GBA WENƆ 4 - WE NU GALE 1995

Mɔ fá hã zã, nɛ mɔ nda'ba tɛ mɔ do ma

¹ Aa obenɔ, nɛ zélé wenɔ baa nɛ be hã nɛ ni. Li nɛ sɔ̃́, nɛ nɛ ĩ sɛ ti tɛlɛ tɛ kɛ nɛ wia we kpa hã zã ni.

² Mɛ mi be hã nɛ ni, mɛ a gbãlã we, tɛ zu nɛ tɛ èlè ngɔ ma gɔ.

³ Baa mi bia zi tɛ 'bɔ mɔ hã mi do be, nɛ naa mi kɔ zi gɛnɛ mi wena.

⁴ Baa mi tɔ̃a zi mbula hã mi na: “Mɔ zélé we mi be hã mɔ gɛ, nɛ mɔ ba ma dɛ kɔ sila mɔ. Mɔ dɛ́ mbulanɔ mi e ma hã mɔ gɛ, nɛ mɔ ɔ sɛ dɔa kɔ̃ tũ ngɔ nù gɛ.

⁵ Mɔ fá we kpa hã zã, nɛ mɔ yamba we ĩ ti gulu mɛnɔ. Tɛ mɔ tɛ èlè ngɔ mɛ mi be hã mɔ gɛ gɔ, nɛ mɔ tɛ là fala dɛ ma gɔ.

⁶ Mɔ tɛ là hã zã kɛ mɔ kpa ma ni gɔ. Mɔ dɛ na mɛ ni, nɛ ma gala sɛ mɔ. Mɔ kɔ̃ gɛnɛ ma, nɛ ma kã sɛ mɔ li wala 'da mɔ.

⁷ Mɔ kɔ̃ we kpa hã zã, nɛ mɔ ba tɛ mɔ we ĩ ti gulu nɛ. Dati ngboo, nɛ mɔ fa we hɔ wi hã zã.

⁸ Mɔ kɔ̃ gɛnɛ hã zã, nɛ mɔ hɔ sɛ gã wi. Mɔ nda'ba tɛ mɔ do ma, nɛ mɔ kpa sɛ dɔ̃lɔ̃ li.

⁹ Nɛ hã zã ma ɔ sɛ nɛ dia ndasa nwa, tabi iyaka olo gã gole kɛ mɔ fi gɛlɛ mɔ ni.”

¹⁰ Be 'daa, mɔ zélé mi, nɛ mɔ kɔ̃́ gɛnɛ wenɔ mi tɔ̃ hã mɔ ni. Fala kɛ mɔ dɛ na mɛ ni, nɛ mɔ ɔ sɛ 'do mɔ nyɛlɛ ngɔ nù gɛ.

¹¹ Mi be wala kpa hã zã hã mɔ, nɛ mi kã mɔ dɛ li bɔlɔ wala.

¹² Kɔ fala kɛ mɔ ba walanɔ ni, nɛ fo mɔ kele sɛ ti mɔ bina. Nɛ mɔ la sɛ dɔ̃ dɔ̃, nɛ nde mɔ kɔ́ sɛ zu nyanga mɔ gɔ.

¹³ Mɔ lénggé fai do mɛnɔ mɔ yambala ni. We kɛ mɛ a wala kpa dia dungu 'da mɔ, nɛ mɔ dɛ́ ma do sila mɔ kpo.

¹⁴ Mɔ tɛ bà wala 'do owi dɛ 'dã mɛnɔ gɔ. Nɛ mɔ tɛ yàmbàlà dɛa to tɛ wa gɔ.

¹⁵ Mɔ gbílí wa, nɛ mɔ la do mbe gele wala, nɛ mɔ tɛ kɔ̀lɔ̀ do wa gɔ.

¹⁶ O'dã winɔ wa bɛ̃ we le tɔa gbaa na, wa dɛ mɔ kɛ ma dè gɔ ni dati sɛ nɛ de. Fala kɛ wa dɛ 'dã mɔ do wele gɔ, nɛ nde yala gbó li wa gɔ.

¹⁷ We kɛ nyɔngɔmɔ nu wa, mɛ a dɛ 'dã mɔ, nɛ dɔ̃ nu wa, mɛ a zɛlɛ tɛ ogele wele.

¹⁸ Nɛ nde dɛa to tɛ owi bɔlɔ zunɔ, ma ɔ nɛ wese kɛ ma gba do titole, nɛ ma to dɛ dati gbaa na, ma hɔa ngɔ ni.

¹⁹ Nɛ dɛa to tɛ o'dã winɔ ma ɔ nɛ gba tũ ni. Wa kɔ zu nyanga wa, nɛ wa te, we kɛ wa zɔ mɔ li wala gɔ.

²⁰ Be 'daa, mɔ zélé wenɔ 'da mi. Mɔ gɛ́ zala mɔ tɛ mbulanɔ 'da mi.

²¹ Mɔ tɛ kɔ̃̀ na, tɛ mɔ ele ngɔ nɛ gɔ. Nɛ nde mɔ úsú ma dɛ kɔ sila mɔ ngboo.

²² We kɛ mbulanɔ 'da mi, mɛ a wala kpasi we wanɔ kɛ wa ĩ ti gulu nɛ ni. Ma ɔ nɛ ina nganda kili tɛ wele ni.

²³ Mɔ 'dáfá linggamɔ kɔ sila mɔ, we kɛ mɛnɔ wele dɛ ni, ma yolo kɔ sila a.

²⁴ Mɔ tɛ 'bìlì bɛlɛ gɔ, nɛ mɔ tɛ tɔ̃̀ lɛnggɛ ɔlɔ wele gɔ.

²⁵ Mɔ dɛ ni, nɛ mɔ ka sɛ mɔ li owinɔ, nɛ nde sape bá sɛ li mɔ, nɛ mɔ bili zu mɔ nù gɔ.

²⁶ Mɔ lénggé ngɔ wala mɔ nɛ ba ma ni, nɛ mɔ bá do kɛ ma ɔ bɔlɔ ni.

²⁷ Mɔ yù nyɛlɛ do 'dã mɔ, nɛ mɔ tɛ ɛ̃lɛ̃ tɛ mɔ li bɔlɔ wala gɔ.