GBA WENƆ 31 - WE NU GALE 1995

Mbulanɔ hã nwa

¹ Kɛ gɛ a mbulanɔ kɛ naa Lɛmuɛlɛ, nwa ngɔ nù Masa, a tɔ̃a zi hã a ni. A na:

² “Aa mɔ, be 'daa, mi a mi kua mɔ. Mɔ zélé mi sɛ! Mi sambala zi Gale, nɛ a hã mɔ hã mi.

³ Kɔ mɔ tɛ kɔ̃̀ na, owukonɔ wa e ngawi 'da mɔ gɔ. Mɔ tɛ kɔ̃̀ na, wa 'danga mɔ, ɔ nɛ kɛ wa 'danga ogili nwanɔ ni gɔ.

⁴ Be 'daa, mɔ zélé mi sɛ! Ma wè na, Onwanɔ do ogã winɔ wa hã tɛ wa we nɔ dɔ̃ gɔ.

⁵ Fala kɛ dɔ̃ ba wa, nɛ wa yɔ sɛ mbulanɔ, nɛ wa lénggé sɛ 'bɔ do owi sãnɔ gɔ.

⁶ Ma wia na, wa la dɔ̃ɛ hã wanɔ kɛ wa nɛ fe fia, tabi hã owanɔ kɛ wa kɔ ngamɔ ni.

⁷ We kɛ wa nɔ ma, nɛ ta zu wa ma ele sɛ ngɔ ngamɛ do 'bakoe 'da wa.

⁸ Nɛ nde ma wia na, mɔ si 'do winɔ kɛ wi zele we nu wa bina, do wanɔ kɛ winɔ wa lénggé do wa gɔ ni.

⁹ Mɔ tɔ̃́ we ngɔ wa, nɛ mɔ gɔnɔ wenɔ 'da wa do bɔlɔ nɛ. Nɛ mɔ sí 'do owi sãnɔ do Owi 'bakonɔ.”

Tɛlɛ tɛ wuko sɔ̃a gbãlã tɛ

¹⁰ Fala kpa dia wuko sɔ̃a gbãlã tɛ nganda wena. Wuko sɔ̃a gbãlã tɛ dia nɛa ngɔ iyaka olo gã gole.

¹¹ Wili a gbini zã a do a, nɛ sã bá sɛ wili a gɔ.

¹² A dɛ́ wili a 'danga fala kpo gɔ. Nɛ nde a dɛ tati a dia mɔ hã a kɔ dungu nza 'da a vɛ̃.

¹³ A fa sala bata do fɛlɛ linɛ, nɛ a ngbɔ do tulu. Nɛ tɛ̃ a hãsã tɛ dɛ ma nɛ ge nde ni.

¹⁴ A la nyɛlɛ wena we fa nyɔngɔmɔ, nɛ a si do ma, ɔ nɛ kɛ masua nɛ nyɛlɛ, nɛ ma si do tolenɔ ni.

¹⁵ Fala 'bana iko, nɛ a kulu ngɔ we gi nyɔngɔmɔ hã nu fɛlɛ a, nɛ a kɛ̃ to hã Owi tonɔ 'da a.

¹⁶ A zɔ fɔ, nɛ a oso ma do mbili kɛ a kpa olo dɛa toe 'da a ni, nɛ a mi te vinɔ kɔ nɛ.

¹⁷ A dɛ to do ngawi 'da a vɛ̃, nɛ a mbɔ́kɔ́ fala kpo gɔ.

¹⁸ A zɔ na toe 'da a tɛ nɛ do dia nɛ, nɛ do tũi, nɛ a tũ mwinda, nɛ a dɛ toe ni dɛ dati fai.

¹⁹ Kɔ̃ a hãsã tɛ lifi sala bata do ngbɔ tulunɔ wena.

²⁰ A zɔ wi 'bakonɔ, nɛ a gala wa. Nɛ a lá Owi sãnɔ na mɛ ni iko gɔ.

²¹ Gɛ̃ɛ ma ngɔ ba nɛ, nɛ nde a lénggé do ma gɔ, we kɛ tulu gɛ̃ɛ zɔ́lɔ́ kɔ tɔa 'da a gɔ.

²² A dɛ obolangiti, nɛ a he'de dia tulunɔ kɛ a fulu ma do fɛlɛ linɛnɔ kɛ ma a yoo ni.

²³ Wili a a wi dĩ. A dungu nù dɛ ngbala okumunɔ kɔ mba li ngba wi 'da wa, nɛ owinɔ wa dɔnggɔ a wena.

²⁴ Wuko sɔ̃a gbãlã tɛ fulu otulu do o'dɛ̃, nɛ owi be golenɔ wa oso kɔ a.

²⁵ Owele wa dɔnggɔ a wena we sɔ̃a gbãlã tɛ 'da a. A lengge kɔ tũnɔ kɛ ma nɛ tɛ sɛ ni, nɛ nde a dɛ́ kili gɔ.

²⁶ A wele we do hã zã, nɛ a poe ongba a do dia sila.

²⁷ A dúngú iko gɔ, a zɔ mɔ tɛ mɛnɔ kɛ ma dɛ tɛ̃ ɛ kɔ tɔa 'da a ni vɛ̃.

²⁸ Obenɔ 'da a wa dɔnggɔ a, nɛ wili a tɔ̃ de sako li a.

²⁹ Wili a tɔ̃ na: “Sɔ̃a gbãlã tɛ wukonɔ wa dɛlɛ wena. Nɛ nde tɛ mɔ sɔ̃a nɛa ngɔ wa vɛ̃.”

³⁰ Ɛ̃fɛ̃ lɛnggɛ ma ɔlɔ wi iko, nɛ dia ndala tɛ wi 'báná fai gɔ. Wa dɔnggɔ tati a wuko kɛ a ba tɛ̃ a dɛ nù dati NWA Gale ni.

³¹ Ma wia na, wuke ni kpa si olo dɛa toe 'da a, nɛ wa dɔnggɔ a kɔ le vɛ̃.