Ndo Nyanga Dɛ Mɔ 15 - WE NU GALE 1995

NWA Gale gba tɔkɔ do Abrama

¹ 'Do ki ni, nɛ NWA bia tɛ̃ ɛ hã Abrama, nɛ a tɔ̃ hã a na: “Abrama, mɔ tɛ dɛ̀ kili gɔ. Mi zɔ sɛ mɔ tɛ mɔ, nɛ mi hã sɛ dia mɔ hã mɔ, we si olo kɛ mɔ gbini zã mɔ do mi ni.”

^2-3 Nɛ Abrama gese na: “Aa NWA Gale 'da mi, gulu hã dia mɔ hã mi na ge nde? Mi do be zã mi bina. Mi fe, nɛ wi nɛ dungu sɛ ngɔ mɛnɔ olo mi, wi a Eliezɛrɛ, mbe kpo kɔ owi dɛa tonɔ 'da mi, kɛ a a wi kɔ le Damasi ni iko.”

⁴ Nɛ NWA tɔ̃ 'bɔ hã a na: “Ma na mɛ ni gɔ! Eliezɛrɛ dúngú sɛ ngɔ mɛnɔ olo mɔ gɔ. Wele mɛnɔ ni sɛ a mɔ́ be kala zã mɔ ngboo.”

⁵ Nɛ 'do ki ni, nɛ NWA tɔ̃ hã Abrama na, a hɔ kɔ tɔa tande dɛ nza. A nɛa we hɔ nɛ, nɛ NWA tɔ̃ hã a na: “Mɔ bá li mɔ ngɔ, hã mɔ zɔ sɔlanɔ, tabi mɔ we sɛ we tɔlɔ ma nde? Nɛ nde obe zã mɔ wa dɛlɛ sɛ ɔ nɛ sɔlanɔ kɛ wele wè tɛ tɔlɔ ma gɔɛ ni.”

⁶ Abrama zila ní, nɛ a kɔ̃a, nɛ a gbini zã a do NWA. We duzu ma, nɛ NWA ba a na, a a wi bɔlɔ zu.

⁷ Nɛ a tɔ̃ hã a na: “Mi a NWA! Wi a mi kɛ mi ba zi mɔ kɔ le 'da mɔ Urɛ tɛ ngɔ nù Babilonia, nɛ mi tɛa do mɔ dɛ ngɔ nùi gɛ, takɔ mi hã ma hã mɔ do mɔ mɔ ni.”

⁸ Nɛ Abrama aka na: “Aa NWA, mi nɛ dɛ fala ĩ na, nùi gɛ a mɔ mi ni nɛ nde?”

⁹ Nɛ NWA gese na: “Mɔ bá be ngɔmbɔ, do naa dua, do wili bata, kɛ wa do sabɛlɛ talɛ talɛ ni, nɛ mɔ mbá 'bɔ do gbakulĩ do be pizɔ̃, kɔ mɔ tɛ do wa hã mi.”

¹⁰ Abrama kala sa'denɔ ni, nɛ a gba sanga wa dɛ gbogbo, nɛ a la nɔɛnɔ do kili nɛ. 'Do nɛ, nɛ a a 'bili sa'denɔ ni do lɔnggɔ nɛ, nɛ ma ka mɔ dɛ li ngbɛ ɛ bɔa bɔa.

¹¹ Nɛ oganakele wa ala we gɔmɔ wɔlɔ sa'denɔ ni, nɛ Abrama ndaka wa.

¹² Wese ma ngɔ gɛ̃ nɛ, nɛ Abrama te do yala, nɛ yalɛ tɔ̃ zu a, nɛ kili ba a wena.

¹³ Nɛ NWA tɔ̃ hã a na: “Abrama, mɔ ĩ̀ na, obe zã mɔ wa kulu sɛ dɛ ngɔ nùi 'da ogele wele, nɛ i mɔ, wa sɛ a ogɛnɛ. Wa kala sɛ wa do ngbá, nɛ wa e sɛ mbula ngɔ wa 'do sabɛlɛ kama nalɛ.

¹⁴ Nɛ mi hã sɛ etumbu hã owinɔ kɛ wa kala wa do ngbá ni. Nɛ obe zã mɔ wa kulu sɛ ngɔ kɔ le ni, nɛ wa si sɛ do gba gili kpamɔ wena.

¹⁵ Kɛ 'da mɔ, mɔ ɔ sɛ gbaa, nɛ tũi 'da mɔ ma we, nɛ mɔ fe fio tɔa, nɛ wa mi mɔ.

¹⁶ Nɛ nde obe zã mɔ, wa ɔ sɛ i mɔ gbaa, hã wa kala okanggadɔkɔ wa, sɛ nɛ wa ĩ ti kpolo tɛ wa dɛ i nga de. We duzu kɛ 'dã mɛ 'da Oamori ma tɛ gã̀ wena do kɛ na, mi ndaka wa ngɔ nùi 'da wa gɔ.”

¹⁷ Wese gɛ̃a, kɔ tũi tũ mbĩi, nɛ mbe mɔ kpo ɔ nɛ furu ni, ma kpe do zɛ̃ we mba do nyɛa we, nɛ ma la do sanga ofia sa'denɔ kɛ wa gba sanga wa ni.

¹⁸ Do ngba soe ni, nɛ NWA gba tɔkɔ do Abrama, nɛ a na: “Mi hã sɛ nùi gɛ hã obe zã mɔ, yolo tɛ nu fua lì ngɔ nù Ezipeto, gbaa we hɔ tɛ nu gba lì Efratɛ.

¹⁹ Mɛ a nùi 'da Okeni, Okɛnizi, Okadmɔni,

²⁰ Ohiti, Opɛrizi, Orɛfa,

²¹ Oamori, Okanana, Ogirgasi do Oyebuzi.”