Ndo Nyanga Dɛ Mɔ 18 - WE NU GALE 1995

NWA Gale mbese Sara na a ko sɛ bulu be

¹ Nɛ NWA bia tɛ̃ ɛ hã Abrahama tɛ ti te sɛnɛ tɛ Mamre. Nɛ do 'da fala ni, nɛ nde Abrahama hɔa ti tɔa tande 'da a dɛ nza, nɛ a dungu nù dɛ dati nɛ ni, we kɛ ma zi do gba wese, nɛ wese to wena.

² Kɔ a nɛa we fi li a, nɛ a zɔ Owi wili talɛ tɛ yolo nɛ. Nɛ a kulu ngɔ, nɛ a wɛlɛ tɛ̃ a dɛ 'da wa i, nɛ a gu nù ti wa,

³ nɛ a tɔ̃ hã wa na: “Nɛ kɔ̃́, nɛ nɛ kpe mbe tɛ nɛ 'da mi gɛ, hã mi dɛ gɛnɛ nɛ, sɛ nɛ nɛ la de.

⁴ E kɔ wa so mbe lì, hã nɛ fɔlɔ do nyanga nɛ, nɛ nɛ kpe tɛ nɛ tɛ ti te gɛ,

⁵ kɔ mi hã mbe nyɔngɔmɔ hã nɛ, hã nɛ kpa ngawi, sɛ nɛ nɛ ĩ ti gɔnɔ wala 'da nɛ de. Nɛ wè tɛ la ní iko gɔ.” Nɛ ogɛnɛnɔ wa gese na: “Ma a dia, mɔ dɛ mɛ kɛ zã mɔ kɔ̃a ni.”

⁶ Nɛ Abrahama wɛlɛ tɛ̃ a dɛ kɔ tɔa tande i, nɛ a tɔ̃ hã Sara na: “Mɔ só fũ farini dɔ̃, hã mɔ dɔ mapa talɛ.”

⁷ Nɛ a yu dɛ nu ba'de 'da a i, nɛ a saka mbe be ngɔmbɔ kpo kɛ a dɛ nɔ wena ni. Nɛ a ba a hã wi dɛa toe 'da a na, a gbɛ a, nɛ a gi ma dɔ̃.

⁸ Fala kɛ nyɔngɔmɛ mbɔkɔ do'do, nɛ Abrahama kala ma, nɛ a mba do ma'bɛlɛ kɛ ma ngu ngua, do kɛ ma 'bana do lì nɛ ni, nɛ a a ti gɛnɛnɔ na wa nyɔngɔ. Fala kɛ wa tɛ nyɔngɔ nɛ ni, nɛ Abrahama yolo dɛ kɛ zã wa dɛ ti te ni.

⁹ Nɛ wa aka a na: “Wuke 'da mɔ Sara a do nde?” Nɛ Abrahama gese hã wa na: “A ti tɔa tande i.”

¹⁰ Nɛ mbe kpo kɔ gɛnɛnɔ ni tɔ̃ na: “Sabɛlɛ 'do gɛ, nɛ mi hɔ sɛ 'bɔ 'da mɔ gɛ, nɛ nde wuke 'da mɔ Sara a kua bulu be ia.” Mɛ ni, nɛ nde Sara yula dɛ nu tɔa tande 'do Abrahama ni, nɛ a zila we ni.

¹¹ Nɛ a mɔmɔ gɛɔ, we kɛ wa do Abrahama wa ngua do'do, nɛ a la li kula ia.

¹² Nɛ a tɔ̃ do kɔ zã a na: “Mi ngua, nɛ Abrahama dɛa 'bɔ gbɛlɛ ia, nɛ wɔ tɛ ngba lɛ ia tɛ lɛ do'do.”

¹³ Nɛ NWA ni tɔ̃ hã Abrahama na: “Gulu kɛ Sara mɔma, nɛ a tɔ̃ na, ma wé sɛ gɔ, we kɛ ɛ ngua, nɛ ɛ la 'bɔ li kula ia ni we ge nde?

¹⁴ Mɔ kɛ ma gana Gale ni, ma bina. Nɛ nde 'da fala mi kpolo sɛ tɛ mi 'da mɔ nga kɔ sabɛlɛ 'do gɛ, nɛ nde Sara kua bulu be ia.”

¹⁵ Nɛ Sara dɛa kili, nɛ a kafa na, ɛ mɔ̀mɔ̀ gɔ. Nɛ NWA gese hã a na: “Mɔ tɛ kàfà gɔ, mɔ mɔma.”

Abrahama aka Gale we le Sodɔmɛ

¹⁶ Ogɛnɛnɔ wa kulu ngɔ, nɛ Abrahama kã wa. Wa ma ngɔ la nɛ, nɛ wa hɔ tɛ mbe fala kɛ ma ka mɔ dɛ ngɔ le Sodɔmɛ.

¹⁷ Nɛ NWA tɔ̃ do kɔ sila ɛ na: “Ma wè na, mi úsú mɛ kɛ mi nɛ dɛ nɛ ni do Abrahama gɔ.

¹⁸ We kɛ a sɛ a yaa nu kɔnggɔ gba gili Owele. Nɛ mi wele sɛ nu mi tɛ nu kɔnggɔ winɔ ngɔ nù gɛ vɛ̃ do wala 'da a.

