GBA WENƆ 26 - WE NU GALE 1995

¹ Dɔnggɔ yɔndɔ wi ma dè gɔ. Ma 'danga ɔ nɛ kɛ kolo gbãlã mũlũ 'danga do kpalɛnɔ ni.

² Fɔmbɔ wele yala iko, ma wè tɛ dɛ mɔ do a gɔ. Ma la ɔ nɛ ngolo, tabi dɔndɛa kɛ a bũlũ gbaa, nɛ nde a zĩ́ ngɔ te we ɔmɔ tɛ a gɔ ni.

³ Wa zɛ mbalata do zufa, nɛ wa fi fɛlɛ mɔ bolo nu punda. Nɛ wa ba dɔ te we zɛ do yɔndɔ wi.

⁴ Fala kɛ mɔ gese we hã yɔndɔ wi, nɛ mɔ tɛ 'bã̀ olo kɔ̃ a gɔ, dɔ fũ yɔnda 'da a ma á tɛ mɔ gɔ.

⁵ Mɔ gese we hã zã hã a, nɛ ma we do yɔndɔ 'da a ni. Da dɛ kɔ a lénggé na, ɛ a wi hã zã gɔ.

⁶ Mɔ tombo yɔndɔ wi do to, nɛ ma ɔ sɛ nɛ kɛ mɔ 'bili nyanga mɔ wele nɛ ni. We kɛ mɔ zɔ sɛ ngamɔ olo nɛ.

⁷ Gba we kɛ yɔndɔ wi tɔ̃ ni, ma do gulu nɛ bina. Ma ɔ nɛ mɔ tombo wi kala nyanga ni.

⁸ Dɔnggɔ yɔndɔ wi, mɛ a dɛa mɔ bɔ. Ma ɔ nɛ kɛ mɔ kpua ta dɛ tɛ lasi we da ma ni.

⁹ Gba we kɛ ma yolo kɔ nu yɔndɔ wi ni, ma 'danga ɔ nɛ tɛ̃ kɛ wi bá dɔ̃ 'bia dɛ kɔ̃ ɛ ni.

¹⁰ Gã wi kɛ a kala oyɔnda wi li toe 'da a, nɛ a sáká gɔ ni, a hã ngamɔ hã owinɔ 'da a vɛ̃.

¹¹ Yɔndɔ wi gili tɛ̃ a 'da yɔndɔ dɛa mɔ tɛ̃ a, ɔ nɛ kɛ tolo ɔ̃lɔ̃ ia, nɛ a gili tɛ̃ a we nyɔngɔ 'bɔ ɔ̃lã olo a ni vɛ̃ ni.

¹² Fala kɛ mɔ kpa ngba mɔ do wi kɛ a lengge na, ɛ do hã zã wena, nɛ nde a do hã bina ni, nɛ mɔ ĩ na, gɛnɛ kɔ yɔndɔ wi, nɛ a kpa sɛ dia mɔ nɛ ngɔ a.

Tɛlɛ tɛ sulu wi

¹³ Sulu wi dungu dɛ tɔa, nɛ a na, gɔ̃̀ nza ni boe.

¹⁴ Sulu wi ɔ nù, nɛ a kifi tɛ̃ a dɛ kpo olo a ni iko, ɔ nɛ kɛ gbangga nu tɔa hũi, nɛ ma kpe dɛ olo nɛ ni.

¹⁵ Sulu wi fi kɔ̃ a kɔ sani, nɛ a kɔtɔ nyɔngɔmɔ, nɛ nde a do ngawi we ba dɛ nu a bina.

¹⁶ Sulu wi lengge na, ɛ do hã zã nɛa ngɔ Owele sambo kɛ wa gese nu we do hã zã ngboo ni.

Mbe gele gba wenɔ

¹⁷ Fi nu mɔ kɔ we kɛ ma zɔ̀ mɔ gɔ ni, ma ɔ nɛ kɛ mɔ ba tolo do zala a ni.

^18-19 Wele kɛ a ɔlɔ ngba a do'do, nɛ a tɔ̃ na: “Mi dɛ́ sɔ sa iko” ni, a wia kɔ̃ do wi bɔ, kɛ a dɛ sa da nzabele do a li kpili ni.

²⁰ Fo gua bina, nɛ we ma bi sɛ. Fo 'dã kɔa nu bina, nɛ kpawe sɛ bina.

²¹ Gua do kalĩ ma damala we na, ma nyɛ. Nɛ wi 'dã kɔa nu hã a damala kpawe na, ma hɔ.

²² Zele 'dã we tɛ wele, ma ɛ̃fɛ̃ tɛ wi ɔ nɛ nyɔngɔ mukate ni.

²³ Ɛ̃fɛ̃ lɛnggɛ kɛ ma usu 'dã hã ni, ma ɔ nɛ fɛ̃a mɔ bolo kɛ wa nãlã ma dɛ 'do gili iko ni.

²⁴ Wi sɛnɛmɔ tɔ̃ lɛnggɛ dɛa na hã ngba a, nɛ nde do kɔ sila a, a fa we ɔkɔlɔ a.

²⁵ A tɔ̃ ɛ̃fɛ̃ lɛnggɛ hã mɔ, nɛ mɔ tɛ kɔ̃̀ gɔ, we kɛ linggamɔ zã a dè gɔ.

²⁶ A ĩ ti gu nwá ngɔ 'dã hã 'da a wena, nɛ nde dunguu, nɛ winɔ vɛ̃ wa ĩ sɛ fala 'dã hã 'da a.

²⁷ Wi kɛ a zã kɔ̃ dati ngba a ni, nɛ a wele nɛ a te sɛ kɔ nɛ. Nɛ wi kɛ a fa we kimili ta na, ma te ngɔ ngba a ni, nɛ ma te sɛ dɛ ngɔ a wele nɛ.

²⁸ Mɔ tɔ̃ tɛ wele, nɛ nde mɔ sɛnɛ a. Mɔ 'bili bɛlɛ dɛ zu wele, nɛ ma Sɔkpɔ sɛ do 'dã nɛ.