GBA WENƆ 9 - WE NU GALE 1995

Wi hãzã do wi bi gbãlã zã

¹ Hãzã ɔ nɛ wuko kɛ a dɛa tɔa 'da a do bɛlɛduma sambo.

² A gbɛa sa'de, nɛ a dɛ dɔ̃, nɛ a 'dafa mɛsa we dɛ mɔ dɔ.

³ Nɛ a tombo owuko wi tonɔ 'da a na, wa nɛ, kɔ wa yolo dɛ ngɔ kusu falanɔ tɛ gbogbo le, nɛ wa he mɔ na:

⁴ “Aa nɛ winɔ kɛ li nɛ ĩ̀ mɔ gɔ, do nɛ Owi zɔlɔ hã zã, nɛ wɛ́lɛ́ tɛ nɛ dɛ i nga!

⁵ Nɛ tɛ́, hã nɛ dungu nù, kɔ nɛ nyɔngɔ mɛ 'da mi, nɛ nɛ nɔ́ dɔɛ mi dɛa ni.

⁶ Nɛ lá fala yɛnggɛ do winɔ wa do gbãlã zã wa bina ni. Nɛ nɛ bá wala kɛ hã zã se'de boe ni, nɛ nɛ ɔ sɛ dɔa kɔ̃ tũ ngɔ nù gɛ.”

⁷ Mɔ kɔ́'dɔ́ wi dɛ gã zu, nɛ wa yɔndɔ sɛ mɔ. Mɔ poe 'dã wi, nɛ wa dã sɛ mɔ.

⁸ Mɔ tɛ poe wi dɛ gã zu gɔ, we kɛ a sɛnɛ sɛ mɔ. Nɛ nde mɔ poe wi hã zã, nɛ a kɔ̃ sɛ gɛnɛ mɔ.

⁹ Wenɔ kɛ mɔ tɔ̃ hã wi hã zã ni, nɛ ma gã sɛ hã zã 'da a. Mɔ be mɔ hã wi gbisa zu, nɛ a yambala sɛ ma dɛ dati.

¹⁰ We hɔ wi hã zã, nɛ ma wia, dati ngboo na, mɔ dɛ kili NWA. Mɔ bá tɛ mɔ hã NWA kɛ a santo, nɛ mɔ kpa sɛ hã zã.

¹¹ Mɔ ɔ wi hã zã, nɛ hã zã ma e sɛ mbé tũ ngɔ tũ dungu nza 'da mɔ, nɛ zu mɔ ma kutu sɛ mbu.

¹² Nɛ hã zã ni ma gala sɛ mɔ wele nɛ ngboo. Kɔ fala kɛ mɔ a wi gã zu, nɛ mɔ wele nɛ ngboo, mɔ kpa sɛ si olo nɛ.

¹³ Yɔndɔ wi ɔ nɛ wuko kɛ a ĩ̀ ti mɔ gɔ, nɛ a wele we wena, nɛ sape li a bina ni.

¹⁴ A dungu nù dɛ kpongbo nu tɔa 'da a, tabi tɛ ngɔ kusu fala tɛ 'da le,

¹⁵ nɛ a zɔ owinɔ kɛ wa la wala 'da wa, nɛ nde wa lénggé do a gɔ ni. Nɛ a sa mɔ hã wa, nɛ a tɔ̃ hã wa na:

¹⁶ “Aa nɛ, winɔ kɛ li nɛ ĩ̀ mɔ gɔɛ gɛ, nɛ lé 'da mi nga sɛ!” Nɛ a lɔ̃ hã wanɔ kɛ wa do hã zã bina ni na:

¹⁷ “Lì zũ de wena, nɛ nyɔngɔmɔ zũ ɛ̃fɛ̃ ndirr.”

¹⁸ Nɛ nde owinɔ kɛ wuke ni sa mɔ hã wa ni, wa ĩ̀ kɛ na lo kɔlɔ dɔ̃ɔ do nu ngba le 'da fio ni gɔ.