Ndo Nyanga Dɛ Mɔ 20 - WE NU GALE 1995

Abrahama do nwa Abimelɛke

¹ 'Do nɛ, nɛ Abrahama kulu ngɔ, nɛ a la si li gba zɔ̃ Negɛvɛ. Nɛ a dɛ fala ɔi 'da a dɛ ngbala le Kadɛsɛ do Surɛ. 'Do ki ni, nɛ a la, nɛ a ɔ tɛ le Gerarɛ.

² Nɛ Abrahama tɔ̃̀ hã owinɔ di ni ni na, Sara a wuke 'da ɛ gɔ, a a boko nya ɛ. Nwa tɛ Gerarɛ kɛ li a a Abimelɛkɛ nɛa we zele ní, nɛ a tombo Owele, nɛ wa ba Sara nɛ do a hã a.

³ Nɛ do tũi, nɛ Gale bia tɛ̃ ɛ kɔ yalɛ hã Abimelɛkɛ, nɛ a tɔ̃ hã a na: “Mɔ fe sɛ we duzu wuke kɛ mɔ ba a gɛ, we kɛ a a wuko mɔ́ wili.”

⁴ Nɛ nde do fala ni, Abimelɛkɛ tɛ ɔ̃ ngu'du Sara do ti gɔ. Nɛ a gese na: “Aa NWA, mi dɛ̀ 'dã mɔ gɔ. Nɛ mɔ kɔ̃a na, mi do owinɔ 'da mi, lɛ fe ni iko nde?

⁵ Abrahama do tɛ̃ a tɔ̃a hã mi na, Sara a boko nya ɛ, nɛ wuke tɔ̃ 'bɔ ni na, Abrahama a nya ɛ. Nɛ nde mɛ mi dɛa ni, ma yòlò kɔ 'dã linggamɔ gɔ.”

⁶ Nɛ Gale tɔ̃ 'bɔ hã a dɛ kɔ yalɛ ni na: “Mi tɛ mɛ 'bɔ, mi ĩ na, mɔ dɛ ma do 'dã linggamɔ gɔ. Gulu nɛ hã mi do tɛ mi ngboo mi amba mɔ na, mɔ tɛ 'bè tɛ wuke gɛ gɔ, da dɛ kɔ mɔ dɛ 'dã mɔ gbali mi gɔ.

⁷ Mɔ gésé wuke hã wili a. We kɛ wili a a wi gba olo nu mi Gale, nɛ a sambala sɛ mi we duzu mɔ na, mɔ tɛ fè gɔ. Nɛ nde fala kɛ mɔ gèsè a hã wili a gɔ, nɛ mɔ fe sɛ mba do nu fɛlɛ mɔ, nɛ nɛ kumu sɛ vɛ̃.”

⁸ Fala sa do titole belee, nɛ Abimelɛkɛ kulu ngɔ, nɛ a sa mɔ hã ogã wi tonɔ 'da a, nɛ a tɔ̃ yalɛ 'da a vɛ̃ hã wa. Nɛ kili ba wa wena.

⁹ Nɛ Abimelɛkɛ sa mɔ hã Abrahama, nɛ a aka a na: “Mɔ dɛa do lɛ ni we ge nde? Mɔ hã gã 'bako hã mi do owinɔ 'da mi ni we ge nde? 'Dã mɛ kɛ mi dɛa do mɔ na, mɔ dɛ mɔ do mi ní ni a ge nde? Mɛ mɔ dɛa gɛ, mɛ a mɔ dɛ̀ do wele gɔ.”

¹⁰ Nɛ a aka 'bɔ na: “Gulu kɛ mɔ dɛa ni we ge nde?”

¹¹ Nɛ Abrahama gese na: “Mi lingga zi na, owinɔ dɛ gɛ wa dɛ kili Gale gɔ. Nɛ mi lengge 'bɔ na, wa gbɛ sɛ mi we ba wuke 'da mi.

¹² Dɛ ngɔ nɛ, mi tɔ̃̀ 'bɔ bɛlɛ gɔ, Sara a boko nya mi ngboo, we kɛ baa lɛ do a kpo, nɛ naa lɛ do a wa dungu gula. Gulu nɛ a mi ba a do wuke 'da mi ni.

¹³ Fala kɛ Gale tɔ̃a zi na, mi kulu ngɔ nu tɔa 'da baa mi, hã mi la ni, nɛ mi tɔ̃ hã wuke 'da mi na, fala kɛ mɔ kɔ̃ mi kɔ̃a ngboo nde, nɛ mɔ tɔ̃́ sɛ hã owinɔ falanɔ vɛ̃ kɛ lɛ nɛ yɛnggɛ nɛ ni na, mɔ a boko nya mi.”

¹⁴ Abimelɛkɛ zila ní, nɛ a gese Sara hã wili a Abrahama. Nɛ a kala 'bɔ obata, odua, ongɔmbɔ, fala nɛ kpo do owi wili do owuko ngbá, nɛ a hã wa hã Abrahama.

¹⁵ Nɛ a tɔ̃ hã a na: “Mɔ zɔ́, le 'da mi vɛ̃ ma kɛ. Mɔ fá fala kɛ mɔ kɔ̃a ni, hã mɔ dungu nɛ.”

¹⁶ Nɛ a tɔ̃ 'bɔ hã Sara na: “Mɔ zɔ́, mi hã mbili koto kpo hã nya mɔ, takɔ ma be gbali owinɔ 'da mɔ na, mɔ dɛ̀ 'dã mɔ gɔ. Nɛ owinɔ vɛ̃ wa ĩ sɛ na, mɔ 'dàngà dɔlɔ li 'da mɔ gɔ.”

^17-18 Nɛ nde we duzu mɛ wa dɛa hã Sara, wuko 'da Abrahama ni, nɛ NWA dɛa na, wukonɔ kɔ tɔa 'da Abimelɛkɛ ni vɛ̃, wa tɛ kò 'bɔ kula gɔ. Nɛ Abrahama sambala Gale we duzu wa, nɛ Gale kpasa Abimelɛkɛ, do wuko 'da a do owuko wi dɛa tonɔ 'da a, nɛ a dɛa na, wa ko 'bɔ mbé kula.