GBA WENƆ 24 - WE NU GALE 1995

19

¹ Mɔ tɛ yàmbàlà dɛa mɔ tɛ o'dã winɔ gɔ, nɛ mɔ tɛ bà 'bia do wa gɔ.

² We kɛ wa fa kpa we, nɛ wa tɔ̃ fai a lɛnggɛ dɛ 'dã mɔ.

20

³ Ma wia na, mɔ ɔ do hã zã do dia linggamɔ, sɛ nɛ kɔ tɔa 'da mɔ ma de sɛ de.

⁴ Ma wia na li mɔ ĩ mɔ, sɛ nɛ mɔ kala sɛ okpamɔ kɛ ma de wena, nɛ ma do gã gole ni, nɛ ma dunu kɔ tɔa 'da mɔ de.

21

⁵ Hã zã mɔ wele ma hã ngawi hã a, nɛ ma dɛ na, a nganda dɛ dati.

⁶ Mɔ kɔ̃ we nɛ bolo nde, nɛ mɔ 'dáfá tɛ mɔ do dia nɛ dati sɛ nɛ de. Nɛ mɔ zele odɔa wi poe mɔ dati, sɛ nɛ mɔ kpasa sɛ de.

22

⁷ Yɔndɔ wi wè tɛ ĩ ti 'du gulu lɛnggɛ nu wi hã zã gɔ. Ma kɛ 'da fala tɔ̃ ngbangga li fandanɔ, nɛ nde yɔndɔ wi wè tɛ 'bã nu ɛ ngɔ lɛnggɛ gɔ ni.

23

⁸ Wi kɛ a fa kpa we fai ni, nɛ wa sa sɛ li a na, wi 'dã hã.

⁹ Yɔndɔ wi lengge fai we dɛ 'dã mɔ. Nɛ wi kɛ a zɔ mɛnɔ vɛ̃ li a yala iko ni, nɛ wa sɛnɛ sɛ a.

24

¹⁰ Fala kɛ mɔ ngo tɛ mɔ dati ngamɔ gɔ, nɛ nde ma be na, mɔ do kpã sila bina.

25

¹¹ Mɔ zɔ wi kɛ wa 'bili we hã a do bɛlɛ na wa gbɛ a ni, nɛ mɔ dɛ́ nganda we kpasa a.

¹² Kɔ fala kɛ mɔ tɔ̃ na, ɛ zèlè we nɛ gɔ, nɛ nde Gale ĩ ti kɛ ma la ni. We kɛ a hã a zɔ kɔ sila mɔ, nɛ a ĩ ti linggamɔ zã mɔ. A 'bili we 'da wele do 'da dɛa to tɛ̃ a.

26

¹³ Be 'daa, mɔ nyɔ́ngɔ́ nɔ gɔlɔ, we kɛ mɛ a dia nyɔngɔmɔ. Nɛ nde ɔ nɛ kɛ nɔ gɔlɔ ɛ̃fɛ̃ nu mɔ ni,

¹⁴ nɛ hã zã ma 'dafa dungi 'da mɔ. Fala kɛ mɔ ɔ do hã zã, nɛ mɔ dungu sɛ do dia nɛ, nɛ mɔ kpa sɛ mɛnɔ kɛ mɔ ia sila mɔ ngɔ nɛ ni.

27

¹⁵ Aa mɔ, 'dã wi gɛ, mɔ tɛ dùngù do wi bɔlɔ zu, kɔ mɔ ɔlɔ a, kɔ a 'danga tɔa 'da a gɔ.

¹⁶ Wi bɔlɔ zu wia do te li ngamɔ 'do ngbɛ do 'do ngbɛ ɛ, nɛ a kulu sɛ ngɔ. Nɛ nde kɛ 'da 'dã wi, ma ɔ́ ni gɔ. A te li ngamɔ fala kpo, nɛ a kúlú sɛ 'bɔ mbé ngɔ gɔ.

28

¹⁷ Mɔ tɛ dɛ̃ yangga, we kɛ wi sɛnɛ mɔ tia ni gɔ. Nɛ zã mɔ tɛ ɔ̀ nyɛɛ, we kɛ a kpa 'bako ni gɔ.

