Ndo Nyanga Dɛ Mɔ 2 - WE NU GALE 1995

¹ Na mɛ ni, Gale dɛa li nza do nùi do omɛnɔ vɛ kɛ ma ngɔ nɛ ni, nɛ ma ia.

² Nɛ ma nɛa we hɔ tɛ sambo tũi, nɛ nde Gale dɛa mɛnɔ vɛ ia, nɛ a kpe tɛ a olo dɛa toe 'da a.

³ Nɛ a wele nu a tɛ kɔ tũi kɛ sambo ni, nɛ a e ma do tũ 'da a, we duzu kɛ do kɔ tũi ni, a kpia zi tɛ a olo tonɔ vɛ a dɛa ni.

⁴ Tɛlɛ tɛ kɛ Gale dɛa li nza do nùi gɛ a ni. 'Da fala kɛ NWA Gale dɛa li nza do nùi,

Fɔ Edɛnɛ

⁵ nɛ nde wɔkɔsɔ zi ngɔ nù gɛ kpo bina, nɛ kpalɛ tɛ hɔ zi 'bɔ gɔ. Mba gɔ, a tɛ tombo zi kolo na, ma tɛ gɔ. Nɛ wele zi 'bɔ ngɔ nù nga na, a wa fɔ bina.

⁶ Nɛ nde mɛ ma 'bɔ zi nùi, mɛ tati a lì kɛ ma yolo ti nùi, nɛ ma kũ dɛ nza nga ni iko.

⁷ Nɛ NWA Gale kɔtɔ nù, nɛ a 'bo ma, nɛ a dɛ ma do wele. Nɛ a ufu bũ kpasi dɛ kɔ zɔ a, nɛ wele ma ngɔ ɔmɔ nɛ.

⁸ 'Do ki ni, nɛ NWA Gale mi fɔ ngɔ nù Edɛnɛ, kɛ ma si 'biti gba wese ni, nɛ a e wi wili a dɛa a ni kɔ fɔɛ ni.

⁹ Nɛ Gale dɛa na, ote tɛ ɛ do tɛ ɛ ma hɔ di ni. Otenɔ ni ma de zi wena, nɛ owala nɛ ma ɛfɛ zi ndirr. Nɛ nde dɛ gbogbo fɔɛ ni, a mi te kɛ ma hã kpasi, nɛ a mi 'bɔ te kɛ ma hã hã zã we ĩ ti gɔnɔ sanga de mɔ do 'dã mɔ ni.

¹⁰ Zu gba lì zi ngɔ nù Edɛnɛ, nɛ lì ni ma fo do kɔ fɔɛ, takɔ ma 'bɔ nùi. Kɔ ma nɛa we hɔ nza kɔ fɔɛ ni, nɛ ma gɔnɔ sanga tɛ ngba ɛ do gba kɔ̃ nɛ nalɛ.

¹¹ Gba kɔ̃ lì kɛ dati, li nɛ a Pisoni. Lì ni ma fua, nɛ ma zĩ nù Havila. Nù Havila ni ma do mɔ mbali boe.

¹² Mɔ hɔ ngɔ nùi ni, nɛ mɔ kpa mɔ mbali kɛ 'dɔlɔ nɛ kɔ nɛ bina ni. Nɛ mɔ kpa 'bɔ dia nɔ yɔmbɛ kɛ wa sa li nɛ na bɛdɛliumɛ, do ota olo gã gole kɛ li nɛ a kɔrnalinɛ.

¹³ Gba kɔ lì kɛ bɔa, li nɛ a Guhoni. Lì ni ma fua, nɛ ma zĩ nù Kusi.

¹⁴ Gba kɔ̃ lì kɛ talɛ, li nɛ a Tigrɛ, ma fua do nu le Asurɛ si 'biti gba wese. Nɛ tala gba kɔ̃ lì kɛ nalɛ, li nɛ a Efratɛ.

¹⁵ NWA Gale ba wi wili a dɛa a ni, nɛ a e a kɔ fɔ Edɛnɛ i na, a wa ma, nɛ a zɔ mɔ tɛ nɛ.

¹⁶ Nɛ Gale ba nu ɛ hã a na: “Mɔ nyɔ́ngɔ́ owala tenɔ kɔ fɔɛ gɛ vɛ.

¹⁷ Nɛ nde wala te kpo kɛ ma hã hã zã we ĩ ti gɔnɔ sanga de mɔ do 'dã mɔ ni, dɔ mɔ nyɔngɔ ma gɔ. Fala kɛ mɔ nyɔngɔ ma, nɛ mɔ fe sɛ fio.”

¹⁸ Nɛ NWA Gale tɔ̃ na: “Ma wè na wi wili ɔ zu a kpo iko gɔ. Mi dɛ sɛ wi gala a, kɛ a wia do a ni na, wa ɔ do a fala nɛ kpo.”

¹⁹ Nɛ Gale kɔtɔ nù, nɛ a 'bo ma, nɛ a dɛ do osa'denɔ ngɔ nù gɛ, do onɔɛ tɛ ɛ do tɛ ɛ, nɛ a a wa vɛ dɛ dati wi ni we zɔ tɛlɛ tɛ kɛ a e sɛ do li wa kpo do kpo ni. Mba gɔ, ma wia zi na, wa sa li sa'de kpo kpo do li kɛ wi ni ia ma ni.

²⁰ Nɛ wi ni ia zi li zu onadalamɛnɔ do osa'de zamɔ, do onɔɛ kpo do kpo vɛ. Nɛ nde sanga wa ni vɛ, a kpà zi wi gala a kɛ a wia do a ni gɔ.

²¹ Nɛ NWA Gale fi wi wili a dɛa a ni nù do nga yala, nɛ ma nɛ ngɔ a wena. Nɛ Gale ba mbe gbãlã ngu'du a kpo, nɛ a kpe olo nɛ do mulu.

²² A ba gbãlã ngu'du wi wili ni, nɛ a dɛ ma do wuko, nɛ a nɛ do a hã wi wili.

²³ Wi wili nɛa we zɔ wuke ni, nɛ a he mɔ na: “Di ngangga ni, mi kpa wi we kɔ do mi ia. Kili tɛ lɛ do tɔkɔ tɛ lɛ do a kpo. Wa sa sɛ li a na wuko. We duzu kɛ a yula kɔ wi wili.”

²⁴ Gulu nɛ a wi wili a la sɛ baa a do naa a, nɛ a mba sɛ ngba a do wuke 'da a, nɛ wa bɔa nɛ wa hɔ kili tɛ wi kpo.

²⁵ Wi wili ni do wuke wa zi bɔa nɛ do wila tɛ wa, nɛ nde sape tɛ wa, ma bá zi li wa dati ngba wa gɔ.