Ndo Nyanga Dɛ Mɔ 1 - WE NU GALE 1995

Gale dɛa li nza do nù

¹ Kuti kɛ kurr na, Gale ndo nyanga dɛ mɛnɔ vɛ ni, nɛ a dɛa li nza do nù.

² 'Biti nùi zɛ bina, nɛ fo gele mɔ zi ngɔ nɛ kpo bina. Tati a gã lì ma kpa zi do falanɔ vɛ, nɛ gba tũ kpia zi ngɔ lì ni vɛ. Nɛ Hi Gale yɛnggɛ zi do ngɔ gã lì ni.

³ Nɛ Gale tɔ̃ na: “Ma wia na, fala sa!” Nɛ fala sa.

⁴ Nɛ Gale zɔa na, sa fala ɛ dɛa ni, ma a dia. Nɛ a dɛa na, sa fala gɔnɔ sanga tɛ ngbɛ ɛ do tũ fala.

⁵ Nɛ a sa li sa fala na: “Gba wese”, nɛ a sa li tũ fala na: “Tũ.” Nɛ wese gɛ̃a, nɛ fala sa. Ki ni di a tũ kpo.

⁶ Nɛ Gale tɔ̃ 'bɔ na: “Ma wia na, ngɔ hɔ, hã ma bili ɔ nɛ ndumbe ni, takɔ ma gɔnɔ sanga lìnɔ do ngɔ gili nɛ bɔa.”

⁷ Nɛ ma dɛa tɛ ɛ ɔ nɛ kɛ a tɔa ni. Gale ia ngɔɛ ni na, ma gɔnɔ sanga lìnɔ kɛ ngɔ i do kɛnɔ ngɔ nù nga.

⁸ Nɛ a sa li ngɔɛ ni na: “Li nza.” Nɛ wese gɛ̃a, nɛ fala sa. Ki ni di a tũ bɔa.

⁹ 'Do ki ni, nɛ Gale tɔ̃ 'bɔ na: “Ma wia na, olìnɔ ngɔ nù gɛ vɛ ma ngɛmɛ ngbɛ ɛ dɛ fala kpo, takɔ nga nù ma hɔ.” Nɛ ma dɛa tɛ ɛ ɔ nɛ kɛ a tɔa ni.

¹⁰ Nɛ a sa li nga nùi ni na: “Nù”, nɛ a sa li lìnɔ ma ngɛma ngbɛ ɛ ni na: “Gba lì.” Nɛ a zɔa na, mɛnɔ ɛ dɛa ni, ma a dia.

¹¹ Nɛ Gale tɔ̃ na: “Ma wia na, okpalɛ do onwá Sanggo kpi do kpi ma hɔ ngɔ nù gɛ, mba do otenɔ kɛ ma wa wala ni, ma vɛ̃ do gbãlã nɛ kpo do kpo.” Nɛ ma dɛa tɛ̃ ɔ nɛ kɛ a tɔ̃a ni.

¹² Nɛ okpalɛ do onwá sanggo kpi do kpi ma hɔa ngɔ nù gɛ, mba do otenɔ kɛ ma do wala nɛ tɛ̃ ɛ do tɛ̃ ɛ, nɛ ma vɛ̃ do gbãlã nɛ kpo do kpo. Nɛ Gale zɔa na, mɛnɔ ɛ dɛa ni, ma a dia.

¹³ Nɛ wese gɛ̃a, nɛ fala sa. Ki ni di a tũ talɛ.

¹⁴ 'Do ki ni, nɛ Gale tɔ̃ 'bɔ na: “Ma wia na, omɔ kɛ ma nyɛ nyɛa ɔ nɛ yele ngbala ni, ma hɔ li nza, nɛ ma gɔnɔ sanga tũ do gba wese, nɛ ma be 'bɔ fala li ɛngganɔ, do kɔ̃ tũnɔ, do sabɛlɛnɔ,

¹⁵ nɛ ma to te li nza ngɔ i, nɛ ma yele dɛ ngɔ nù nga.” Nɛ ma dɛa tɛ̃ ɛ ɔ nɛ kɛ a tɔ̃a ni.

¹⁶ Nɛ Gale dɛa ogã nyɛa we bɔa. A dɛa wese na, ma to do gba wese, nɛ a dɛ zɛkɛ na, ma to do tũ, nɛ a dɛ 'bɔ osɔla.

¹⁷ A dɛa onyɛa wenɔ ni li nza ngɔ i na, ma yele dɛ ngɔ nù nga.

