Ndo Nyanga Dɛ Mɔ 19 - WE NU GALE 1995

Lɔtɛ yu, nɛ a hɔ nza kɔ le Sodɔmɛ

¹ Wese gɛ̃a, nɛ anzɛnɔ bɔa ni, wa hɔ Sodɔmɛ i, nɛ nde Lɔtɛ dungu nù dɛ nu ngbo le ni. A nɛa we zɔ anzɛnɔ bɔa ni, nɛ a kulu ngɔ, nɛ a gɔnɔ dati wa, nɛ a gu nù ti wa, nɛ a tɔ̃ hã wa na:

² “Aa nɛ, nwanɔ 'da mi, nɛ kɔ̃, nɛ nɛ ɛlɛ nu tɔa 'da mi, wi dɛa toe 'da nɛ, hã nɛ fɔlɔ nyanga nɛ, nɛ nɛ ɔ nù, hã fala sa belee, sɛ nɛ nɛ la de.” Nɛ wa tɔ̃ hã a na: “Ma wé sɛ gɔ, lɛ ɔ sɛ dɛ li fanda gbogbo le gɛ.”

³ Nɛ Lɔtɛ dala nu ɛ hã wa gbaa, nɛ wa ɛlɛ, nɛ wa nɛ do a, takɔ wa ɔ 'da a i. A gi mɔ hã wa, nɛ a dɔ mapa kɛ wa à ina hana mapa se'de gɔ ni, nɛ a hã ma hã wa, nɛ wa nyɔngɔ.

⁴ Nɛ dati kɛ na, gɛnɛnɔ wa ɔ nù ni, nɛ owi wilinɔ kɔ le Sodɔmɛ vɛ̃, obe zagbãlã do okpasa wi, wa tɛ, nɛ wa linggi tɔa 'da Lɔtɛ.

⁵ Nɛ wa sa mɔ hã a, nɛ wa tɔ̃ hã a na: “Lɔtɛ, owi wilinɔ wa hɔa 'da mɔ gɛ̃a wese tũi gɛ, wa a do nde? Mɔ fo wa dɛ nza hã lɛ, lɛ kɔ̃a we ɔ do wa.”

⁶ Lɔtɛ zila ní, nɛ a hɔ nza, nɛ a kpe nu tɔa do 'do a,

⁷ nɛ a tɔ̃ hã wa na: “Aa onyae, nɛ kɔ̃, nɛ nɛ tɛ dɛ̀ ni gɔ, ma dè gɔ.

⁸ Nɛ zɔ́, mi do obe zɔnga benɔ 'da mi bɔa, wa tɛ ĩ̀ ti wili gɔ. Hã nɛ kɔ̃ nde, nɛ mi kala wa dɛ nza hã nɛ, nɛ nɛ dɛ mɛ kɛ zã nɛ kɔ̃a ni do wa. Nɛ nde nɛ tɛ dɛ̀ 'dã mɔ do winɔ gɛ gɔ. Wa a gɛnɛ ngɔ mi.”

⁹ Nɛ wa gese hã a na: “Mɔ fo tɛ mɔ li lɛ nɛ́! Gele wi ɔ nɛ mɔ gɛ, nɛ mɔ e mbula ngɔ lɛ nde? Mɔ fo tɛ mɔ di ni, ní gɔ, nɛ lɛ dɛ sɛ mɔ 'danga nɛ ngɔ kɛ lɛ nɛ dɛ sɔ do wa ni.” Ma 'bana dɛ nu wa ni, nɛ wa te tɛ Lɔtɛ, nɛ wa gbɔtɔ a dɛ 'do, takɔ wa gbini nu tɔa.

¹⁰ Kɔ anzɛnɔ bɔa ni, wa nɛa we zɔ ni, nɛ wa ba Lɔtɛ sanga wa ni dɛ 'da wa tɔa nga, nɛ wa kpe nu tɔa.

¹¹ Nɛ wa fi tandu li winɔ nza i ni vɛ̃, nɛ wa wè tɛ zɔ 'bɔ nu tɔa gɔ.

¹² Nɛ anzɛnɔ bɔa ni, wa aka Lɔtɛ na: “Mɔ do owi na mɔ mɔ dɛ boe nde? Obenɔ 'da mɔ, bulu benɔ tabi boko benɔ, tabi owili kɛfɛnɔ 'da mɔ, tabi gele wi na mɔ mɔ boe nde? Fala kɛ wa boe, nɛ mɔ kala wa vɛ̃, hã mɔ hɔ do wa kɔ le gɛ dɛ nza, we kɛ lɛ nɛ 'danga ma 'danga.

