GBA WENƆ 5 - WE NU GALE 1995

Mbisa we ngɔ wuko mɔ́ wili

¹ Be 'daa, mɔ zélé wenɔ mi tɔ̃ hã mɔ gɛ! Mɛ a lɛnggɛ hã zã, nɛ ma be 'du gulu we.

² Mɔ zele ma, nɛ mɔ dɛ sɛ mɔ tɛ mɔ do bɔlɔ nɛ. Nɛ lɛnggɛ nu mɔ ma be sɛ na, gbãlã zã mɔ boe.

³ Lɛnggɛ nu wuko yɛnggɛ vĩ zu yali, ma ɛ̃fɛ̃ nɛ́ nɔ gɔlɔ ni, nɛ ma dɛ tɛ wi fe ɔ nɛ nɔ ni.

⁴ Nɛ nde fala kɛ a ɔlɔ mɔ do'do, sɛ nɛ mɔ ĩ na, lɛnggɛ nu a ɔ nɛ sambe, tabi kɔya kɛ tɔ̃a nu nɛ bɔa ni de.

⁵ Wala kɛ a la nɛ ni, mɛ a wala fio. A ba mɔ ia, nɛ a la do mɔ dɛ tɛ le 'da fionɔ i.

⁶ A bá wala kɛ ma hã kpasi hã wele ni gɔ. A yɔ wala, nɛ a ĩ̀ ti wala kɛ a nɛ hɔ nɛ ni gɔ.

⁷ Be 'daa, mɔ zélé mi sɛ! Mɔ tɛ dà mbulanɔ mi hã ma hã mɔ gɛ nù gɔ.

⁸ Mɔ yú nyɛlɛ do wuko kɛ a ɔ na mɛ ni. Nɛ mɔ tɛ kɔlɔ do nu tɔa 'da a gɔ.

⁹ Ní gɔ, nɛ ogele wele wa kpa sɛ dɔ̃lɔ̃ li kɛ mɔ zi do ma ni, nɛ mɔ fe sɛ dɛ kɔ̃ owinɔ kɛ li wa kolo wena ni.

¹⁰ Kafi bina, fala kɛ mɔ nɛ 'do a, nɛ ogele winɔ wa kala sɛ kpamɛnɔ olo mɔ ni. Nɛ mɛnɔ vɛ̃ kɛ mɔ dɛa zi to nganda wena we kpa ma ni, ma hɔ sɛ mɔ wa.

¹¹ Nɛ do ndɔti nɛ, nɛ mɔ sɛ 'bɔ do ngawi kpo bina, nɛ mɔ ala sɛ nu mɔ do 'bako.

¹² Mɔ tɔ̃ sɛ na: “Aa! Gulu kɛ mi zèlè mbulanɔ wa hã zi hã mi ni gɔ we ge nde? Gulu kɛ mi da ma nù vɛ̃ we ge nde?

¹³ Mi bɛ̃a we zele nu owi dala mi. Nɛ mi kpia zala mi na, mi tɛ zèlè wa gɔ.

¹⁴ Ma 'bana be sĩ na, mi hɔ wi 'bako ngboo, nɛ mi kpa sape sanga owinɔ 'da Gale.”

Mɔ kɔ̃́ gɛnɛ wuko zagbãlã 'da mɔ

¹⁵ Wuko zagbãlã 'da mɔ, a ɔ nɛ 'de kɛ lì kɔ nɛ gɛ̃lɛ̃ wena ni. Ma wia na, mɔ nɔ tati a lì ni.

¹⁶ Mɔ tɛ ha wala na, lì ni ma gbala, nɛ ma fo do li fandanɔ gɔ.

¹⁷ Ma wia na, wuke 'da mɔ a ɔ tati a we mɔ zu mɔ kpo. Mɔ tɛ mbà ngɔ a do ogele wele gɔ.

¹⁸ Mɔ dɛ́ yangga do wuko kɛ mɔ saka a ngɔ zagbãlã tɛ mɔ ni. Nɛ mɔ dɛ na, a dungu do yangga.

¹⁹ A de zɔnga wena, nɛ a hãsã ɔ nɛ dɛngbɛ ni. E kɔ mɔ ɔ fai do yangga we duzu kɔ̃a zã 'da a dɛ 'da mɔ. E kɔ tɛ mɔ ɛ̃fɛ̃ 'da fala a 'be mɔ dɛ tɛ̃ a ni.

²⁰ Gulu kɛ mɔ kɔ̃ gɛnɛ wuko mɔ ngba mɔ ni we ge nde? Gulu kɛ mɔ dɛ yangga we 'be wuko kɛ a a kɛnɛ mɔ gɔ ni dɛ tɛ mɔ we ge nde?

²¹ Mɔ ĩ́ na, NWA zɔ dɛa to tɛ wele kpo do kpo. Nɛ falanɔ vɛ̃ mɔ la do ma ni, a zɔ mɔ zɔa.

²² 'Dã mɛnɔ kɛ 'dã wi dɛ ni, ma ɔ nɛ bili we a ni. Bili 'dã mɛ 'da a ma ba a, nɛ nde a hɔ̀ sɛ li nɛ gɔ.

²³ Wele kɛ a kɔ̃̀ we zimi tɛ̃ a gɔ ni, a yɔ wala, nɛ nde ma zɔa a zu a kpo. A fe sɛ we bɔ dɛa mɛ 'da a wele nɛ.