GBA WENƆ 29 - WE NU GALE 1995

¹ Wi kɛ wa kɔ'dɔ a, kɔ a kɔ̃̀ we zele nɛ gɔ, nɛ ngamɔ ma gbanga sɛ a, nɛ a hɔ sɛ nza kɔ nɛ gɔ.

² Fala kɛ Owi bɔlɔ zu wa hɔ nwa, nɛ owinɔ wa dɛ yangga. Nɛ nde fala kɛ o'dã winɔ wa hɔ nwa, nɛ owinɔ wa zɛ nu wa do 'bako.

³ Wele kɛ a kɔ̃a we dɛ mɔ tɛ̃ a do hã zã ni, a hã sɛ yangga hã baa a. Nɛ nde wele kɛ a yɛnggɛ do wuko makangonɔ ni, nɛ mbili 'báná sɛ kɔ̃ a gɔ.

⁴ Nwa kɛ a dɛ toe 'da a do bɔlɔ nɛ ni, nɛ nùi 'da a ma de sɛ. Nɛ nde nwa kɛ a lengge do mbili iko ni, nɛ nùi 'da a ma 'danga sɛ.

⁵ Wele kɛ a tɔ̃ ɛ̃fɛ̃ lɛnggɛ hã ongba a iko ni, a ndɔ bili li wala 'da a.

⁶ Bili 'dã mɛ 'da o'dã winɔ ma ba wa wele nɛ. Nɛ nde owi bɔlɔ zunɔ wa dunu sɛ do yangga.

⁷ Wi bɔlɔ zu ĩ ti gulu we 'da Owi sãnɔ. Nɛ nde 'dã wi do hã zã we ĩ ti ma bina.

⁸ Owi fa kpawe wa dãlã sila Owi kɔ le. Nɛ nde Owi dɛ mɔ do hã zã wa gɛ̃ sila Owi kɔ le.

⁹ Ma wè na, wi hã zã nɛ do yɔndɔ wi 'da owi 'bili we gɔ. Mba gɔ, yɔndɔ wi ni a mɔmɔ sɛ, nɛ a tɔ̃ sɛ yia lɛnggɛ iko, nɛ nde dia nɛ sɛ bina.

¹⁰ Owi gbɛ winɔ wa sɛnɛ Owi bɔlɔ zunɔ wena. Nɛ nde odia winɔ wa kɔ̃ sɛ gɛnɛ Owi bɔlɔ zunɔ.

¹¹ Yɔndɔ wi a dɛ mɔ do 'da nɔ̃lɔ̃ zã 'da a. Nɛ nde wi hã zã kpãlã sila a, nɛ nɔ̃lɔ̃ zã 'da a ma gɛ̃.

¹² Fala kɛ nwa gɛ́ zala a tɛ lɛnggɛ bɛlɛ, nɛ Owi ti nu a vɛ̃ wa hɔ sɛ Owi 'bili bɛlɛ.

¹³ Mɔ zɔ wi sã do wi kɛ a hã ngamɔ hã a ni, nɛ nde nwa dɛa mɔ kpo tɛ wa ni wia kɔ̃. Mɛ a gbali wa kɛ a hã ma hã wa na, wa zɔ do mɔ ni.

¹⁴ Nwa kɛ a 'bili we hã Owi sã do gbãlã we ni, nɛ dɛa to nwa 'da a ma nganda sɛ dɛ dati fai.

¹⁵ Mɔ tɔ̃ mbula hã be, nɛ mɔ hã etumbu hã a, nɛ gbãlã zã a ma siki sɛ. Nɛ nde mɔ la a iko, nɛ a hã sɛ sape hã naa a.

¹⁶ Fala kɛ o'dã winɔ wa hɔ nwa kɔ le, nɛ 'dã mɔ ma dɔ sɛ kɔ le ni wena. Nɛ nde dunguu, nɛ owi bɔlɔ zunɔ wa zɔ sɛ kɛ o'dã winɔ wa nɛ te nɛ ni.

¹⁷ Mɔ bɔlɔ be 'da mɔ do tɔ̃ mbula hã a, nɛ a hã sɛ linggamɔ hã mɔ gɔ. Nɛ mɔ we sɛ tɛ dɔnggɔ tɛ mɔ do a.

¹⁸ Fala kɛ fo wele we gba olo nu Gale hã winɔ bina, nɛ nde wa dɛ́ sɛ mbula gɔ. Nɛ nde wele kɛ a dɛ mbula, nɛ ma hã sɛ yangga hã a.

¹⁹ Wa bɔ́lɔ́ wi to do lɛnggɛ iko gɔ. Mba gɔ, gɛnɛ kɔ a zele lɛnggɛnɔ ni, nɛ nde a dɛ́ sɛ ma gɔ.

²⁰ Mɔ zɔ wi kɛ a wele we dɔ̀ dɔ̃, nɛ nde a lènggè dati gɔ ni, nɛ mɔ ĩ na, gɛnɛ kɔ yɔndɔ wi, nɛ a kpa sɛ dia mɔ nɛ ngɔ a.

²¹ Fala kɛ ngbá 'da mɔ 'bana do be, kɔ mɔ hã mɛnɔ vɛ̃ hã a iko, nɛ do 'do, nɛ a dɛ sɛ nga zu.

²² Wi kɛ zã a nɔ̃lɔ̃ dɔ̃ dɔ̃ ni, nɛ a kpa we wena. Wi kɛ a ĩ̀ ti kunu sila a gɔ ni, nɛ a gã sɛ 'da 'dã mɛnɔ 'da a.

²³ Wi gã zu a kpa sɛ sape. Nɛ nde wi gbisa zu a kpa sɛ dɔ̃lɔ̃ li.

²⁴ Wi kɛ a kɔ̃ gɛnɛ we mɔ́ wi zũ ni, a fa 'dã mɔ dɛ kili tɛ̃ a wele nɛ. Fala kɛ a tɔ̃ gbãlã we, nɛ owi 'bili wenɔ wa hã sɛ etumbu hã a. Kɔ fala kɛ a kafa do'do, nɛ Gale a fɔmbɔ sɛ a.

²⁵ Mɔ dungu tɛ dɛ kili gbali winɔ, nɛ mɔ kpa sɛ ngamɔ. Nɛ nde mɔ gbini zã mɔ do NWA, nɛ mɔ kpo dɛ́ sɛ mɔ gɔ.

²⁶ Winɔ wena wa fa we de li nwa 'da wa. Ĩ na, wi a NWA Gale hã a gɔnɔ sɛ wenɔ 'da lɛ kpo kpo.

²⁷ Owi bɔlɔ zunɔ wa sɛnɛ o'dã winɔ. Nɛ o'dã winɔ wa sɛnɛ tɛ mɛ 'bɔ owi bɔlɔ zunɔ.