Ndo Nyanga Dɛ Mɔ 11 - WE NU GALE 1995

Gba ngala tɔa kɔ le Babɛlɛ

¹ Do 'da fala ni, lɛnggɛ nu winɔ zi vɛ̃ kpo, nɛ gɔnɔ sanga we nu wa zi bina.

² Owinɔ wa yɛnggɛ zi si 'biti gba wese, nɛ wa hɔ ngɔ mbe mbɛ nù tɛ Mezopotami, nɛ wa dɛ tɔa di ni.

³ Nɛ wa tɔ̃ dɛ ngbala ngba wa na: “Lɛ nɛ, lɛ zɛ biliki, hã lɛ dɔ ma.” Wa dɔa bilikinɔ ni do'do, nɛ wa kala ma, nɛ wa dɛ do tɔa, nɛ wa fa ondaka we nãlã do bilikinɔ ni dɛ tɛ ngbɛ ɛ.

⁴ Nɛ wa na: “Lɛ dɛ le, nɛ lɛ dɛ ngala tɔa kɔ nɛ, nɛ sɔti zu nɛ to li nza. Na mɛ ni, nɛ sako li lɛ ma dɔ̃lɔ̃ sɛ, nɛ lɛ pɛsɛ sɛ do ngɔ nùi vɛ̃ gɔ.”

⁵ Nɛ NWA yula li nza i, nɛ a zĩlĩ nù nga we zɔ le do gba ngala tɔa kɛ winɔ wa tɛ dɛ ma ni.

⁶ A zɔa ma, nɛ a tɔ̃ na: “Nɛ zɔ owinɔ gɛ vɛ̃ a Owele kpo, nɛ lɛnggɛ nu wa kpo. Nɛ kɛ gɛ a kuti dɛa mɛ 'da wa. Kɔ fala kɛ lɛ e wa ni, kɔ 'do gɛ hã wa dɛ mɔ ia, nɛ fo sɛ wala we amba wa bina.

⁷ Lɛ nɛ, hã lɛ kpolo lɛnggɛ nu wa, nɛ lɛ dɛ na, wa tɛ zèlè 'bɔ ngba wa gɔ.”

⁸ NWA dɛa na mɛ ni, nɛ a pɛsɛ wa ndã ndã do ngɔ nù gɛ, nɛ wa wè zi 'bɔ we dɛ le ni gɔ.

⁹ Ma kɛ wa sa li le ni na Babɛlɛ, gulu nɛ na: “Vĩ zu lɛnggɛ.” Mba gɔ, NWA kpula lɛnggɛ nu owinɔ. Nɛ yolo do fala ni, a pɛsɛ wa do nyanga nza vɛ̃.

Li oyaa winɔ yolo tɛ Sɛmɛ gbaa we hɔ tɛ Abrama

¹⁰ Nɛ zɔ́ li obe zã Sɛmɛ. 'Do gba hɛ̃a lì ni ma la sabɛlɛ bɔa, nɛ nde Sɛmɛ zi do sabɛlɛ kama kpo, nɛ a ko bulu be, nɛ a e li a na Arpaksadɛ.

¹¹ 'Do kɛ Sɛmɛ kua Arpaksadɛ ni, nɛ a ɔa 'bɔ sabɛlɛ kama mɔlɔ, nɛ a ko 'bɔ mbé obulu be do oboko be.

¹² Arpaksadɛ ɔa 'bu sabɛlɛ talɛ ngɔ nɛ mɔlɔ, nɛ a ko bulu be, nɛ a e li a na Sela.

¹³ 'Do kula 'da Sela, nɛ Arpaksadɛ ɔa 'bɔ sabɛlɛ kama nalɛ do ngɔ nɛ talɛ. Nɛ a ko 'bɔ mbé obulu be do oboko be.

¹⁴ Sela ɔa 'bu sabɛlɛ talɛ, nɛ a ko Ebɛrɛ.

¹⁵ 'Do kula 'da Ebɛrɛ, nɛ Sela ɔa 'bɔ sabɛlɛ kama nalɛ do ngɔ nɛ talɛ. Nɛ a ko 'bɔ mbé obulu be do oboko be.

¹⁶ Ebɛrɛ ɔa 'bu sabɛlɛ talɛ ngɔ nɛ nalɛ, nɛ a ko Pelɛgɛ.

¹⁷ 'Do kula 'da Pelɛgɛ, nɛ Ebɛrɛ ɔa 'bɔ sabɛlɛ kama nalɛ do 'bu nɛ talɛ. Nɛ a ko 'bɔ mbé obulu be do oboko be.

¹⁸ Pelɛgɛ ɔa 'bu sabɛlɛ talɛ, nɛ a ko Reu.

¹⁹ 'Do kula 'da Reu, nɛ Pelɛgɛ ɔa 'bɔ sabɛlɛ kama bɔa do ngɔ nɛ kusi. Nɛ a ko 'bɔ mbé obulu be do oboko be.

²⁰ Reu ɔa 'bu sabɛlɛ talɛ ngɔ nɛ bɔa, nɛ a ko Sɛrugɛ.

²¹ 'Do kula 'da Sɛrugɛ, nɛ Reu ɔa 'bɔ sabɛlɛ kama bɔa do ngɔ nɛ sambo. Nɛ a ko mbé obulu be do oboko be.

²² Sɛrugɛ ɔa 'bu sabɛlɛ talɛ, nɛ a ko Nahɔrɛ.

²³ 'Do kula 'da Nahɔrɛ, nɛ Sɛrugɛ ɔa sabɛlɛ kama bɔa. Nɛ a ko mbé obulu be do oboko be.

²⁴ Nahɔrɛ ɔa 'bu sabɛlɛ bɔa ngɔ nɛ kusi, nɛ a ko Tera.

²⁵ 'Do kula 'da Tera, nɛ Nahɔrɛ ɔa 'bɔ sabɛlɛ kama do 'bu ngɔ nɛ kusi. Nɛ a ko 'bɔ mbé obulu be do oboko be.

²⁶ Tera ɔa 'bu sabɛlɛ sambo, nɛ a ko obe talɛ: Abrama, Nahɔrɛ do Haranɛ.

²⁷ Haranɛ kua be, nɛ a e li a na Lɔtɛ.

²⁸ Haranɛ fia dɛ kɔ le 'da a Urɛ kɛ ma tɛ ngɔ nù Babilonia, nɛ nde do ngba soe ni, baa a Tera 'bana zi nza.

²⁹ Abrama ba Sarai do wuko, nɛ Nahɔrɛ ba Milka, be 'da Haranɛ tɛ mɛ 'bɔ do wuko. Haranɛ zi 'bɔ a baa Iska.

³⁰ Nɛ nde Sarai zi do be bina, a zi a ndɔlɔ.

³¹ 'Do ki ni, nɛ Tera kulu ngɔ le 'da a Urɛ tɛ ngɔ nù Babilonia, nɛ a ba be 'da a, Abrama, do Lɔtɛ, be olo Haranɛ, fala nɛ kpo do konduka 'da a Sarai, wuke 'da Abrama. Nɛ wa ba wala kɛ ma ba dɛ tɛ Kanana. Wa nɛa ni gbaa, nɛ wa Sɔkpɔ tɛ le Haranɛ, nɛ wa 'bana dɛ di ni.

³² Tera ɔa sabɛlɛ kama bɔa do ngɔ nɛ mɔlɔ, nɛ a fe dɛ Haranɛ ni.