GBA WENƆ 3 - WE NU GALE 1995

Mɔ ɔ́ do hã zã, nɛ mɔ zele we nu Gale

¹ Be 'daa, tɛ mɔ tɛ èlè ngɔ bia wenɔ 'da mi gɔ. Mɔ úsú wenɔ mi tɔ̃a hã mɔ ni dɛ kɔ sila mɔ.

² Mɔ dɛ na mɛ ni, nɛ mɔ dungu sɛ do dia nɛ, nɛ mɔ sɛ do yangga, nɛ zu mɔ ma kutu sɛ mbu.

³ Ma wia na, mɔ ɔ fai do dia zã, do bɔlɔ zu, nɛ ma ɔ we mɔ nɛ mɔ gɛlɛ wi kɛ mɔ hi'da ma ni. Nɛ mɔ kɔ́mɔ́ ma dɛ gbãlã zã mɔ.

⁴ Fala kɛ mɔ dɛ na mɛ ni, nɛ Gale a be sɛ dia zã 'da a hã mɔ, nɛ owinɔ wa kɔ̃ sɛ gɛnɛ mɔ. Nɛ mɔ dungu sɛ do wa de wena fai.

⁵ Mɔ tɛ è sila mɔ ngɔ hã zã 'da mɔ wele nɛ gɔ, nɛ nde mɔ gbini zã mɔ do nwa,

⁶ nɛ mɔ e sila mɔ ngɔ a kɔ mɛnɔ vɛ̃ kɛ mɔ kɔ̃a we dɛ ma ni. Nɛ a be sɛ mɛ ma wia na mɔ dɛ ni hã mɔ.

⁷ Mɔ tɛ ɔ̃lɔ̃ tɛ mɔ, kɔ mɔ tɔ̃ na, ɛ do hã zã wena gɔ. Nɛ nde mɔ dɔ́nggɔ́ NWA, nɛ mɔ yú 'dã mɔ.

⁸ Mɔ dɛ na mɛ ni, nɛ ma ɔ sɛ nɛ dia ina kɛ mɔ kɔ li dani tɛ mɔ, nɛ ma gbɛ nga zɛlɛ nɛ vɛ̃ ni.

⁹ Mɔ dɔ́nggɔ́ NWA Gale do mbe kpamɛnɔ 'da mɔ. Nɛ mɔ sáká kɔ dia kpalɛnɔ 'da mɔ, nɛ mɔ dɔnggɔ do a.

¹⁰ Mɔ dɛ na mɛ ni, nɛ kpalɛ ma dunu sɛ ngɔ yangga 'da mɔ, nɛ dɔ̃ ma dunu sɛ kɔ kpananɔ 'da mɔ, nɛ ma si nù.

¹¹ 'Da fala kɛ NWA be we hã mɔ, nɛ mɔ zele, nɛ mɔ tɛ zɔ̀ mbisa wenɔ 'da a li mɔ yala gɔ.

¹² Mba gɔ, NWA dãlã dɛ tɛ wele kɛ a kɔ̃a gɛnɛ a ni, ɔ nɛ kɛ baa be dãlã dɛ tɛ be 'da a kɛ a kɔ̃a gɛnɛ a wena ni.

Hã zã ma hã yangga hã wele

¹³ Mɛ a yangga we wi kɛ a do hã zã, nɛ li a hũi we ĩ ti 'du gulu we ni.

¹⁴ Ki ni dia nɛa ngɔ ngɛmɛ li mbili tabi ngɛmɛ mɔ mbali.

¹⁵ Hã zã la ngɔ iyaka olo gã gole, nɛ fo mɔ de nɛ ngɔ hã zã bina.

¹⁶ Ma gala wele na, kɔ̃ tũ dungu nza 'da a dɛlɛ, nɛ ma dɛ na, wele kpa mɔ, nɛ li a dɔlɔ.

¹⁷ Wele kɛ a do hã zã ni, a kpa sɛ dia dungu. Nɛ mɔ kpo dɛ́ sɛ a gɔ.

¹⁸ Wanɔ kɛ wa dɛ mɔ do hã zã ni, wa sɛ fai do kpasi, nɛ wa sɛ a owi yangga.

¹⁹ NWA dɛa nùi do hã zã 'da a. A dɛa li nza do gbãlã zã kɛ a do ma ni.

²⁰ A ĩ ti lìnɔ ti nù i, do kɛnɔ li nza i ni. Na mɛ ni, a dɛa na kolo tɛ, nɛ lìnɔ ma fo.

NWA zɔ mɔ tɛ wi hã zã

²¹ Be 'daa, dati ngboo, mɔ bá tɛ mɔ we kpa hã zã, nɛ mɔ ɔ do sɔ̃a li, nɛ mɔ nda'ba tɛ mɔ do ma.

²² We kɛ mɔ dɛ na mɛ ni, nɛ mɔ kpa sɛ dia dungu do yangga kɔ dungu nza 'da mɔ.

²³ Nɛ mɔ ba sɛ wala 'da mɔ do gɛ̃a sila, nɛ mɔ zɔ́lɔ́ sɛ dɔndɔ gɔ.

²⁴ Mɔ le tɔa do tũ, nɛ mɔ dɛ́ sɛ kili gɔ, nɛ mɔ ɔ sɛ yala do dia nɛ.

²⁵ Mɔ tɛ dɛ̃ kili gɔ, we kɛ ngamɔ gbángá sɛ mɔ gɔ, nɛ o'dã wi wa bí sɛ mɔ gɔ.

²⁶ We kɛ nwa sɛ do mɔ boe, a zɔ sɛ mɔ tɛ mɔ, nɛ a kɔ̃̀ sɛ na, mɔ te li bili gɔ.

Mɔ kɔ̃ gɛnɛ ngba mɔ

²⁷ Fala kɛ mɔ ɔ do kpamɔ, nɛ mɔ tɛ bɛ we gala wi kɛ a tia sã ni gɔ.

²⁸ Fala kɛ mɔ ɔ do wala sɔɛ gɛ we gala ngba mɔ, nɛ mɔ tɛ tɔ̃̀ hã a na, bindɛ sɛ gɔ.

²⁹ Wele dungu do mɔ, kɔ a gbini zã a do mɔ, nɛ mɔ tɛ fà we dɛ a 'danga gɔ.

³⁰ Ngba mɔ dɛ̀ 'dã mɔ do mɔ gɔ, nɛ mɔ tɛ mɔ̃̀lɔ̃̀ do a iko gɔ.

³¹ Mɔ tɛ dɛ̀ bɔnɛ dɛ tɛ Owi dɛ nga zunɔ gɔ, nɛ mɔ tɛ dɛ̀ mɛ wa dɛ ni gɔ.

³² We kɛ NWA sɛnɛ wanɔ wa siki 'do wa hã a ni. Nɛ nde a dɛ na do Owi bɔlɔ zunɔ.

³³ NWA fɔ́mbɔ́ nu fɛlɛ 'dã winɔ, nɛ a wele nu a tɛ nu fɛlɛ Owi bɔlɔ zunɔ.

³⁴ A zɔ winɔ kɛ wa fi tɔɛ zu a ni li a yala iko. Nɛ a be dia zã 'da a hã owanɔ wa ba tɛ wa dɛ nù ni.

³⁵ Owi hã zãnɔ, wa kpa sɛ dɔ̀lɔ̀ li, nɛ nde Owi bi gbãlã zãnɔ, wa kpa sɛ sape.