GBA WENƆ 7 - WE NU GALE 1995

¹ Be 'daa, tɛ mɔ tɛ èlè ngɔ wenɔ mi tɔ́a ni gɔ. Mɔ lénggé do mbulanɔ mi tɔ́a hã mɔ ni.

² Mɔ dɛ́ mbulanɔ ni, nɛ mɔ ɔ sɛ dɔa kɔ̃ tũ ngɔ nù gɛ. Mɔ fɔ́mɔ́ bia wenɔ 'da mi, ɔ nɛ kɛ mɔ fɔmɔ do gbali mɔ ni.

³ Mɔ 'bé ma, nɛ kɔ̃ mɔ nɔ tɛ nɛ. Mɔ kɔ́mɔ́ ma dɛ gbãlã zã mɔ ngboo.

⁴ Mɔ zɔ́ hã zã ɔ nɛ boko nya mɔ, nɛ mɔ zɔ́ siki gbãlã zã ɔ nɛ 'bia mɔ ni.

⁵ Mɔ dɛ́ ni, nɛ ma gala sɛ mɔ na, mɔ tɛ kɔ̀lɔ̀ do wuko mɔ́ wili kɛ a fa we ɔlɔ mɔ do ɛ̃fɛ̃ lɛnggɛ nu a ni gɔ.

Wuko yɛnggɛ vĩ zu yali 'danga sila be zagbãlã

⁶ Mbe ngba soe kpo, nɛ mi yula zi dɛ li holo nu tɔa 'da mi, nɛ mi ka mɔ dɛ nza i.

⁷ Mi ka mɔ, nɛ mi zɔ obe zagbãlã kɛ li wa tɛ ĩ̀ mɔ gɔ ni. Nɛ mbe kpo kɔ wa ni, a zi do gbãlã zã a bina.

⁸ A la do li be wala, nɛ a kɔlɔ do tɔa 'da mbe wuko kpo.

⁹ Ma zi do 'da fala wese lia nù, nɛ tũ tũ ia ni.

¹⁰ Nɛ wuko ni tɛa we kpa ngba a do a. A hi'da tulu ɔ nɛ wuko ndumba ni, nɛ a 'dafa sɔ mɛ kɛ a kɔ̃a we dɛ ma ni ia.

¹¹ Mɛ a wuko a fa zi wili wena, nɛ a do sape li a bina. A ba zi fai do li gba wala,

¹² nɛ a yolo dɛ nu mba walanɔ, tabi li fandanɔ, nɛ li a zĩ kpa falanɔ vɛ̃.

¹³ A nɛa we kpa ngba a do be zagbãlã ni, nɛ a fi kɔ̃ a 'do gɛlɛ a, nɛ a 'be a dɛ tɛ̃ a, nɛ a ka mɔ dɛ li a,

¹⁴ nɛ a tɔ̃ hã a na: “Mi kpua zi mbulu hã dɔnggamɔ we gese iɔ̃nae hã Gale. Nɛ mi dɛa mbuli ni sɔɛ gɛ ia, nɛ tala mulu sa'de 'bana.

¹⁵ Ma kɛ mi hɔa we kpa ngba mi do mɔ ni. Mi fa mɔ wena, hã mɔ zɔ, mi kpa mɔ.

¹⁶ Mi 'dafa mɔ ɔi 'da mi ia. Mi fi gã tulu linɛ kɛ wa ngbɔa ma tɛ ngɔ nù Ezipeto ni ngɔ nɛ. Mɛ a gã tulu kɛ ma ɔ bɛndɛ bɛndɛ, nɛ wa gɛzɛ ma de wena.

¹⁷ Mi kala onɔ yɔmbɔ kpi do kpi, nɛ mi kpã ma ngɔ nɛ.

¹⁸ Mɔ tɛ́, hã lɛ ɔ do ngba lɛ gbaa we hɔ titole. Lɛ 'bé ngba lɛ dɛ tɛ lɛ, nɛ tɛ lɛ ma ɛ̃fɛ̃ sɛ ndirr.

¹⁹ Wili mi nɛa gɛnɛ nyɛlɛ wena,

²⁰ nɛ a kala mbili dɛlɛ wena, nɛ a sí sɛ dɔ̃ gɔ.”

²¹ A tɔ̃ zi na mɛ ni we ɔlɔ be zagbãlã ni do ɛ̃fɛ̃ lɛnggɛ nu a iko.

²² Hã mɔ zɔ́, a kɔ̃a, nɛ a nɛ 'dɔkɔlɔ a, nɛ wuke ni kã a, ɔ nɛ kɛ wa kã do wili ngɔmbɔ we gbɛ a ni. Be zagbãlã ni ɔ nɛ dɛngbɛ kɛ a ba bili do tunu li a,

²³ kɔ wa nɛ ndɔlɔ a do kpili ni. A ɔ nɛ nɔɛ kɛ a ba bili, nɛ nde a ĩ́ fala nɛ gɔ ni.

²⁴ Aa nɛ, obenɔ 'da mi, ngangga ni, nɛ zélé mi, nɛ li nɛ sɔ̃́ tɛ lɛnggɛnɔ mi tɔ̃ hã nɛ gɛ.

²⁵ Nɛ tɛ kɔ̃̀ na, wuko na mɛ ni ɔlɔ sila nɛ gɔ. Nɛ tɛ là li bɔlɔ wala we nɛ 'do a gɔ.

²⁶ Mba gɔ, a 'danga wele 'danga. Kafi bina, a 'danga 'bɔ Owele dɛlɛ wena ia.

²⁷ Mɔ nɛ́ 'da a, nɛ ma ɔ nɛ mɔ hɔa nu ngba kɛ wa le nɛ dɛ kɔ le 'da ofionɔ i ni.