GBA WENƆ 23 - WE NU GALE 1995

¹ 'Da fala mɔ dungu we nyɔngɔ mɔ do gã wi, nɛ ma wia na, mɔ ĩ ti tɛlɛ tɛ wi dati mɔ ni.

² Mɔ ɔ wi dɛ nga wɔ, nɛ mɔ dĩlĩ fala tɛ mɔ.

³ Mɔ tɛ dɛ̃ wɔ tɛ dia nyɔngɔmɛ 'da a gɔ. We kɛ mbe gɔ, nɛ nde wa ha ma hã mɔ we zele we zã mɔ.

7

⁴ Mɔ tɛ fà kpamɔ do nga nɛ, kɔ mɔ mbɔkɔ gɔ. Nɛ sila mɔ tɛ ɔ̀ 'bɔ ngɔ we nɛ gɔ.

⁵ Mba gɔ, mbili ma 'báná kɔ̃ wele fai gɔ. Ma e dati a kɛ na, mɔ zɔ ma ngboo ni. Ma ɔ nɛ sala 'baka ma boe ni, nɛ ma bũlũ nyɛlɛ dɛ ngɔ i, ɔ nɛ ziki ni.

8

⁶ Mɔ tɛ mbà nu nyɔngɔmɔ do wi dɛ sila gɔ. Nɛ mɔ tɛ dɛ̃ wɔ tɛ dia nyɔngɔmɔ kɛ a hã ma hã mɔ ni gɔ.

⁷ Mba gɔ, a ha ma hã mɔ do dia sila gɔ. A tɔ̃ hã mɔ na: “Mɔ nyɔ́ngɔ́ mɛ, nɛ mɔ nɔ́ dɔɛ!” Ĩ na, kɔ sila a kɔ̃̀ gɛnɛ dia mɔ mɔ́ mɔ gɔ.

⁸ 'Do nɛ, nɛ mɔ ɔ́lɔ́ sɛ nyɔngɔmɛ mɔ nyɔngɔ ni vɛ̃. Nɛ do kɛ mɔ tɔ̃a dia zu li a ni, ma ɔ sɛ yala iko.

9

⁹ Mɔ tɛ wèlè we dɛ zala yɔndɔ wi gɔ. We kɛ a ĩ́ sɛ ti dia gulu wenɔ 'da mɔ gɔ.

10

¹⁰ Mɔ tɛ tìlì ã ngbala fɔ sanga tɛ ngba mɔ do obe gulanɔ, nɛ mɔ bá nùi 'da wa gɔ.

¹¹ Mba gɔ, NWA Gale kɛ a bi ngɔ wa ni, a nganda wena. Nɛ a hã a nɛ tɔ̃ ngbangga ngɔ wa do mɔ.

11

¹² Mɔ hã sila mɔ we yambala mɛ wa be hã mɔ ni. Nɛ mɔ hũi zala mɔ we zele lɛnggɛ hã zãnɔ wa tɔ̃ hã mɔ ni.

12

¹³ Mɔ tɛ dà'bà tɛ mɔ we hã etumbu hã be gɔ. Zufa kɔ̃ mɔ gbɛ́ sɛ a gɔ.

¹⁴ Nɛ nde ma kpasa sɛ a na, a tɛ bà wala fio gɔ.

13

¹⁵ Be 'daa, fala kɛ mi zɔ na, mɔ ba tɛ mɔ we kpa hã zã, nɛ mi dɛ sɛ yangga wena.

¹⁶ Nɛ fala kɛ mi zele mɔ te tɔ̃ lɛnggɛ hã zã ni, nɛ zu mi ma dɛ sɛ suu.

14

¹⁷ Mɔ tɛ 'bã̀ dɛa to tɛ 'dã winɔ go. Nɛ nde tũ kpo kpo mɔ dɛ́ kili NWA Gale.

