Ndo Nyanga Dɛ Mɔ 21 - WE NU GALE 1995

Wa kua Izaka

¹ NWA wila nu a tɛ Sara, nɛ a dɛa dia mɛ a kpua zi mbulu nɛ hã a ni.

² Sara ba zã, nɛ a ko bulu be, nɛ nde Abrahama dɛa zi gbɛlɛ ia. A kua be ni do li zɔlɔ kɛ Gale tɔ̃a zi nɛ hã a ni.

³ Nɛ Abrahama e li be kɛ Sara kua a ni na Izaka.

⁴ 'Do kula 'da Izaka la tũ ngbɛ'dɛ'dɛ, nɛ Abrahama gɔnɔ a do gaza, ɔ nɛ kɛ Gale ba zi do nu ɛ hã a ni.

⁵ 'Da fala kɛ wa kua Izaka, nɛ nde Abrahama ɔa sabɛlɛ kama kpo.

⁶ Sara kua Izaka do'do, nɛ a tɔ̃ na: “Mɛ Gale dɛa do mi gɛ a mɔ mɔmu. Owinɔ vɛ̃ kɛ wa zele sɛ we nɛ ni, wa mɔmɔ sɛ mɔmu fala nɛ kpo do mi.”

⁷ Nɛ a tɔ̃ 'bɔ na: “Wi wia sɔ we tɔ̃ hã Abrahama na, mi e sɛ bele mi nu be ni a wio nde? Ĩ na mi kua be hã a, nɛ nde a dɛa gbɛlɛ ia.”

⁸ Be gã, nɛ do ngba soe kɛ Sara gɔnɔ bele nu a ni, nɛ Abrahama dɛa mɔ dɔ we a.

Abrahama ndaka Agarɛ do Ismaɛlɛ

⁹ Mbe ngba soe kpo, nɛ Ismaɛlɛ be kɛ Agarɛ, boko Ezipetoe kua a hã Abrahama ni, tɛ dɛ sa do Izaka. Sara nɛa we zɔ wa,

¹⁰ nɛ a tɔ̃ hã Abrahama na: “Mɔ ndáká wuke wi toe gɛ do be 'da a do'do. We kɛ ma wè na be 'da a mbá sɛ ngɔ kpamɛnɔ olo mɔ do be 'da mi Izaka gɔ.”

¹¹ Abrahama zila we kɛ Sara wila dɛ ngɔ be ni, nɛ ma dè tɛ̃ a gɔ, we kɛ Ismaɛlɛ tɛ mɛ 'bɔ a be 'da a.

¹² Nɛ Gale tɔ̃ hã Abrahama na: “Mɔ tɛ lènggè mɔ we duzu wi toe 'da mɔ, do bulu be 'da mɔ gɔ. Mɔ dɛ́ mɛnɔ vɛ̃ kɛ Sara tɔ̃ hã mɔ na mɔ dɛ ma ni. Mba gɔ, tati a obenɔ 'da Izaka wa sɛ a obe zã mɔ, ɔ nɛ kɛ mi kpua zi mbulu nɛ hã mɔ ni, nɛ wa e sɛ li mɔ zu wa.

¹³ Nɛ nde we be kɛ mɔ kua do wi toe 'da mɔ ni, mi dɛ sɛ 'bɔ na, a ko obe, nɛ obe zã a wa hɔ sɛ gã nu kɔnggɔ Owele, we kɛ a tɛ mɛ 'bɔ a be kala zã mɔ.”

¹⁴ Abrahama kulu ngɔ do sanga titole belee, nɛ a ba mapa mba do lì kɔ daka ndala, nɛ a hã ma hã Agarɛ. Nɛ Agarɛ kala ma, nɛ a zɛ ma zu 'baka a, nɛ Abrahama hã be hã a, nɛ a e a li wala na a si. Nɛ Agarɛ la, nɛ a yɔ wala tɛ yɛnggɛ do li gba zɔ̃ Bɛrseba gbaa.

¹⁵ Nɛ 'da fala kɛ lì kɔ daka ma ia vɛ̃ ni, nɛ Agarɛ e be dɛ ti mbe gɔ̃lɔ̃ te kpo, nɛ a la a dɛ di ni.

¹⁶ Nɛ a la nyɛlɛ bi sĩ ɔ nɛ kɛ wa da kpili, nɛ ma te tɛ nɛ ni, nɛ a dungu nù, nɛ a tɔ̃ do kɔ sila a na: “Ma wè na, mi zɔ be 'da mi tɛ fe dɛ gbali mi gɔ.” A dungu nù ni, nɛ a ma ngɔ he nɛ.