¹⁹ Mi saka a, takɔ a tɔ̃ mbula hã obenɔ 'da a do obe zã wa na, wa zele we nu mi, nɛ wa dɛ mɔ tɛ wa do bɔlɔ nɛ. Sɛ nɛ mi we sɛ we dɛ mɛ kɛ mi kpua zi mbulu nɛ hã a ni de.”

²⁰ Nɛ NWA tɔ̃ hã Abrahama na: “Wa da owi Sodɔmɛ do Gomɔrɛ hã mi wena, nɛ 'dã mɛnɔ 'da wa ma gã 'bɔ la li ngele.

²¹ Kɔ mi kɔ̃a na, mi nɛ hã mi zɔ mɛnɔ kɛ wa tɔ̃ we nɛ dɛ ngɔ wa ni, tabi mɛ a gbãlã we nde.”

²² Nɛ mbe gɛnɛnɔ bɔa ni wa la si tɛ Sodɔmɛ, nɛ NWA 'bana kɛ 'da a dɛ di ni do Abrahama.

²³ Nɛ Abrahama ngbɔ tɛ̃ ɛ dɛ kɛ zã a, nɛ a aka na: “Aa NWA, mɔ gbɛ sɛ owi bɔlɔ zunɔ do owi dɛ 'dã mɛnɔ fala nɛ kpo nde?

²⁴ Mbe gɔ, nɛ nde kɔ le Sodɔmɛ ni, owi bɔlɔ zu 'bu wa mɔlɔ boe, nɛ mɔ 'danga sɛ le vɛ̃ nde? Mɔ ĩ́ sɛ 'bako hã wa we duzu owi bɔlɔ zunɔ 'bu wa mɔlɔ ni gɔ nde?

²⁵ Ɔ̃ ɔ̃, mɔ wè tɛ gbɛ owi bɔlɔ zu fala nɛ kpo do owi dɛ 'dã mɔ gɔ. We kɛ mɔ dɛ ni, nɛ ma ɔ sɛ nɛ kɛ de wi do 'dã wi wa wia kɔ̃ li mɔ iko ni. Mɔ, kɛ mɔ a wi gɔnɔ we 'da owinɔ nyanga nza gɛ vɛ̃ ni, ma wè na, mɔ gɔnɔ we do bɔlɔ nɛ gɔ nde?”

²⁶ Nɛ NWA gese na: “Fala kɛ mi kpa owi bɔlɔ zu 'bu wa mɔlɔ kɔ le Sodɔmɛ nde, nɛ mi la sɛ ma we duzu owinɔ ni.”

²⁷ Nɛ Abrahama tɔ̃ 'bɔ na: “Aa NWA, mi gɛ, mi a mɔ yala iko, kɔ mɔ mbɔkɔ mi, hã mi aka 'bɔ mɔ mbé nɛ.

²⁸ Mbe gɔ, nɛ nde sanga owi bɔlɔ zunɔ 'bu wa mɔlɔ ni, wa nyanga Owele mɔlɔ, nɛ wa 'bana 'bu wa nalɛ ngɔ wa mɔlɔ. Nɛ we duzu owinɔ mɔlɔ wa nyanga ni, nɛ mɔ 'danga sɛ le vɛ̃ nde?” Nɛ NWA Gale tɔ̃ na: “Fala kɛ mi kpa wa di ni 'bu wa nalɛ ngɔ wa mɔlɔ, nɛ nde mi 'dángá sɛ le gɔ.”

²⁹ Nɛ Abrahama tɔ̃ 'bɔ na: “Kɔ fala kɛ wa kpa owi bɔlɔ zu 'bu wa nalɛ ni?” Nɛ Gale tɔ̃ na: “We duzu owinɔ 'bu wa nalɛ ni, mi 'dángá sɛ le gɔ.”

³⁰ Nɛ Abrahama tɔ̃ 'bɔ na: “Aa NWA 'da mi, da dɛ kɔ zã mɔ nɔ̃́lɔ̃́ gɔ, we kɛ mi nɛ aka 'bɔ mbé nɛ. Kɔ fala kɛ wa kpa Owi bɔlɔ zu 'bu wa talɛ iko ni?” Nɛ Gale gese na: “Wa kpa wa 'bu wa talɛ, nɛ mi 'dángá sɛ le gɔ.”

³¹ Nɛ Abrahama tɔ̃ na: “Aa NWA, mɔ mbɔ́kɔ́ mi, mi nɛ tɔ̃ 'bɔ mbé nɛ, hã mɔ tɛ lènggè mi 'danga gɔ. Fala kɛ wa kpa tabi Owi bɔlɔ zu 'bu wa bɔa ni!” Nɛ Gale gese na: “We duzu owinɔ 'bu wa bɔa ni, mi 'dángá sɛ le gɔ.”

³² Nɛ Abrahama tɔ̃ 'bɔ na: “Aa NWA 'da mi, da dɛ kɔ zã mɔ nɔ̃́lɔ̃́ gɔ, hã mi aka 'bɔ mbé aka we kpo. Fala kɛ wa kpa Owele 'bu ni!” Nɛ Gale gese na: “We duzu owinɔ 'bu ni, mi 'dángá sɛ le gɔ.”

³³ NWA wila we do Abrahama ni do'do, nɛ a la, nɛ Abrahama kpolo tɛ̃ a dɛ nu tɔa tande 'da a i.