¹³ Mba gɔ, sako 'dã mɛnɔ kɛ owi Sodɔmɛ wa dɛ ni, ma hɔa zala NWA, hã a tumba lɛ we 'danga le 'da wa.”

¹⁴ Nɛ Lɔtɛ nɛa, nɛ a kpa owi wilinɔ kɛ wa kɔ̃a we ba benɔ 'da a ni, nɛ a tɔ̃ hã wa na: “Nɛ wɛlɛ tɛ nɛ dɔ̃ dɔ̃, hã nɛ hɔ nza kɔ le gɛ do'do, we kɛ NWA nɛ 'danga ma 'danga.” Nɛ owili kɛfɛnɔ 'da a ni, wa lingga na, Lɔtɛ fi gbɛlɛ gbɛsɛ iko.

¹⁵ Fala ma ngɔ gɔnɔ daɛ̃ɛ, nɛ anzɛnɔ wa hɛ̃lɛ̃ Lɔtɛ na: “Mɔ kúlú ngɔ, hã mɔ ba wuke 'da mɔ, nɛ mɔ kala obe zɔnga benɔ 'da mɔ bɔa nɛ, hã mɔ la do wa. Ní gɔ, kɔ fala kɛ lɛ nɛ si olo 'dã mɛnɔ kɛ winɔ kɔ le gɛ wa dɛa ni, nɛ nɛ fe sɛ do wa fala nɛ kpo.”

¹⁶ Lɔtɛ ma ngɔ zĩ tɛ̃ a, nɛ anzɛnɔ wa 'be nu kɔ̃ a, do wuke do obenɔ 'da a, nɛ wa kã wa gbaa, nɛ wa e wa nu ngba le, we duzu kɛ NWA kɔ̃̀ zi na, wa fe gɔ.

¹⁷ Wa hɔa nza do'do, nɛ mbe kpo sanga anzɛnɔ ni tɔ̃ hã Lɔtɛ na: “Mɔ yú, da dɛ kɔ mɔ fé gɔ. Nɛ mɔ tɛ kà mɔ 'do mɔ gɔ, nɛ mɔ tɛ yòlò 'bɔ nù kɔ gbangɔlɛ̃ gɛ gɔ. Mɔ yú, hã mɔ usu tɛ mɔ ngɔ kalanɔ i. Ní gɔ, nɛ mɔ fe sɛ.”

¹⁸ Nɛ Lɔtɛ gese na: “NWA, ma wé sɛ gɔ.

¹⁹ Gbãlã we, mɔ bia dia kɔ sila hã mi, nɛ mɔ kpasa mi li fio. Nɛ nde mi wè tɛ yu gbaa ngɔ kala i gɔ, we kɛ mi yu dɛ i mɔ, nɛ ngamɛ ma kpa sɛ mi dɛ li wala, nɛ mi fe sɛ dati kɛ na mi hɔ i mɔ ni.

²⁰ Nɛ nde mɔ zɔ be le dɔ̃ɔ gɛ, ma nyɛlɛ gɔ. Mɔ kɔ̃ nde, nɛ mi yu dɛ i mɔ, nɛ mi fé sɛ gɔ, we kɛ mɛ a be le sĩ iko.”

²¹ Nɛ anzɛ gese na: “Mi kɔ̃a, mi 'dángá sɛ le ni gɔ.

²² Kɔ mɔ wɛlɛ tɛ mɔ, hã mɔ usu tɛ mɔ i mɔ, we kɛ mi wè tɛ dɛ mɔ kpo dati kɛ na mɔ hɔ i mɔ sɛ ni gɔ.” Gulu nɛ a wa sa li le ni na Soarɛ.

Wa 'danga Sodɔmɛ do Gomɔrɛ

²³ Lɔtɛ nɛa we hɔ tɛ Soarɛ i, nɛ wese ma ngɔ gba nɛ.

²⁴ Nɛ NWA tumba gba nyɛa we, nɛ ma ala dɛ ngɔ le Sodɔmɛ do Gomɔrɛ ɔ nɛ tɛa kolo ni.

