Ndo Nyanga Dɛ Mɔ 23 - WE NU GALE 1995

Sara fia, nɛ Abrahama oso nù mi do a

¹ Sara ɔa zi sabɛlɛ kama do 'bu nɛ bɔa ngɔ nɛ sambo, nɛ a fe.

² A fia ngɔ nù Kanana tɛ kɔ le Kiriatɛ-Arba, kɛ mbe 'bɔ li nɛ a “Hebroni” ni. Nɛ Abrahama hia kɔ̃a wuke 'da a, nɛ a dɛ mɔ ngɔ fio a.

³ Nɛ a kulu ngɔ fala kɛ wɔlɔ wuke 'da a se'de ni, nɛ a nɛ we wele we do obe zã Hɛtɛ.

⁴ Nɛ a na: “Mi a gele wi, nɛ mi dɛa le do nɛ, kɔ nɛ be mbe gole nù hã mi, takɔ mi mí do wɔlɔ wuke 'da mi.”

⁵ Nɛ wa gese hã Abrahama na:

⁶ “Aa nwa, mɔ zélé lɛ sɛ! Mɔ a gã wi kɛ Gale wila nu a tɛ mɔ dɛ sanga lɛ gɛ. Mɔ sáká sanga ozununɔ 'da lɛ kɛ ma dia la li ni, nɛ mɔ mí fie 'da mɔ dɛ kɔ nɛ. Wele kpo kɔ lɛ gɛ bɛ̃́ sɛ na, mɔ mí wɔlɔ wuke 'da mɔ kɔ zuni 'da ɛ ni gɔ.”

⁷ Abrahama zila ní, nɛ a kulu ngɔ, nɛ a gu nù ti wa.

⁸ Nɛ a tɔ̃ hã wa na: “Fala kɛ nɛ kɔ̃ ngboo na mi mí wɔlɔ wuke 'da mi dɛ dɛ nde, nɛ nɛ tɔ̃ mbe we ngɔ mi hã Efroni, be 'da Soharɛ,

⁹ kɔ a be gole kɔ ta 'da a kɛ ma tɛ ndɔti nùi tɛ Makpela i ni hã mi. Nɛ ma wia na, a be gole ma hã mi ngboo kpa li nɛ vɛ̃, takɔ zuni ni, ma 'bana do kɛ 'da mi fai.”

¹⁰ Efroni, be Hiti ni dungu nù dɛ gbogbo onya a, obe zã Hɛtɛ, tɛ nu ngbo le, kɛ wa yɔlɔ gulu wenɔ dɛ tɛ nɛ ni. Nɛ a gisa we hã Abrahama do tɛlɛ tɛ kɛ na, we ni le zala onya a vɛ̃.

¹¹ Nɛ a tɔ̃ hã a na: “Aa nwa, mɔ zélé mi sɛ! Mɔ oso sɛ nùi do kɔ ta di ni ni usa gɔ. Nɛ nde mi hã sɛ ma hã mɔ hã iko kpa li onya mi vɛ̃. Mɔ nɛ́, hã mɔ mi wuke 'da mɔ dɛ di ni.”

¹² Nɛ Abrahama gu 'bɔ mbé nù ti owinɔ ni,

¹³ nɛ a wele we hã Efroni do tɛlɛ tɛ kɛ na owinɔ vɛ̃ wa zele ma. Nɛ a tɔ̃ na: “Mɔ kɔ̃́, nɛ mɔ zele mi sɛ. Mi kɔ̃a we oso nùi. Kɔ mɔ kɔ̃́ gɛnɛ mbili gɛ, takɔ mi mí wuke 'da mi.”

^14-15 Nɛ Efroni gese na: “Aa nwa, mɔ zélé mi sɛ! Lɛ ĩ ti ngba lɛ do mɔ ĩ, kɔ mi fi nu gole nùi hã mɔ we mbili kama nalɛ, nɛ nde mɛ a gã mɔ gɔ. Kɔ mɔ mí wuke 'da mɔ dɛ di ni iko.”

¹⁶ Abrahama kɔ̃a gɛnɛ gole kɛ Efroni hã ni, nɛ a tɔlɔ mbili kɛ a wia ma ni dɛ dati obe zã Hɛtɛ. Nɛ a we dĩ nɛ ngɔ kiloe 'da owi be golenɔ.

¹⁷ Do ngba soe ni, nùi 'da Efroni kɛ tɛ Makpela, kɛ mɔ yolo Mamre, nɛ nde ma si 'biti gba wese, do kɔ ta di ni ni, mba do otenɔ vɛ̃ kɛ li ngbala 'bili ma dɛ kɔ nɛ ni,

¹⁸ wele nɛ dɛa mɔ́ Abrahama. Nɛ obe zã Hɛtɛ vɛ̃ kɛ wa dungu nù nu ngbo le ni, wa zi a otemɔɛ nɛ.

¹⁹ 'Do nɛ, nɛ Abrahama mi wɔlɔ wuke 'da a Sara dɛ kɔ ta ngɔ nù Kanana ni

²⁰ Wele nùi do kɔ ta fala ni zi 'bɔ a mɔ́ obe zã Hɛtɛ mbé nɛ gɔ, nɛ nde ma hɔa zi kɛ 'da Abrahama, takɔ a mi sɛ do owinɔ 'da a.