Ndo Nyanga Dɛ Mɔ 16 - WE NU GALE 1995

Agarɛ kua Ismaɛlɛ

¹ Sarai, kɛnɛ Abrama zi do wuko wi dɛa to mɔ́ a. Wuke ni a boko Ezipeto, li a a Agarɛ. Nɛ we duzu kɛ Sarai zɔa na, ɛ ko be hã Abrama gɔ ni,

² nɛ a tɔ̃ hã wili a na: “Mɔ ĩ na, NWA kɔ na, mi ko be gɔ. Kɔ ma wia na, mɔ mba ngɔ te do wuke wi dɛa toe 'da mi gɛ, nɛ mbe gɔ, nɛ a ko sɛ be hã mi.” Abrama zila we nu wuke 'da a ni, nɛ a kɔ̃ gɛnɛ nɛ.

³ Nɛ Sarai ba Agarɛ, wuke wi dɛa toe 'da a, nɛ a hã a hã wili a na, a ba a do kɛnɛ a. 'Da fala ni, nɛ nde Abrama ɔa zi ngɔ nù Kanana hɔa ngɔ sabɛlɛ 'bu ia.

⁴ Nɛ Abrama mba ngɔ te do Agarɛ, nɛ Agarɛ ba zã. Kɔ a nɛa we ĩ na ɛ ba zã ni, nɛ a ma ngɔ zɔ wele a Sarai li a yala.

⁵ Sarai nɛa we zɔ ni, nɛ a tɔ̃ hã Abrama na: “Mi kpa ngamɔ wena, nɛ ma yula ngɔ mɔ. Mɔ ĩ na, mi a mi fi zi wuke gɛ ngu'du mɔ, kɔ a nɛa we zɔ na a ba zã, nɛ nde a zɔ́ mi do dia li gɔ, nɛ mi 'bɔ do dĩ li a bina. Kɔ ma wia na, NWA gɔnɔ sanga we gɛ hã lɛ do mɔ.”

⁶ Nɛ Abrama gese hã a na: “Agarɛ a wi dɛa toe 'da mɔ, mɔ a wele a. Mɔ dɛ do a nɛ kɛ zã mɔ kɔ̃a ni.” Nɛ Sarai ma ngɔ hã ngamɔ hã Agarɛ ni gbaa, nɛ Agarɛ yu.

⁷ Nɛ anzɛ 'da NWA kpa a dɔ̃ɔ do nu lì tɛ li gba zɔ̃ɛ si li wala le Surɛ.

⁸ Nɛ anzɛ aka a na: “Agarɛ, wi dɛa to 'da Sarai, mɔ yula do nde? Nɛ mɔ nɛ do nde?” Nɛ Agarɛ gese na: “Mi yu wele mi Sarai.”

⁹ Nɛ anzɛ tɔ̃ na: “Mɔ kpolo tɛ mɔ dɛ 'da wele mɔ i, nɛ mɔ dɛ mbula 'da a.

¹⁰ NWA a dɛ sɛ na, obe zã mɔ wa dɛlɛ wena, nɛ wele wé sɛ we tɔlɔ wa gɔ.

¹¹ Mɔ ko sɛ bulu be, nɛ mɔ e li a na Ismaɛlɛ. Mba gɔ, NWA zɔa 'bakoe 'da mɔ.

¹² Be 'da mɔ, a ɔ sɛ nɛ punda zamɔ ni. A kɔ sɛ gɛnɛ wele gɔ, nɛ wele kɔ̃ sɛ tɛ mɛ 'bɔ gɛnɛ a gɔ. A ɔ sɛ dɛ kɛ zã onya a zu a kpo, nɛ nde a mbá sɛ ngba a do wa gɔ.”

¹³ Nɛ Agarɛ aka tɛ̃ ɛ na: “Mi zɔa Gale kpaa nde? Nɛ a lengge mi lingga nde?” Nɛ a ia li zu NWA, kɛ a wila we hã a ni na: “Mɔ a Gale kɛ mɔ zɔ mi zɔa!”

¹⁴ Gulu nɛ hã wa sa li nu kɔ̃ lì ngbala le Kadɛsɛ do Berɛdɛ ni na, Lahai-Roi. Gulu nɛ na: “Nu kɔ̃ lì 'da Gale, wele kpasi, kɛ a zɔ mi zɔa.”

¹⁵ Agarɛ kua bulu be, nɛ baa a Abrama e li a na Ismaɛlɛ.

¹⁶ Do ngba soe kɛ Agarɛ kua bulu be 'da a ni, nɛ nde Abrama do sabɛlɛ 'bu nɛ ngbɛ'dɛ'dɛ ngɔ nɛ gazɛlɛ.