Ndo Nyanga Dɛ Mɔ 13 - WE NU GALE 1995

Abrama do Lɔtɛ wa gɔnɔ sanga tɛ ngba wa

¹ 'Do nɛ, nɛ Abrama kulu ngɔ tɛ Ezipeto, nɛ a ba wuke 'da a, nɛ a kala mɛnɔ 'da a vɛ̃, nɛ a la si tɛ li gba zɔ̃ Negɛvɛ. Nɛ Lɔtɛ la fala nɛ kpo do a.

² Abrama zi do kpamɔ wena. A zi do onadalamɔ kpi do kpi, nɛ a 'bɔ do mɔ mbali do fɛ̃a mɔ bolo.

³ A kulu ngɔ, nɛ a la we si dɛ tɛ Betɛlɛ. Nɛ a ɔa tɛ dala sa'denɔ 'da a dɛ sanga wala gɛ gbaa, nɛ a hɔ tɛ fala kɛ ma sanga le Betɛlɛ do Ai,

⁴ kɛ a ɔa zi se'de dati, nɛ a dɛ zi gbagala do ta we dɔ do sa'de hã Gale ni. A hɔa di ni, nɛ a dɔnggɔ Gale.

⁵ Lɔtɛ kɛ a zi fala nɛ kpo do Abrama ni, zi 'bɔ do onadalamɛnɔ 'da a: obata, odua, do ongɔmbɔ. Nɛ a zi tɛ mɛ 'bɔ do otɔa tande kɛ ma sakata a ni boe.

^6-7 Nɛ nde 'bili tɛ nùi ni ma gã̀ we do kɛ na, wa mba li ngba wa, nɛ wa ɔ fala nɛ kpo gɔ. We kɛ wa zi do onadalamɔ dɛlɛ wena. Nɛ dɛ ngɔ nɛ, Okanana do Opɛrizi wa ɔ zi 'bɔ dɛ di ni. Na mɛ ni, nɛ mɔ̃lã hɔa sanga owi dala sa'denɔ 'da Abrama do wanɔ 'da Lɔtɛ.

⁸ Nɛ Abrama tɔ̃ hã Lɔtɛ na: “Lɛ do mɔ, lɛ a nu fɛlɛ kula kpo iko. Kɔ ma wè na, mɔ̃lã hɔ ngbala lɛ, tabi ngbala owi fɔmɔ nadalamɛnɔ 'da lɛ gɔ.

⁹ Nùi ma gã wena, nɛ ma vɛ̃ a dɛ kɔ̃ mɔ. Lɛ gɔ́nɔ́ sanga tɛ ngba lɛ. Fala mɔ lá si gbãlã ngɔ nde, nɛ mi la sɛ si ba gɔtɔ. Kɔ tabi mɔ lá si ba gɔtɔ nde, nɛ mi la sɛ si gbãlã ngɔ.”

¹⁰ Nɛ Lɔtɛ ka mɔ, nɛ a zɔ nùi tɛ nu lì Yɔrdanɛ, nɛ nde nùi ma tũ de wena. Ĩ na, dati kɛ na NWA 'danga le Sodɔmɛ do Gomɔrɛ ni, nù Yɔrdanɛ gbaa we hɔ tɛ Soarɛ, ma ɔ zi nɛ fɔ Edɛnɛ ni.

^11-12 Lɔtɛ zɔa ní, nɛ a saka nùi kɛ zã nu lì Yɔrdanɛ, nɛ wa gɔnɔ sanga tɛ ngba wa. Abrama 'bana dɛ tɛ Kanana ni, nɛ Lɔtɛ la si 'biti gba wese, nɛ a zĩ otɔa tandenɔ 'da a dɔ̃ɔ do le Sodɔmɛ.

¹³ Nɛ nde i mɔ ni, dɛa mɔ tɛ winɔ kɔ le Sodɔmɛ ma dè zi gɔ. Wa dɛ zi 'dã mɔ dɛ 'da NWA wena.

¹⁴ Fala kɛ Lɔtɛ la, nɛ NWA tɔ̃ hã Abrama na: “Mɔ yóló dɛ fala ti mɔ gɛ, hã mɔ ba li mɔ ngɔ, hã mɔ ka mɔ kɛ zã mɔ zĩ takpa. Mɔ ka mɔ si gbãlã ngɔ, si ba gɔtɔ, si 'biti gba wese, do si 'biti gɛ̃a wese.

¹⁵ Nùi kɛ mɔ zɔ ma vɛ̃ ni, mi hã sɛ ma hã mɔ do obe zã mɔ, nɛ mɛ sɛ a nùi 'da wa fai.

¹⁶ Mi dɛ sɛ na, obe zã mɔ wa dɛlɛ ɔ nɛ gbãlã kɛnzɛnɔ ngɔ nù gɛ. Ɔ nɛ kɛ wele wè tɛ tɔlɔ gbãlã kɛnzɛnɔ ngɔ nù gɛ gɔ ni, wele wé sɛ tɛ mɛ 'bɔ we tɔlɔ obe zã mɔ gɔ.

¹⁷ Mɔ nɛ́, hã mɔ bá 'da nùi gɛ vɛ̃ hã mɔ zɔ́, we kɛ mi hã sɛ ma hã mɔ.”

¹⁸ Abrama kulu ngɔ, nɛ a la, nɛ a zĩ otɔa tandenɔ 'da a dɛ ti ote sɛnɛnɔ 'da Mamre, dɔ̃ɔ do le Hebroni, nɛ a dɛ gbagala do ta dɛ di ni we dɔ do sa'de hã NWA.