Ndo Nyanga Dɛ Mɔ 14 - WE NU GALE 1995

Abrama gɔnɔ zu Lɔtɛ

¹ Do ngba soe ni, nɛ mbe onwa nalɛ zi boe. Wi a: Amarafɛlɛ tɛ kɔ le Mezopotami, Ariɔkɛ tɛ kɔ le Ɛlasarɛ, Kɛdɔrɛ-Laomɛrɛ tɛ kɔ le Elamɛ, do Tidalɛ tɛ kɔ le Goimɛ.

² Wa zi tɛ bi bolo do ogele nwa mɔlɔ. Onwanɔ mɔlɔ ni wi a: Bera tɛ kɔ le Sodɔmɛ, Birka tɛ kɔ le Gomɔrɛ, Sinabɛ tɛ kɔ le Adma, Semebɛrɛ tɛ kɔ le Sɛbɔimɛ, do nwa tɛ kɔ le Bela, kɛ wa sa 'bɔ li ma na Soarɛ ni.

^3-4 Onwanɔ mɔlɔ ni, wa ɔa zi ti mbula 'da nwa Kɛdɔrɛ-Laomɛrɛ gbaa 'do sabɛlɛ 'bu ngɔ nɛ bɔa. Kɔ ma nɛa we hɔ tɛ sabɛlɛ kɛ 'bu ngɔ nɛ talɛ, nɛ wa bɛ̃a zi we hã a. Nɛ wa mba ngba wa kɔ gbangɔlɛ̃ tɛ Sidimɛ, kɛ sɔɛ gɛ Ndɔ Fio gbini dɛ kɔ nɛ ni.

⁵ Ma nɛa we hɔ tɛ sabɛlɛ kɛ 'bu ngɔ nɛ nalɛ, nɛ nwa Kɛdɔrɛ-Laomɛrɛ do Onwanɔ kɛ a dɛa zi na do wa ni, wa lia wala we bi Onwanɔ mɔlɔ ni. Wa nɛa, nɛ wa bi Orɛfa, tɛ kɔ le Asɛtarɔtɛ-Karnaimɛ, do Ozuzi, tɛ kɔ le Hamɛ, do Oemi, tɛ ngɔ mbɛ nùi tɛ Kiriataimɛ.

⁶ Nɛ wa nɛ 'bɔ, nɛ wa bi Ohori dɛ ngɔ okalanɔ 'da wa tɛ Edɔmɛ, nɛ wa ndaka wa gbaa tɛ kɔ le Ɛlɛ-Paranɛ, kɛ ma kɔlɔ dɔ̃ɔ do li gba zɔ́ i ni.

⁷ Wa ia wa i mɔ do'do, nɛ wa kpolo tɛ wa dɛ tɛ le Ɛnɛ-Mikɛpatɛ, kɛ sɔɛ gɛ wa sa li nɛ na Kadɛsɛ, nɛ wa ba nùi 'da Oamalɛkɛ vɛ̃, nɛ wa bi 'bɔ Oamori kɛ wa ɔ tɛ kɔ le Hasasoni-Tamarɛ.

⁸ Nɛ Onwanɔ mɔlɔ ni wa ngɛmɛ sodanɔ 'da wa, nɛ wa la do wa dɛ kɔ gbangɔlɛ̃ tɛ Sidimɛ i,

⁹ we bi Onwanɔ nalɛ ni.

¹⁰ Nɛ nde kɔ gbangɔlɛ̃ tɛ Sidimɛ ni, nu kɔ gili dɛlɛ zi di ni wena. Nɛ onwa Sodɔmɛ do Gomɔrɛ wa yu, nɛ wa te kɔ kɔ̃nɔ ni. Nɛ tala wanɔ talɛ ni, wa yu dɛ ngɔ kalanɔ i.

¹¹ Nɛ Onwanɔ nalɛ ni wa e kɔ wa ngɔ omɛnɔ 'da owinɔ tɛ Sodɔmɛ do Gomɔrɛ, do onyɔngɔmɛnɔ 'da wa vɛ̃, nɛ wa kala ma si nɛ.

¹² Nɛ wa ba 'bɔ Lɔtɛ, be olo nya Abrama, nɛ wa si do a, mba do omɛnɔ 'da a vɛ̃, we duzu kɛ Lɔtɛ ɔ zi tɛ Sodɔmɛ.

¹³ Mbe wele kpo yu bole, nɛ a hɔ 'da Abrama kɛ a a be Hebre ni, nɛ a tɔ̃ sako bole ni hã a. 'Da fala ni, nɛ nde Abrama zĩ zi tɔa tande 'dɛ ɛ dɛ ti ote sɛnɛnɔ 'da Mamre, be Amori ni. Mamre a nya Ɛsɛkɔlɛ do Anɛrɛ. Owi wilinɔ talɛ ni wa dɛa zi na do Abrama.

