GBA WENƆ 21 - WE NU GALE 1995

¹ Linggamɔ zã nwa ngɔ nù ma ɔ dɛ kɔ̃ Gale nɛ fua lì ni. Ma kɛ nwa ni a dɛ mɛnɔ vɛ̃ kɛ Gale kɔ̃a na a dɛ ni.

² Wele lengge na, mɛ kɛ ɛ dɛ vɛ̃ ni, ma a dia. Nɛ nde NWA Gale hã a zɔ kɔ sila wele.

³ Ɔ wi bɔlɔ zu do gbisa zu dia tɛ NWA Gale nɛa ngɔ hã odɔnggamɔ hã a.

⁴ Mɛ kɛ ma be na, wele a 'dã wi ni, mɛ a wali do nga zu 'da a.

⁵ Wele kɛ a lengge mɔ dati sɛ, nɛ a dɛ mɔ de ni, a kpa sɛ mɔ wena. Nɛ nde wele kɛ a dɛ mɔ dɔ̃ dɔ̃ ni, a zɔlɔ sɛ mɔ.

⁶ Wi kɛ a 'bili bɛlɛ, nɛ a ɔlɔ ngba a takɔ a kpa mɔ wena ni, a zɔlɔ hã zã, nɛ a fa fio.

⁷ O'dã winɔ wa kɔ̃a kpa we, nɛ nde ma Sɔkpɔ hã wa do dia nɛ gɔ, we kɛ wa bɛ̃a dɛ bɔlɔ zu dɛa mɔ.

⁸ Li wala 'da o'dã winɔ ma gu gu. Nɛ nde kɛ 'da odia winɔ ma ɔ bɔlɔ.

⁹ Ɔ ti da dia nɛa ngɔ mba kɔ tɔa do wuko tɔlɔ go'do we.

¹⁰ 'Dã wi fai do wɔ dɛ 'dã mɔ. Gɛnɛ kɔ yali ngba a ngboo, nɛ a dɛ 'dã mɔ do a iko.

¹¹ Yɔndɔ wi zɔ kɛ wa zɛ wi dɛ ngatɛ ni, nɛ a kpa sɛ hã zã. Wi hã zã yambala mɔ, nɛ li a sɔ̃ dɛ dati.

¹² Gale kɛ a a wi bɔlɔ zu ni, a zɔ mɛnɔ ma la kɔ tɔa 'da o'dã winɔ ni, nɛ a dɛ sɛ na, ngamɔ kpa wa.

¹³ Wi kɛ a zele hiamɔ gɛlɛ wi 'bako, nɛ nde a lénggé nɛ gɔ ni, hã fala kɛ a kpa tɛ mɛ 'bɔ ngamɔ, kɔ a sa mɔ na wa gala ɛ, nɛ nde fo wi gese sɛ nu nɛ hã a bina.

¹⁴ Fala kɛ zã wele nɔ̃lɔ̃ dɛ tɛ mɔ, nɛ mɔ 'dɔlɔ dia mɔ hã a do usu nɛ, nɛ sila a ma gɛ̃ sɛ.

¹⁵ Wi bɔlɔ zu zɔ na, wa gɔnɔ we do bɔlɔ nɛ, nɛ ma hã yangga hã a. Nɛ nde o'dã winɔ wa zɔ ma, nɛ sila wa 'bɔ do'do.

¹⁶ Wi kɛ a ɛlɛ tɛ̃ a li wala hã zã do'do ni, nɛ a Sɔkpɔ sɛ do le 'da ofionɔ i.

¹⁷ Mɔ dɛ yangga kpa dia mɔ wena, nɛ sã ma ba sɛ mɔ. Tabi mɔ lengge tati a nyɔngɔ mɔ, do nɔ dɔ̃ iko fai, nɛ nde mɔ hɔ́ sɛ wi kpamɔ gɔ.

¹⁸ 'Dã mɔ kɛ 'dã wi dɛ hã dia wi ni, ma gese tɛ̃ ɛ dɛ zu a wele nɛ.

¹⁹ Ɔ li go zu mɔ kpo dia nɛa ngɔ ɔ fala nɛ kpo do wuko tɔlɔ go'do we, kɛ a nɔ̃lɔ̃ zã wi wena ni.

²⁰ Kɔ tɔa 'da wi hã zã ma dunu do kpamɔ, do dia mɔ. Nɛ nde yɔndɔ wi kpa mɔ, nɛ a 'danga ma do ti iko.

²¹ Mɔ dɛ mɔ do dia zã, do gbisa zu, nɛ 'do mɔ ma nyɛlɛ sɛ, nɛ winɔ wa dɔnggɔ sɛ mɔ, nɛ wa dɛ sɛ mɔ ɔ dia.

²² Nwa bolo kɛ a do hã zã ni, a wia do bi gba le kɛ Owi nga wi wa zɔ mɔ tɛ nɛ ni. Nɛ a gbini sɛ gba ngbo 'do le ni, kɛ owi kɔ nɛ wa gbini zã wa do nɛ ni.

²³ Mɔ fɔmɔ lɛnggɛ nu mɔ, nɛ nde mɔ kpá sɛ ngamɔ gɔ.

²⁴ Wi kɛ a do wali, nɛ a be tɛ̃ a wena ni, a zɔ mɛnɔ vɛ̃ li a yala iko, nɛ a dɛ mɔ do ngatɛ fai.

²⁵ Mɛ ma gbɛ sulu wi mɛ a linggamɔ zã a. We kɛ a dɛ́ to we kpa mɛnɔ kɛ a do hɛ̃lɛ̃ nɛ ni gɔ.

²⁶ A 'danga sa 'da a we a sila a ngɔ mɔ mɔ́ ngba a iko. Nɛ nde kɛ 'da wi bɔlɔ zu, a dɛ gbɛla mɛnɔ 'da a.

²⁷ NWA Gale sɛnɛ dɔnggamɔ kɛ 'dã wi hã ma hã a ni. We kɛ a hã ma do 'dã kɔ sila.

²⁸ Temɔɛ bɛlɛ wele we, nɛ wa ba kafi nu a. Nɛ nde wi kɛ a tɔ̃ gbãlã we ni, nɛ wa zele sɛ we nu a.

²⁹ 'Dã wi ba tɛ̃ ɛ na, ɛ wia. Nɛ nde wi bɔlɔ zu ĩ na, wala ɛ yɛnggɛ nɛ ni, ma a bɔlɔ.

³⁰ Fala kɛ mɔ dɛ mɛ kɛ zã nwa Gale sɛnɛ ma ni, nɛ nde hã zã, do ĩ ti mɛ 'da mɔ ma yala iko.

³¹ Wele 'dafa ombalata we nɛ bolo, nɛ nde wi a NWA Gale hã a dɛ na, wele nɛ ngɔ wi sɛnɛ a.