GBA WENƆ 27 - WE NU GALE 1995

¹ Mɔ tɛ dɔ̀nggɔ̀ tɛ mɔ do mɔ kɛ ma hɔ sɛ bindɛ ni gɔ. We kɛ mɔ ĩ̀ ti mɛ ma nɛ hɔ sɔɛ gɛ ni gɔ.

² Mɔ tɛ dɔnggɔ tɛ mɔ wele nɛ gɔ, mɔ é, nɛ ogele wele hã wa dɔnggɔ mɔ.

³ Gɛnɛ kɔ ta tabi kɛnzɛ ma dĩlĩ wena, nɛ nde yɔndɔ wi tulu mɔ, nɛ we nu a dĩlĩ mɔ nɛ ngɔ ma.

⁴ Nga zu do nɔ̃lɔ̃ zã 'danga wena. Nɛ nde sɛnɛmɔ 'danga nɛa ngɔ ma wena.

⁵ Poe ngba mɔ kɔ 'dã mɔ, dia nɛa ngɔ kɛ na, mɔ kpe nu mɔ, we kɛ mɔ kɔ̃a gɛnɛ a ni.

⁶ Ngba mɔ poe mɔ, nɛ nde a kɔ̃a gɛnɛ mɔ. Fala kɛ wi sɛnɛ mɔ ufu zala mɔ, nɛ li mɔ sɔ̃́.

⁷ Wi kɛ zã a hɛ̃ wena ni, gɛnɛ kɔ a zɔ dia nyɔngɔmɔ, nɛ nde a 'bé sɛ tɛ nɛ gɔ. Nɛ wi kɛ a ala wɔ ni, gɛnɛ kɔ kpã nyɔngɔmɔ, nɛ ma ɛ̃lɛ̃ sɛ nu a iko.

⁸ Wi kɛ a la le 'da a, nɛ a yɛnggɛ dɛ gele fala iko ni, a ɔ nɛ nɔɛ kɛ a bũlũ nyɛlɛ do tɔa 'da a ndũu ni.

⁹ Fɛlɛ nɔ yɔmbɔ, ma hã yangga hã wele. Nɛ nde 'bako ma vĩ linggamɔ zu wi vĩ.

¹⁰ Tɛ mɔ tɛ èlè ngɔ oyali ngba mɔ do oyali ngba baa mɔ gɔ. Fala kɛ mɔ kpa 'bako, nɛ mɔ tɛ nɛ gbaa 'da nya mɔ na, a gala mɔ gɔ. We kɛ ngba mɔ wi tɔa wia tɛ gala mɔ de nɛ ngɔ nya mɔ, kɛ a nyɛlɛ do mɔ wena ni.

¹¹ Be 'daa, mɔ dɛ mɔ tɛ mɔ do hã zã, nɛ ma hã sɛ yangga hã mi. Na mɛ ni, nɛ mi we sɛ we gese nu we hã wi kɛ a tulu mi ngɔ mɔ ni.

¹² Wi hã zã zɔ ngamɔ, nɛ a gbili ma. Nɛ nde yɔndɔ wi la do li nɛ, nɛ ngamɛ ni kpa a nganda wena.

¹³ Fala kɛ mbe wele kɔ̃ we ba ku'da olo gele wi dɛ zu a, nɛ ma wia na mɔ kala kpamɛnɔ 'da a, nɛ mɔ e do tikɔɛ ku'da olo wi ni, we kɛ mɔ ĩ̀ ti gele wi ni gɔ.

¹⁴ 'Da fala kɛ mɔ hɔ 'da ngba mɔ do titole belee, kɔ mɔ fana a do nga gɛlɛ, nɛ a lengge sɛ na mɔ dã ɛ dã.

¹⁵ Wuko tɔlɔ go'do we, ɔ nɛ tɔa kɛ zu nɛ hu hulu fai ni.

¹⁶ Mɔ amba a, nɛ ma ɔ nɛ mɔ amba bũ do kɔ̃ mɔ, tabi mɔ fi kɔ̃ mɔ 'dɔ nɔ we ba ma ba ni.

¹⁷ Wa bɛngɛ nu bolo do mɔ bolo. Na mɛ ni, wele yambala mɔ kɔ̃ ngba a.

¹⁸ Wele kɛ a 'dafa ti wala te ni, nɛ a nyɔngɔ sɛ wala nɛ. Na mɛ ni, wi dɛa to kɛ a 'dafa fala wele a ni, nɛ a kpa sɛ dɔ̃lɔ̃ li olo nɛ.

¹⁹ Mɔ ka mɔ 'dɔ lì, nɛ mɔ zɔ bula li mɔ. Na mɛ ni, mɔ ka mɔ kɔ sila mɔ, nɛ mɔ ĩ ti linggamɔ zã mɔ wele nɛ.

²⁰ Wɔ kɔ sila wele ma é fala kpo gɔ. Ma ɔ nɛ kɛ le 'da ofionɔ dúnú fala kpo gɔɛ ni.

²¹ Mɔ kɔ̃ we ĩ ti dia mɔ mbali tabi fɛ̃a mɔ bolo, nɛ mɔ yamba ma do we. Mɔ kɔ̃ we ĩ ti tɛlɛ tɛ wele, nɛ mɔ zele lɛnggɛ 'da a kɛ winɔ wa tɔ̃ ni.

²² Gɛnɛ kɔ mɔ zɛ yɔndɔ wi gbaa, nɛ nde mɔ wé sɛ we fo yɔnda kɔ a ni na, ma hɔ nza gɔ.

²³ Mɔ zɔ́ mɔ tɛ onadalamɛnɔ 'da mɔ, nɛ mɔ fɔ́mɔ́ wa do dia nɛ.

²⁴ Mba gɔ, kpamɔ mɔ́ wele 'báná fai gɔ. Gɛnɛ kɔ Onwanɔ, nɛ nde wa 'báná fai gɔ.

²⁵ Ma kɛ fala mɔ zɔ na, osa'denɔ 'da mɔ wa nyɔngɔ ã wɔkɔsɔnɔ ia, kɔ mbé bɔlɔ nɛ bina, nɛ mɔ nɛ we fa nyɔngɔmɔ hã wa zamɔ i.

²⁶ We kɛ mɔ wia we kɛlɛ sala tɛ batanɔ, nɛ mɔ ngbɔ do tulu. Nɛ mɔ wia we tɛka ombe duanɔ, nɛ mɔ oso do fɔ.

²⁷ Nɛ mɔ kpĩlĩ li bele tala duanɔ ni, nɛ mɔ do nu fɛlɛ mɔ, do Owi dɛa tonɔ 'da mɔ, nɛ nɔ ma.