¹⁸ Mɔ dɛ na mɛ ni, nɛ mɔ kpá sɛ sape gɔ, nɛ mɔ dungu sɛ do dia nɛ fai.

¹⁹ Be 'daa, mɔ zele mi. Mɔ fa we ta wi hã zã, nɛ mɔ ba li bɔlɔ wala.

15

²⁰ Mɔ tɛ hɔ 'da owi bá dɔ̃nɔ do owi dɛ nga wɔnɔ gɔ.

²¹ We kɛ wa hɔ sɛ owi sã. Nɛ hɛ̃lɛ̃nɔ 'da wa, ma e sɛ ɛ̃a tulu tɛ wa.

16

²² Mɔ zélé baa mɔ, we kɛ kpasi 'da mɔ dɛ kɔ̃ a. Mɔ tɛ zɔ̃ naa mɔ li mɔ yala, we kɛ a dɛa gbɛlɛ ia ni gɔ.

²³ Mɔ yámbálá we tɔ̃ gbãlã we, nɛ mɔ lengge mɔ dati, nɛ mɔ fa hã zã we ĩ ti mɔ. Kɔ mɔ yambala ma do'do, nɛ mɔ tɛ zɔ̀ ma li mɔ yala gɔ.

²⁴ Wi ko wi bɔlɔ zu, do wi hã zã, a a wi yangga.

²⁵ Mɔ hã yangga ni hã baa mɔ do naa mɔ. E kɔ zu wi ko mɔ ma dɛ suu.

17

²⁶ Be 'daa, mɔ gbíní zã mɔ do mi, nɛ mɔ dɛ yangga we nɛ 'do dɛa to tɛ mi.

²⁷ Mɔ ĩ́ na, wuko makango, a ɔ nɛ 'du kɔ̃ kɛ wele te kɔ nɛ, nɛ a fe ni.

²⁸ A yolo li wala we wɛ zu wi wilinɔ ɔ nɛ wi zũ ni. Nɛ a 'danga gba gili owi wilinɔ wena.

18

²⁹ Wi kɛ a dungu kɔ 'bako, nɛ a sa tɛ̃ a fai ni a wio nde? Wi kɛ a kpa we, nɛ a ala nu a fai ni a wio nde? Wi kɛ a wè sɔ do kpa zɛa wi gɔ ni a wio nde? Nɛ wi kɛ a zɔ mɔ tufulufu ni a wio nde?

³⁰ Wi a wele kɛ a lá fala nɔ dɔ̃ gɔ, nɛ a fa fai we nɔ nga dɔ̃ ni.

³¹ We duzu ma, da dɛ kɔ mɔ zɔ́ dia li dɔ̃ kɔ kɔpɔ, kɔ ma ɔlɔ mɔ, nɛ mɔ nɔ ma gɔ. Nɛ dɔ ɛ̃fɛ̃ dɔ̃ɛ kɛ ma zĩlĩ kɔ wala gɛlɛ mɔ ni, ma ɔ́lɔ́ mɔ gɔ.

³² We kɛ do Sɔkpɔ nɛ vɛ̃, nɛ ma ba sɛ mɔ ɔ nɛ kɛ dã gɔ́ gɔmɔ wele, nɛ ma ba a ni.

³³ Nɛ li mɔ ma zĩ sɛ, nɛ zu mɔ vĩ, nɛ mɔ wele we kɛ gulu nɛ bina ni.

³⁴ Mɔ zɔ sɛ ɔ nɛ kɛ mɔ a tɛ 'bɛ̃lɛ̃ zu te kɛ ma yaka do mɔ ni.

³⁵ Nɛ mɔ tɔ̃ sɛ na: “Wa zɛa mi, nɛ wa e dani tɛ mi, nɛ nde mi ĩ̀ fala nɛ gɔ. Mi nɛ kulu ngɔ we gɔ 'bɔ mbé dɔ̃ soe ki nge nde?”