¹⁸ A dɛa ombe na ma yele do tũ, nɛ mbee nɛ do gba wese, we gɔnɔ sanga tũ do sa fala. Nɛ Gale zɔa na, mɛnɔ ɛ dɛa ni, ma a dia.

¹⁹ Nɛ wese gɛ̃a, nɛ fala sa. Ki ni di a tũ nalɛ.

²⁰ 'DO ki ni, nɛ Gale tɔ̃ 'bɔ na: “Ma wia na, nu kpala okɔyɔ kpi do kpi do sa'de lì, wa dunu 'dɔ lìnɔ. Nɛ ma wia 'bɔ na, onɔɛ wa bũlũ do li ngɔ i.”

²¹ Nɛ Gale dɛa nu kpala okɔyɔ kpi do kpi, do osɔ̃ sa'de lì, do onɔɛ kpi do kpi. Nɛ a zɔa na, mɛnɔ ɛ dɛa ni, ma a dia.

²² Nɛ a wele nu a te nɛ na: “Otunu li sa'denɔ 'do lì gɛ vɛ̃ wa kó, nɛ wa kpa 'do lìnɔ vɛ̃. Nɛ onɔɛnɔ wa kó, hã wa dɛlɛ.”

²³ Nɛ wese gɛ̃a, nɛ fala sa. Ki ni di a tũ mɔlɔ.

²⁴ 'Do ki ni, nɛ Gale to 'bɔ na: “Ma wia na, nu kpala osa'de tɛ̃ ɛ do tɛ̃ ɛ wa ɔ ngɔ nùi gɛ: osa'de zamɔ do onadalamɔ, ogã sa'de do obe nɛ.” Nɛ ma dɛa tɛ̃ ɛ ɔ nɛ kɛ a tɔ̃a ni.

²⁵ Gale dɛa ngɔ gili sa'de tɛ̃ ɛ do tɛ̃ ɛ: osa'de zamɔ do onadalamɔ, ogã sa'de do obe nɛ. Nɛ a zɔa na, mɛnɔ ɛ dɛa ni, ma a dia.

²⁶ 'Do ki ni, nɛ Gale to 'bɔ na: “Ma wia na, lɛ dɛ wele, nɛ a ɔ nɛ lɛ, nɛ a ba tɛlɛ te lɛ ngboo. Nɛ a dungu nwa ngɔ kɔyɔnɔ 'do lì gɛ, do onɔɛnɔ li ngɔ i, do sa'denɔ ngɔ nù gɛ, osa'de zamɔ do onadalamɛnɔ, ogã sa'denɔ do obe wanɔ.”

²⁷ Gale dɛa wele ɔ nɛ a ni, nɛ a ba tɛlɛ tɛ̃ a ngboo. A dɛa wi wili, nɛ a dɛ wuko. A dɛa wa do'do,

²⁸ nɛ a wele nu a tɛ wa, nɛ a to na: “Nɛ kó, takɔ nɛ dɛlɛ, hã nɛ yɛ'bɛ ngɔ nùi, nɛ nùi ma ɔ do mɔ nɛ. Nɛ nɛ ɔ́ nwa ngɔ mɛnɔ vɛ, ngɔ okɔyɔnɔ 'dɔ lì i, do onɔɛnɔ li ngɔ i, do osa'denɔ ngɔ nù gɛ vɛ̃.”

²⁹ Nɛ 'do ki ni, nɛ a tɔ̃ 'bɔ na: “Okpalɛnɔ vɛ kɛ ogbãlã nɛ boe, nɛ otenɔ kɛ ma wa wala ni, ma hɔ ngɔ nù gɛ. Nɛ gbãlã kpalɛnɔ do wala tenɔ ni, ma sɛ a nyɔngɔmɔ we duzu nɛ.

³⁰ Nɛ wɔkɔsɔnɔ kɛ ma 'bɔ 'bɔa ni, mɛ a nyɔngɔmɛ 'da onɔɛnɔ do osa'denɔ ngɔ nù gɛ vɛ, ogã wanɔ do obe wanɔ.” Nɛ ma dɛa tɛ ɛ ɔ nɛ kɛ a tɔ̃a ni.

³¹ Gale zɔa na, mɛnɔ vɛ kɛ ɛ dɛa ma ni, ma a dia ngboo. Nɛ wese gɛ̃a, nɛ fala sa. Ki ni di a tũ gazɛlɛ.