¹⁴ Abrama nɛa we zele na, wa ba be olo nya a ni, nɛ a saka sanga Owi dɛa tonɔ 'da a kɛ wa kua wa kɔ tɔa 'da a ni, nɛ a kala wa Owi wili kama talɛ do 'bu ngɔ nɛ ngbɛ'dɛ'dɛ, nɛ a la do wa, nɛ a 'bã 'do Onwanɔ nalɛ ni gbaa tɛ Danɛ.

¹⁵ Wa hɔa i mɔ, nɛ Abrama gɔnɔ sanga Owi bolonɔ 'da a do ngɔ gili wa tɛ̃ ɛ do tɛ̃ ɛ. Ma nɛa we hɔ do tũi, nɛ owi bolonɔ 'da Abrama wa bi Onwanɔ nalɛ ni, nɛ wa ndaka wa gbaa, nɛ wa e wa tɛ le Hoba, kɛ ma do 'do le Damasi do si gbãlã ngɔ.

¹⁶ Wa ndaka Onwanɔ ni do'do, nɛ Abrama kala mɛnɔ kɛ wa kala zi kɔ̃ owi Sodɔmɛ do Gomɔrɛ ni, nɛ a si do ma. Nɛ a si 'bɔ do Lɔtɛ, be olo nya a, do omɛnɔ 'da a, do owukonɔ, do ombe winɔ, kɛ wa kala zi wa li bole ni.

Mɛlkisedɛkɛ wila nu ɛ tɛ Abrama

¹⁷ Abrama yula kɔlɔ bole a bi, nɛ a nɛ ngɔ nwa Kɛdɔrɛ-Laomɛrɛ do Onwanɔ kɛ wa mba zi do a ni, kɔ a tɛ si ma, nɛ nwa kɔ le Sodɔmɛ gɔnɔ dati a. Nɛ wa kpa ngba wa kɔ gbangɔlɛ̃ tɛ Kave kɛ gulu nɛ na: “Gbangɔlɔ̃ 'da Nwa” ni.

¹⁸ Nɛ Mɛlkisedɛkɛ, nwa ngɔ nù Salɛmɛ, gɔnɔ 'bɔ dati Abrama. Mɛlkisedɛkɛ zi tɛ mɛ 'bɔ a nganga 'da Gale, kɛ a nɛa ngɔ mɔ vɛ̃ ni. Mɛlkisedɛkɛ tɛa do mapa do dɔ̃ hã Abrama,

¹⁹ nɛ a wele nu a tɛ̃ a, nɛ a tɔ̃ na: “Gale kɛ a nɛa ngɔ mɔ vɛ̃, kɛ a dɛa li nza do nù, a wélé nu a tɛ mɔ.

²⁰ Lɛ dɔ́nggɔ́ Gale kɛ a nɛa ngɔ mɔ vɛ̃, kɛ a ia owi sɛnɛ mɔ dɛ kɔ̃ mɔ, nɛ mɔ nɛa ngɔ wa ni.” Nɛ Abrama kala kpo mbee 'bu kɔ mɛnɔ vɛ̃ kɛ a kala ma li bole ni, nɛ a hã ma hã a.

²¹ Nɛ nwa kɔ le Sodɔmɛ tɔ̃ hã Abrama na: “Mɔ gésé owinɔ 'da mi hã mi, nɛ mɔ 'báná do omɛnɔ vɛ̃ kɛ mɔ kala ma ni.”

²² Nɛ Abrama gese hã a na: “Mi kala kɔ̃ mi dɛ ngɔ we zonggo tɛ mi dati NWA Gale, kɛ a nɛa ngɔ mɔ vɛ̃, nɛ a dɛa li nza do nù ni na,

²³ mi 'bé sɛ tɛ gbãlã mɔ mɔ́ mɔ kpo gɔ. Gɛnɛ kɔ fɛlɛ 'busu tabi fɛlɛ ngɔ mɔ nyanga wi, mi 'bé sɛ tɛ nɛ gɔ, da dɛ kɔ mɔ tɔ̃́ na, Abrama hɔa wi kpamɔ we duzu ɛ gɔ.

²⁴ Mi 'bé sɛ tɛ mɔ kpo gɔ, ma 'bana sɛ tati a mɛnɔ kɛ owinɔ 'da mi wa nyɔngɔ ma ni iko. Kɔ mɔ la ongba mi Anɛrɛ do Ɛsɛkɔlɛ do Mamre kɛ lɛ nɛa bole do wa ni, hã wa kala mbe tɛ mɛnɔ lɛ kala ma li bole i ni, hã wa si nɛ do mɔ́ wa.”