²⁵ Nɛ NWA 'danga lenɔ ni bɔa nɛ, mba do gbangɔlɛ̃ 'do nɛ ni. Nɛ a gbɛa owinɔ kɔ nɛ, nɛ a 'danga 'bɔ okpalɛ li fɔnɔ 'da wa vɛ̃.

²⁶ Nɛ wuke 'da Lɔtɛ ka mɔ 'do a, nɛ a kifi 'bua tɔ̃, nɛ ma yolo dɛ ngɔ ni.

²⁷ Abrahama kulu ngɔ do sanga titole belee, nɛ a nɛ tɛ fala kɛ a yula zi nɛ dati NWA ni.

²⁸ Nɛ a ka mɔ si dɛ ngɔ Sodɔmɛ do Gomɔrɛ, do kɔ gbangɔlɛ̃ kɛ zã lenɔ ni vɛ̃, nɛ a zɔ gba zɛ̃ we, nɛ nde ma kpia ngɔ lenɔ kpã kpã.

²⁹ Na mɛ ni, fala kɛ Gale 'danga zi lenɔ kɔ gbangɔlɛ̃ kɛ Lɔtɛ ɔa tɛ nɛ ni, nɛ ta zu a gba ngɔ Abrahama, nɛ a ba wala hã Lɔtɛ na a yu, hã a kpasa kɔ ngamɛ ni.

Gulu nu fɛlɛ Omoabɛ do Oamoni

³⁰ Lɔtɛ dɛa zi kili ɔ dɛ tɛ Soarɛ, nɛ a kulu kɔ le ni, nɛ a kala obe zɔnga benɔ 'da a bɔa nɛ, nɛ a la do wa si ngɔ kala i, nɛ a ɔ tɛ kɔ ta i mɔ ni.

³¹ Mbe kɔ̃ tũ kpo, nɛ kuti boko be 'da a tɔ̃ hã hɔ dɛ 'do a na: “Baa lɛ ma ngɔ dɛ gbɛlɛ, nɛ wi wili kpo ngɔ nùi kɛ lɛ ɔa do ma gɛ na, lɛ ba a hã lɛ ko be do a bina.

³² Kɔ ma wia na, lɛ hã dɔ̃ hã baa lɛ na, a nɔ hã ma ba a nde, nɛ lɛ mba ngɔ te do a, hã lɛ ko obe zã lɛ hã a.”

³³ Nɛ do gɛ̃a wese ni, nɛ wa e dɔ̃ɛ nu baa wa gbaa, nɛ ma ba a. Nɛ do tũi, nɛ kuti be 'da Lɔtɛ mba ngɔ te do a. Nɛ a ĩ zi mɔ kpo na, be 'da ɛ mba ngɔ te do ɛ, hã a kulu ngɔ ni gɔ.

³⁴ Tũi 'do ki ni, nɛ kuti be tɔ̃ hã hɔ dɛ 'do a na: “Ma wia ia. Mi mba ngɔ te do baa lɛ zɛ tũi gɛ ia. Kɔ ma wia na tũi gɛ, nɛ lɛ e 'bɔ dɔ̃ɛ nu a, hã ma ba a nde, nɛ mɔ mba ngɔ te do a. Na mɛ ni, nɛ lɛ ko sɛ obe zã lɛ hã a.”

³⁵ Nɛ do gɛ̃a wese ni, nɛ wa e 'bɔ dɔ̃ɛ nu baa wa gbaa, nɛ ma ba a, nɛ be wele kɛ 'do gɛ mba ngɔ te do a. Nɛ a ĩ̀ 'bɔ mɔ kpo na, be 'da ɛ mba ngɔ te do ɛ, hã a kulu ngɔ ni gɔ.

³⁶ Be zɔnga benɔ 'da Lɔtɛ bɔa nɛ wa ba zã,

³⁷ nɛ kuti wele kɛ ko bulu be, nɛ a e li a na Moabɛ. Nɛ a a yaa owinɔ kɛ wa sa li wa na Omoabɛ ni tia do sɔɛ gɛ.

³⁸ Nɛ wele kɛ 'do gɛ, a ko tɛ mɛ 'bɔ bulu be, nɛ a e li a na Bɛnɛ-Ami. A ni a a yaa owinɔ kɛ wa sa li wa na Oamoni ni tia do sɔɛ gɛ.