¹⁷ Gale zila hia kɔ̃a gɛlɛ be, nɛ yolo do li nza i, anzɛ 'da Gale sa mɔ hã Agarɛ, nɛ a aka a na: “Agarɛ, ma dɛa nɛ nde? Mɔ tɛ dɛ̀ kili gɔ. Gale zila hia kɔ̃a gɛlɛ be 'da mɔ tɛ ti gɔ̃lɔ̃ te ni.

¹⁸ Mɔ kúlú ngɔ, hã mɔ bá be 'da mɔ, nɛ mɔ fɔmɔ fala a. Gale a dɛ sɛ na, a ko obe dɛlɛ wena, nɛ obe zã a, wa hɔ sɛ gã nu kɔnggɔ Owele.”

¹⁹ Nɛ Gale fi li Agarɛ, nɛ a zɔ nu kɔ̃ lì, nɛ a nɛ, nɛ a so lì ni dɛ kɔ daka, nɛ a hã ma hã be 'da a na, a nɔ.

²⁰ Gale fɔmɔ be gbaa, nɛ a gã. Nɛ a ĩ zi ti da nzabele wena,

²¹ nɛ a ɔ zi tɛ li gba zɔ̃ Paranɛ. Naa a fa zi be zɔnga Ezipeto hã a, nɛ a ba a do wuko.

Abrahama gba takɔ do Abimelɛke

²² Do ngba soe ni, nɛ Abimelɛkɛ do Pikɔlɛ, kɛ a a gã wi ngɔ osoda Filisti ni, wa nɛa 'da Abrahama i, nɛ wa tɔ̃ hã a na: “Lɛ ĩ na, Gale fala nɛ kpo do mɔ kɔ mɛnɔ vɛ̃ mɔ dɛ ma gɛ.

²³ We duzu ki ni, mɔ kɔ̃, nɛ mɔ zonggo tɛ mɔ do zu li Gale na, mɔ ɔ́kɔ́lɔ́ sɛ mi, do obenɔ 'da mi, do obe zã wa gɔ. We kɛ mi bia dia kɔ sila hã mɔ. Hã ma wia na, mɔ be tɛ mɛ 'bɔ dia kɔ sila hã mi, do owinɔ mɔ ɔ dɛ sanga wa gɛ.”

²⁴ Nɛ Abrahama kɔ̃a, nɛ a tɔ̃ na: “Mi zungga tɛ mi ní.”

²⁵ Nɛ 'do nɛ, nɛ Abrahama ala nu a hã Abimelɛkɛ we duzu kɔ̃ lì 'da a kpo, kɛ owinɔ 'da Abimelɛkɛ wa ba zi ma kɔ̃ a do nga nɛ ni.

²⁶ Nɛ Abimelɛkɛ gese na: “Mi ĩ̀ ti wi kɛ a dɛa ní ni gɔ. Nɛ kɛ gbaa gɛ, mɔ tɔ̃́ mbe we nɛ hã mi gɔ. Kuti zele we nɛ a mi zele gɛ.”

²⁷ Nɛ Abrahama kala odua, do obata, do ongɔmbɔ, nɛ a hã ma hã Abimelɛkɛ, nɛ wa gba tɔkɔ sanga tɛ ngba wa.

²⁸ Nɛ Abrahama kala obe bata sambo kɔ nadalamɛnɔ 'da a, nɛ a a wa do tɛ̃ ɛ.

²⁹ Nɛ Abimelɛkɛ aka a na: “Gulu kɛ mɔ a wa do tɛ̃ ɛ we ge nde?”

³⁰ Nɛ Abrahama gese na: “Mɔ kɔ̃ nde, nɛ mɔ kala obe batanɔ sambo gɛ, takɔ ma gba sɛ ta zu mɔ na, mi a mi zã zi kɔ̃ lì gɛ.”

³¹ Gulu nɛ a wa sa li fala ni na Bɛrseba, we duzu kɛ wa bɔa nɛ, wa zungga zi tɛ wa dɛ di ni.

³² Nɛ 'do kɛ wa 'dafa zi sanga tɛ ngba wa do'do, nɛ Abimelɛkɛ do Pikɔlɛ, kɛ a a gã wi ngɔ sodanɔ ni, wa kpolo tɛ wa dɛ ngɔ nù Filisti i.

³³ Nɛ Abrahama mi te li nɛ a tamarisi dɛ Bɛrseba ni, nɛ a dɔnggɔ NWA Gale, kɛ a 'bana sɛ fai ni.

³⁴ Nɛ Abrahama ɔa zi dɛ ngɔ nù 'da Ofilisti 'do nɛ nyɛlɛ wena.