¹⁸ NWA Gale zɔ na mɛ ni, nɛ ma dé sɛ tɛ̃ a gɔ, nɛ a la sɛ fala hã etumbu hã wi sɛnɛ mɔ do'do.

29

¹⁹ Mɔ tɛ fà na, sila mɔ zɛ́lɛ́ dɛ tɛ o'dã winɔ gɔ, nɛ mɔ tɛ dɛ̃ bɔnɛ dɛ tɛ wa gɔ.

²⁰ We kɛ wa do mɔ gala sɛ wa 'do nza bina. Nɛ kpasi 'da wa ma bi sɛ ɔ nɛ we bi nɛ ni.

30

²¹ Be 'daa, mɔ dɔ́nggɔ́ Gale, nɛ mɔ dɔnggɔ 'bɔ nwa ngɔ nùi. Mɔ tɛ mbà ngba mɔ do owinɔ wa dɛ nga zu dɛ tɛ wa ni gɔ.

²² We kɛ 'bako ma kpa sɛ wa fala kpo do ti. Nɛ wele ĩ̀ ti ngamɔ kɛ Gale do nwa ngɔ nùi, wa nɛ hã ma hã wa ni gɔ.

Mbe gele mbulanɔ 'da Owi hã zãnɔ

²³ Owi hã zãnɔ wa tɔ́a na: Si 'do wele we gɔnɔ dia we hã a, ma dè gɔ.

²⁴ Fala kɛ wi gɔnɔ we tɔ̃ hã wi dɛ 'dã mɔ na: “Mɔ do 'dã mɔ bina,” nɛ winɔ vɛ̃ wa dã sɛ a, nɛ wa sɛnɛ a.

²⁵ Nɛ nde Owi gɔnɔ wenɔ kɛ wa hã etumbu hã 'dã wi ni, wa kpa sɛ de mɔ, nɛ winɔ vɛ̃ wa dɔnggɔ sɛ wa.

²⁶ Mɔ gese we hã yali ngba mɔ do wala olo nɛ ngboo, nɛ ma be sɛ na, mɔ kɔ̃a gɛnɛ a.

²⁷ Dati kɛ na, mɔ dɛ tɔa we ɔ kɔ nɛ, nɛ mɔ wá fɔ, nɛ mɔ mi kpalɛ, takɔ mɔ kpa nyɔngɔmɔ sɛ nɛ de.

²⁸ Mɔ tɛ dà ngba mɔ yala iko gɔ, nɛ mɔ tɛ 'bìlì 'bɔ bele dɛ zu a gɔ.

²⁹ Fala kɛ mɔ tɔ̃ na: “Mi dɛ sɛ do a ɔ nɛ kɛ a dɛa do mi ni, nɛ mi gese sɛ olo mɛ a dɛa ni hã a,” nɛ nde mɔ tɔ̃̀ de gɔ.

Tɛlɛ tɛ sulu wi

³⁰ Ngba soe kpo, nɛ mi la do kɛ zã fɔɛ 'da mbe sulu wi kpo, kɛ a yɔndɔ wena.

³¹ Mi nɛa we ka mɔ, nɛ nde otɛ̃ do o'dã wɔkɔsɔ ma kpa do kɔ fɔɛ 'da a vɛ̃. Nɛ ngboe kɛ ma zĩ fɔɛ takpa ni, ma gbini do'do.

³² Mi nɛa we zɔ ni, nɛ mi kpa linggamɔ, nɛ mi yambala mɔ, nɛ mi na:

³³ “Aa mɔ wi gɛ, mɔ ɔ nù, nɛ mɔ umu li mɔ sĩ. Tabi mɔ kasa kɔ mɔ we kpe tɛ mɔ.

³⁴ Nɛ nde mɔ ĩ na, 'da fala kɛ mɔ 'bana tɛ ɔ nu ni, nɛ sã ma gbanga sɛ mɔ, ɔ nɛ kɛ wi zũ gbanga do wele ni.”