Ndo Nyanga Dɛ Mɔ 12 - WE NU GALE 1995

NWA Gale sa mɔ hã Abrama

¹ Nɛ NWA tɔ̃ hã Abrama na: “Mɔ kúlú ngɔ, kɔ mɔ la le 'da mɔ, do nu fɛlɛ kula 'da mɔ, do nu tɔa 'da baa mɔ, hã mɔ la si tɛ le kɛ mi nɛ be ma hã mɔ ni.

² Mi dɛ sɛ na, obe zã mɔ wa dɛlɛ, nɛ wa hɔ gã nu kɔnggɔ wele. Nɛ mi wele sɛ 'bɔ nu mi tɛ mɔ na, sako li mɔ dɔ̃lɔ̃, nɛ tala gele winɔ wa kpa sɛ wila nu we duzu mɔ.

³ Wi kɛ a wele nu a tɛ mɔ, nɛ mi wele sɛ nu mi tɛ̃ a. Wele fɔmbɔ mɔ, nɛ mi fɔmbɔ sɛ a. Mi wele sɛ nu mi tɛ nu kɔnggɔ winɔ ngɔ nù gɛ vɛ̃ we duzu mɔ.”

⁴ Nɛ Abrama kulu ngɔ, nɛ a la le Haranɛ ɔ nɛ kɛ NWA ba do nu ɛ hã a ni. Do 'da fala ni, nɛ nde a zi do sabɛlɛ 'bu nɛ sambo ngɔ nɛ mɔlɔ.

⁵ A nɛa we la nɛ, nɛ a la fala nɛ kpo do wuke 'da a Sarai, do Lɔtɛ, be olo nya a. Nɛ wa kala kpamɛnɔ 'da wa vɛ̃, do ongbánɔ kɛ wa usa wa ni, nɛ wa la do wa si tɛ ngɔ nù Kanana. Wa hɔa i mɔ,

⁶ nɛ wa kpa Okanana tɛ ngɔ nùi ni. Wa ba 'da nù Kanana ni gbaa, nɛ wa hɔ ti gba te sɛnɛ kɛ winɔ wa dɔnggɔ ogalenɔ ti nɛ ni. Te ni, ma zi tɛ mbe fala li nɛ a More, kɔlɔ dɔ̃ɔ do le Sikɛmɛ.

⁷ Nɛ NWA bia tɛ̃ ɛ hã Abrama, nɛ a tɔ̃ hã a na: “Kɛ gɛ mɛ a nùi kɛ mi hã sɛ ma hã obe zã mɔ.” Abrama zila ni, nɛ a kala ta, nɛ a dɛ gbagala dɛ di ni we dɔ do sa'de hã NWA, kɛ a bia tɛ̃ a hã a ni.

⁸ 'Do ki ni, nɛ Abrama kulu ngɔ di ni, nɛ a la si ngɔ kalanɔ kɛ mɔ yolo Betɛlɛ, nde ma si 'biti gba wese ni. Nɛ a dɛ fala ɔi 'da a dɛ ngbala le Betɛlɛ do Ai. Nɛ a dɛ 'bɔ gbagala do ta dɛ fala ni, we dɔ do sa'de hã NWA, nɛ a dɔnggɔ a.

⁹ 'Do ki ni, nɛ Abrama kulu 'bɔ fala ni, nɛ a la dɛ dati tɛ mɛ ní do ní gbaa we nɛ dɛ tɛ li gba zɔ̃ Negɛvɛ.

Abrama la dɛ tɛ ngɔ nu Ezipeto

¹⁰ Nɛ gba wɔ tia ngɔ nùi, nɛ ma ba nganda wena. Abrama zɔa ni, nɛ a la dɛ tɛ Ezipeto, takɔ a ɔ mbe di ni.

¹¹ Wa hɔa li ngbala nùi we le dɛ Ezipeto i, nɛ Abrama tɔ̃ hã wuke 'da a Sarai na: “Mɔ zɔ́, mi ĩ na mɔ de zɔnga wena.

¹² Fala kɛ Oezipeto wa zɔ mɔ, nɛ wa tɔ̃ sɛ na, mɔ a wuke 'da mi, nɛ wa gbɛ sɛ mi, nɛ wa la mɔ.

¹³ Kɔ mɔ tɔ̃ hã wa na, mɔ a be zɔnga nya mi, nɛ nde wa gbɛ sɛ mi gɔ, nɛ wa dɛ sɛ de mɔ hã mi we duzu mɔ.”

¹⁴ Wa nɛa we hɔ Ezipeto i, nɛ Oezipeto wa zɔ wuke 'da Abrama, nɛ nde a de zɔnga wena.

¹⁵ Nɛ ombe gã wi ngɔ owi dɛa tonɔ 'da nwa ngɔ nù Ezipeto wa zɔa a, nɛ wa nɛ, nɛ wa ɔngbɔ zɔnga 'da a hã nwa 'da wa. Wa tɔa ni do'do, nɛ wa ba a, nɛ wa la do a dɛ kɔ tɔa 'da nwa i.

¹⁶ Nɛ nwa bia dia zã hã Abrama we duzu Sarai. Nɛ a hã obata, do odua, do ongɔmbɔ, opunda, osamo do owi dɛa to hã a.

¹⁷ Nɛ NWA Gale tumba zi gã ngamɔ hã NWA ngɔ nù Ezipeto, do nu fɛlɛ kula 'da a, we duzu Sarai, wuke 'da Abrama kɛ a ba a ni.

¹⁸ Nwa ngɔ nù Ezipeto nɛa we zɔ ní, nɛ a sa mɔ hã Abrama, nɛ a aka a na: “Gulu kɛ mɔ dɛa do mi ni we ge nde? Gulu kɛ mɔ tɔ̃a na, a a wuke 'da mɔ gɔ,

¹⁹ nɛ nde a a boko nya mɔ, hã mi ba a do wuko we ge nde? Mɔ zɔ, wuke 'da mɔ a hɛ̃, mɔ bá a hã mɔ lá.”

²⁰ Nɛ a ba nu a na, wa kã Abrama do wuke 'da a do mɛnɔ 'da a vɛ̃, hã wa la ngɔ nùi 'da ɛ do'do.