ nalɛ, 'da fala kɛ a ba wuke 'da a Rebɛka, boko nya Labanɛ, be 'da Bɛtuɛlɛ be Aramɛ, kɛ a ɔ ngɔ nù Mezopotami ni.

²¹ Rebɛka zi a ndɔlɔ. Ma kɛ Izaka ala nu ɛ hã NWA we wuke 'da a. Nɛ NWA zila sambala 'da a, nɛ Rebɛka ba zã obe dã.

²² Ngba soe kpo, nɛ obenɔ wa ma ngɔ 'dɛnɛ ngba wa kɔ zã a i, nɛ a tɔ̃ na: “Ma ɔ na mɛ ni, nɛ gulu zã kɛ mi ba gɛ na ge nde?” Nɛ a nɛ we aka NWA Gale do we nɛ.

²³ Nɛ NWA tɔ̃ hã a na: “Mɔ ko sɛ nu kɔnggɔ Owele bɔa, nɛ nu kɔnggɔ winɔ bɔa ni, wa kɛ̃ sɛ sanga tɛ ngba wa. Mbe be kpo a nganda sɛ nɛ ngɔ ngba a, nɛ kuti be a dɛ sɛ to hã be 'do.”

²⁴ Tũ kula 'da a wia, nɛ a ko obe dã.

²⁵ Tɛ wele kɛ hɔa nza dati ni a fila yoo, nɛ tɛ̃ a vɛ̃ ma kpa do sala nɛ sala tɛ sa'de ni, nɛ wa e li a na Ezau.

²⁶ Dɛ 'do nɛ, nɛ be wele kɛ 'do gɛ, a hɔ, nɛ nde a 'bia timili nyanga nya a, nɛ wa e li a na Yakɔbɔ 'Da fala kula 'da wa, nɛ nde Izaka zi do sabɛlɛ 'bu nɛ gazɛlɛ.

Ezau 'dɔlɔ nwa kpasa wi 'da a hã Yakɔbɔ

²⁷ Obenɔ wa gã. Nɛ Ezau hɔa gã wi yɛnggɛ yali zamɔ. Nɛ Yakɔbɔ zi fioo wena, nɛ a yɛnggɛ zi ngboo gɔ.

²⁸ Izaka kɔ̃a zi gɛnɛ Ezau, we kɛ sa'de kɛ a gbɛ ni ma de zi tɛ̃ a wena, nɛ Rebɛka kɔ̃a zi kɛ 'da a a gɛnɛ Yakɔbɔ.

²⁹ Mbe tũ kpo, nɛ Yakɔbɔ zi tɛ gi mɔ ɔ nɛ hariko ni, nɛ Ezau yula kɔlɔ yali zamɛ, nɛ a mbɔkɔ wena.

³⁰ Nɛ a tɔ̃ hã Yakɔbɔ na: “Kɛ gɛ, ma wè do mi gɔ. Mɔ hã́ mbe fila supi mɔ gi gɛ, hã mi nɔ.” (Ma kɛ wa sa li a na Edɔmɛ, gulu nɛ na: “Fila mɔ kɛ ma ɔ yoo.”)

³¹ Nɛ Yakɔbɔ gese hã a na: “Mɔ 'dɔlɔ nwa kpasa wi 'da mɔ kɛ ma wia sɔ na, mɔ kpa ma olo baa lɛ ni hã mi, sɛ nɛ mi hã sɛ ma hã mɔ de.”

³² Nɛ Ezau kɔ̃, nɛ a tɔ̃ na: “Mi nɛ fe wɛ fia, nɛ nde mɛ kɛ nwa kpasa wi 'da mi nɛ dɛ hã mi ni a ge nde?”

³³ Nɛ Yakɔbɔ gese na: “Kɔ ma wia na, mɔ zonggo tɛ mɔ dati, sɛ nɛ de.” Nɛ Ezau zonggo tɛ̃ ɛ na, ɛ hã nwa kpasa wi 'da ɛ hã a.

³⁴ Nɛ Yakɔbɔ hã mapa do supu harikoe ni hã Ezau, nɛ a nyɔngɔ. A nyɔngɔ do'do, nɛ a kulu ngɔ, nɛ a la. Nɛ a lènggè do nwa kpasa wi 'da a gɔ.