Ndo Nyanga Dɛ Mɔ 17 - WE NU GALE 1995

NWA Gale kpolo li Abrama na Abrahama

¹ Abrama ɔa zi sabɛlɛ 'bu nɛ kusi ngɔ nɛ kusi, nɛ NWA be tɛ̃ ɛ hã a, nɛ a tɔ̃ hã a na: “Mi a Gale kɛ mi do nganda vɛ̃. Mɔ dɛ mbula 'da mi, nɛ mɔ ɔ wi bɔlɔ zu fai.

² Mi gba sɛ tɔkɔ do mɔ, nɛ mi dɛ sɛ na, obe zã mɔ wa dɛlɛ wena.”

³ Abrama zila ní, nɛ a gu li a nù. Nɛ Gale tɔ̃ 'bɔ hã a na:

⁴ “Mɔ zɔ̃ gba tɔkɛ kɛ mi nɛ gba do mɔ gɛ ma kɛ: Mɔ sɛ a yaa nu kɔnggɔ gba gili Owele.

⁵ Wa sá sɛ 'bɔ li mɔ na Abrama gɔ. Li mɔ sɛ a Abrahama, we duzu kɛ mi dɛ sɛ na, mɔ hɔ baa nu kɔnggɔ gba gili Owele.

⁶ Obe zã mɔ wa dɛlɛ sɛ wena, nɛ wa hɔ sɛ gã nu kɔnggɔ Owele, nɛ ombe wa hɔ sɛ nwa.

⁷ “Gba tɔkɛ kɛ mi nɛ gba do mɔ gɛ, ma 'bana sɛ 'bana fai. Nɛ ma 'bana sɛ 'bɔ sanga tɛ ngba lɛ do obe zã mɔ gbaa kɔ sabɛlɛ do sabɛlɛ. Na mɛ ni, nɛ mi sɛ a Gale 'da mɔ, do obe zã mɔ olo mɔ gɛ fai.

⁸ Nɛ nù Kanana, kɛ mɔ ɔ ngɔ nɛ nɛ gɛnɛ gɛ, mi hã sɛ hã mɔ. Nɛ wele nɛ sɛ a mɔ́ mɔ do obe zã mɔ fai, nɛ mi sɛ a Gale 'da wa.”

Gɔnɔ gaza ma be gba tɔkɔ 'da Gale do Abrahama

⁹ Nɛ Gale tɔ̃ 'bɔ hã Abrahama na: “Ma wia 'bɔ na, mɔ, do obe zã mɔ, nɛ dɛ sɛ mbula ngɔ gba tɔkɛ gɛ kɔ sabɛlɛ do sabɛlɛ.

¹⁰ Nɛ mbula kɛ mi ia ngɔ mɔ do obe zã mɔ ni, ma kɛ: Wele vɛ̃ sanga nɛ, kɛ a a bulu be ni, a nɛ gaza.

^11-12 Nɛ gaza ni, ma be sɛ gba tɔkɛ sanga tɛ ngba nɛ do mi. Nɛ kɔ sabɛlɛ do sabɛlɛ fai, fala kɛ wa ko bulu be, kɔ 'do kula 'da a la tũ ngbɛ'dɛ'dɛ, nɛ wa gɔnɔ a do gaza. Nɛ nɛ dɛ sɛ 'bɔ ní do ngbánɔ kɛ wa kua wa dɛ ti nɛ ni, do wanɔ kɛ wa a nu fɛlɛ nɛ gɔ, nɛ nɛ usa wa usa ni.

¹³ Nɛ gɔnɔ sɛ wa vɛ̃, takɔ gba tɔkɛ 'da mi, ma ɔ nɛ dã kɛ nɛ gɔnɔ ma tɛ ndala tɛ nɛ, nɛ ma wè tɛ bisi nɛ gɔ fai ni.

¹⁴ Nɛ wi kɛ a nɛ̀ gaza gɔ ni, wa fo sɛ a sanga owinɔ 'da mi, we kɛ a dɛ̀ mbula gba tɔkɛ 'da mi gɔ.”

¹⁵ Nɛ Gale tɔ̃ 'bɔ hã Abrahama na: “Mɔ tɛ sà 'bɔ li wuke 'da mɔ na Sarai gɔ. Yolo do sɔɛ gɛ, mɔ sa sɛ li a na Sara.

¹⁶ Mi wele sɛ nu mi tɛ̃ a, nɛ a ko sɛ bulu be hã mɔ, nɛ a sɛ a naa nu kɔnggɔ Owele. Nɛ onwa ngɔ Owele kpi do kpi, wa yolo sɛ dɛ sanga obe zã a ni.”

¹⁷ Abrahama gu li a nù, nɛ a mɔmɔ, nɛ a tɔ̃ do kɔ sila a na: “Wa zɔa mbe na, wi kɛ a do sabɛlɛ kama kpo ni, nɛ a ko 'bɔ be nde? Nɛ Sara kɛ a do sabɛlɛ 'bu nɛ kusi ni, a we sɛ 'bɔ ko kula nde?”

¹⁸ Nɛ a tɔ̃ hã Gale na: “Mɔ kɔ̃́, nɛ mɔ lengge do Ismaɛlɛ, da dɛ kɔ a fé gɔ, kɔ a dungu olo mi.”

¹⁹ Nɛ Gale na: “Ma ni gɔ, wuke 'da mɔ Sara a ko sɛ bulu be hã mɔ, nɛ mɔ e sɛ li a na Izaka Nɛ mi dɛ sɛ na, gba tɔkɛ sanga tɛ mi do a do obe zã a, ma 'bana fai.

²⁰ Nɛ nde we duzu Ismaɛlɛ, mi zila ala nu 'da mɔ. Mi wele sɛ nu mi tɛ̃ a, nɛ mi dɛ sɛ na a ko, nɛ obe zã a wa dɛlɛ wena. A sɛ a baa onwa 'bu ngɔ wa bɔa, nɛ a sɛ 'bɔ a yaa gã nu kɔnggɔ Owele.

²¹ Nɛ nde we duzu gba tɔkɛ 'da mi, ma 'bana sɛ dɛ sanga lɛ do Izaka, be kɛ Sara a ko sɛ a hã mɔ kɔ sabɛlɛ kɛ ma tɛ 'do gɛ ni.”

²² 'Do kɛ Gale wila we do Abrahama do'do, nɛ a la.

²³ Nɛ do kpo kɔ̃ tũi ni, nɛ Abrahama ba bulu be 'da a Ismaɛlɛ, do ngbánɔ kɔ tɔa 'da a ni vɛ̃: owanɔ kɛ wa kua wa dɛ ti a, mba do owanɔ kɛ a usa wa usa ni, nɛ a gɔnɔ wa do gaza, ɔ nɛ kɛ Gale ba zi do nu ɛ hã a ni.

²⁴ 'Da fala kɛ Abrahama nɛa gaza ni, nɛ nde a zi do sabɛlɛ 'bu nɛ kusi ngɔ nɛ kusi,

²⁵ nɛ bulu be 'da a Ismaɛlɛ do sabɛlɛ 'bu ngɔ nɛ talɛ.

²⁶ Abrahama do Ismaɛlɛ wa nɛa gaza li wese kpo.

²⁷ Wa nɛa gaza ni fala nɛ kpo do Owi wilinɔ kɔ tɔa 'da a ni vɛ̃.