GBA WENƆ 25 - WE NU GALE 1995

Ombe gele gba wenɔ 'da Salɔmɔ

¹ Kɛ gɛ a ombe gele gba wenɔ 'da Salɔmɔ. Wi kɔma ma wi a owinɔ 'da Ezekiasi, nwa ngɔ nù Yuda.

² Lɛ dɔnggɔ Gale we mɛnɔ kɛ a dɛ ma, nɛ lɛ ĩ̀ ti gulu nɛ gɔ ni. Nɛ nde lɛ dɔnggɔ Onwanɔ we omɛnɔ kɛ wa tɔ̃ gulu nɛ hã lɛ dɛ nza ni.

³ Ɔ nɛ kɛ lɛ ĩ̀ ti Sɔkpɔ li nza gɔ, nɛ lɛ ĩ̀ 'bɔ ti Sɔkpɔ 'du lìnɔ gɔ ni, lɛ wè tɛ ĩ ti linggamɔ zã Onwanɔ gɔ.

⁴ Wa fo 'dɔlɔ zã fɛ̃a mɔ bolo, nɛ wi dɛ dula a dolo sɛ ma do dia mɔ.

⁵ Na mɛ ni, wa fo o'dã winɔ kɛ zã nwa, nɛ a dɛ sɛ bɔlɔ zu dɛa mɔ, nɛ to nwa 'da a ma nganda sɛ.

⁶ Fala kɛ mɔ tɛ dati nwa, nɛ mɔ tɛ bè tɛ mɔ li a na, ɛ a gã wi gɔ.

⁷ Fala kɛ nwa tɔ̃ hã mɔ na: “Mɔ tílí dɛ dati”, nɛ nde ki ni ma dia nɛa ngɔ kɛ a tɔ̃ hã mɔ na: “Mɔ ngbɔ dɛ 'do, kɔ mɔ hã fala hã wele kɛ a nɛa ngɔ mɔ” ni.

⁸ Fala kɛ mɔ zɔ wele tɛ dɛ mɔ, nɛ mɔ tɛ wɛlɛ tɛ mɔ we da a 'da wi gɔnɔ we i wɛla gɔ. Mba gɔ, fala kɛ mbe gele temɔɛ tɔ̃ na, wi ni dɛ̃ 'dã mɔ gɔ, nɛ mɔ dɛ sɛ nɛ nɛ nde?

⁹ Mɔ ba kafi do ngba mɔ, nɛ nɛ 'dáfá we nɛ dɛ ngbala nɛ do a. Lɛnggɛ kɛ ngba mɔ tɔ́a hã mɔ do usu nɛ ni, mɔ tɛ fì ma nza gɔ.

¹⁰ Mba gɔ, wi kɛ a zele ma ni, nɛ a tɔ̃ sɛ na, nu mɔ hãsã wena, nɛ sape nɛ é sɛ li mɔ ga.

¹¹ Lɛnggɛ kɛ mɔ doko do dia nɛ ni, ma ɔ nɛ dia iyaka kɛ wa dɛa do mɔ mbali mba do fɛ̃a mɔ bolo ni.

¹² Mbula kɛ wi hã zã tɔ̃ ma ni, ma dia zala wi kɛ a zele ni, ɔ nɛ pɛtɛ tabi mɔ gɛlɛ wi kɛ wa dɛa ma do mɔ mbali ni.

¹³ Wi nɛ to kɛ zu a bɔlɔ wena ni, a dia li nwa 'da a ɔ nɛ bila gɛ̃a lì nu wi kɛ a yula li wese, tɛ kala kpalɛ li fɔ ni.

¹⁴ Wi kɛ a kpo mbulu 'dɔlɔ mɔ wena, nɛ nde a dɛ́ ma gɔ ni, a ɔ nɛ kolo kɛ ma dĩ, nɛ nde ma tɛ́ gɔ ni.

¹⁵ Wi du sila wele we, nɛ ma kifi sila wi gɔnɔ we na, a zele lɛnggɛ nu a. Nɛ wi tɔ̃ lɛnggɛ do gɛ̃a sila wele we, nɛ ma mbɔkɔ zã wi kula li.

¹⁶ Mɔ kpa nɔ gɔlɔ, nɛ mɔ nɔ do li zuma nɛ. Mɔ nɔ wena, kɔ ma nɛ ngɔ sila mɔ, nɛ mɔ ɔ̃lɔ̃ sɛ.

¹⁷ Na mɛ ni, mɔ tɛ hɔ nu tɔa mɔ yali ngba mɔ 'do ngbɛ ɛ do 'do ngbɛ ɛ gɔ. We kɛ mɔ dɛ ni, nɛ mɔ 'danga sɛ li a do'do, nɛ a sɛnɛ sɛ mɔ.

¹⁸ Da ngba mɔ do bele ma 'danga ɔ nɛ mɔ zɛ a do dɔ te, tabi mɔ dumu a do du kɔya, tabi mɔ ndɔlɔ a do kpili ni.

¹⁹ 'Da fala mɔ kpa ngamɔ, kɔ mɔ gbini zã mɔ do wi kɛ a dɛ́ olo nu a gɔ ni, nɛ ma dé sɛ gɔ. Ma ɔ sɛ nɛ mɔ nyɔngɔ mɔ do gogo mɔ kɛ ma ya yaka, tabi mɔ yolo dɛ ngɔ nyanga mɔ kɛ ma gbi gbini ni.

²⁰ Ga zuma yangga do ngba soe 'bako, mɛ a yɔndɔ dɛa mɔ. Ma ɔ nɛ kɛ wele hɔlɔ gã tulu 'da a do 'da fala gɛ̃ɛ, tabi wa a tɔ̃ li dani ni.

²¹ Fala kɛ wɔ ba wi sɛnɛ mɔ, nɛ mɔ hã nyɔngɔmɔ hã a. Kɔ fala kɛ wɔ li ba a, nɛ mɔ hã lì hã a.

²² Nɛ dia mɛ mɔ dɛa ni, ma ɔ sɛ nɛ mɔ u kalĩ we dɛ zu a ni. Nɛ nwa hã a si sɛ olo nɛ hã mɔ.

²³ Li nza tũ si 'biti gba wese ia, nɛ nde kolo zɔ́lɔ́ sɛ tɛ nɛ gɔ. Mɔ tɔ̃ ngalangba wena, nɛ zã winɔ zɔ́lɔ́ sɛ nɔ̃lɔ̃ dɛ tɛ mɔ gɔ.

²⁴ Ɔ nza ti da dia nɛa ngɔ mba kɔ tɔa do wuko tɔlɔ go'do we.

²⁵ Zele dia sako kɛ ma yula du wala ni, ma dia ɔ nɛ bila gɛ̃a lì nu wi kɛ kɔ gɛlɛ a kula kparr ni.

²⁶ Wi bɔlɔ zu kɛ a nda'ba tɛ̃ a do 'dã wi ni, a ɔ nɛ dia zu lì, tabi kɔ̃ lì kɛ ma dɛa gbutu do'do ni.

²⁷ Fa dɔ̃lɔ̃ li wena, ma 'danga ɔ nɛ kɛ mɔ nɔa nɔ gɔlɔ nɛa ngɔ sila mɔ ni.

²⁸ Wi kɛ a ĩ̀ ti kunu sila a do 'da fala nɔ̃lɔ̃ zã gɔ ni, a ɔ nɛ le kɛ fo ngboo 'do nɛ bina, nɛ wa bi ma ni.