GBA WENƆ 20 - WE NU GALE 1995

¹ Mɔ nɔ dɔ̃ ia, nɛ mɔ wele sɛ we wena, nɛ mɔ ma ngɔ dɛ ngatɛ. Nɛ wi kɛ dɔ̃ ba a, nɛ a hɔ sɛ yɔndɔ wi.

² Zã nwa ngɔ nù nɔ̃lɔ̃, nɛ ma hã kili hã wele, ɔ nɛ hiamɔ gɛlɛ gbɔgbɔ ni. Wi kɛ a tulu nwa ni, a fa fio.

³ Mɔ a wi dĩ, nɛ mɔ tɛ lè kɔ mɔ̃lã gɔ. Yɔndɔ wi sɛ nɛ a le kɔ mɔ̃lã de.

⁴ Sulu wi wá mɔ do li zɔlɔ nɛ gɔ, kɔ ma hɔ 'da fala kala kpalɛ, nɛ nde a kpá mɔ gɔ.

⁵ Linggamɛnɔ kɔ sila wele ma usu tɛ̃ ɛ, ɔ nɛ zã lì kɛ ma 'du wena ni. Wi kɛ a wia do ĩ ti nɛ, wi a wi hã zã.

⁶ Owele wena wa lengge na, lo a Owi dia zã. Nɛ nde we kpa wi dia zã ngboo ni, ma nganda wena.

⁷ Fala kɛ wele yɛnggɛ do bɔlɔ nɛ, do gbisa zu, nɛ obe olo a wa dungu sɛ do dia nɛ.

⁸ Fala kɛ nwa dungu nù we gɔnɔ we, nɛ li a kpa wi dɛ 'dã mɔ dɛ ngɔ gɛ do ti.

⁹ Wi kɛ a wia we tɔ̃ na, ɛ a dia wi, nɛ ɛ dɛ́ 'dã mɔ gɔ ni a wio nde?

¹⁰ NWA sɛnɛ wi kɛ a fo nu kilo mɛnɔ 'da winɔ ni.

¹¹ Gɛnɛ kɔ bi be sĩ, nɛ wa ĩ sɛ ti dia dɛa mɔ tɛ̃ a.

¹² NWA dɛa gbali wi we zɔ do mɔ, nɛ a dɛa zala wi we zele do we.

¹³ Mɔ si tɛ ɔ yala iko, nɛ mɔ hɔ sɛ wi sã. Mɔ kulu ngɔ do dia 'da fala, nɛ mɔ nyɔngɔ sɛ mɔ do dia nɛ.

¹⁴ Wi oso mɔ tɔ̃ na: “Gole mɛ gɛ ma gã wena.” Nɛ nde a oso ma, kɔ a nɛ la do'do, nɛ a dɔnggɔ tɛ̃ a na, ɛ usa do dia gole.

¹⁵ Wa oso mɔ mbali, do iyakanɔ do gã gole, nɛ nde lɛnggɛ nu wi hã zã ma dia nɛa ngɔ ma.

¹⁶ Fala kɛ mbe wele kɔ̃ we ba ku'da olo gele wi dɛ zu a, nɛ ma wia na a ba kpamɛ 'da a, nɛ a e do tikɔɛ ku'da olo wi ni.

¹⁷ Nyɔngɔ mɔ zũ ɛ̃fɛ̃ dati wena, kɔ 'do nɛ, nɛ ma ɔ nɛ kɛ mɔ sua kɛnzɛ dunu kɔ nu mɔ ni.

¹⁸ Dati dɛ mɔ, nɛ mɔ zele mbe ongba mɔ ngɔ nɛ sɛ. Mɔ kɔ̃ we nɛ bolo, nɛ mɔ 'dafa tɛ mɔ dati do dia nɛ, sɛ nɛ de.

¹⁹ Wi kɛ a tɔ̃ tɛ wi ni, 'da kala kɛ a ba usu lɛnggɛ kɔ a tɔ̃ hã gele wele gɔ. Mɔ tɛ bà 'bia do wi kɛ a wele we wena ni gɔ.

²⁰ Mɔ kana nu mɔ tɛ baa mɔ do naa mɔ, nɛ mɔ zɔ sɛ kpasi 'da mɔ tɛ bi nɛ, ɔ nɛ kɛ mwinda bi, nɛ gba tũ kpe olo nɛ ni.

²¹ Kpamɔ kɛ mɔ kpa ma do mbɔkɔ tɛ iko, nɛ nde tɛ mɔ zɛ̀lɛ̀ we nɛ gɔ ni, nɛ do Sɔkpɔ nɛ, ma hã sɛ yangga hã mɔ gɔ.

²² Mɔ tɛ gèsè olo 'dã mɔ kɛ wele dɛ do mɔ ni gɔ. Nɛ nde mɔ gbini zã mɔ do NWA Gale, nɛ a yolo sɛ 'do mɔ.

²³ Gale sɛnɛ wi be gole kɛ a e mɔ nu kilo do bɛlɛ ni wena.

²⁴ Dungu 'da wele ma dɛ tambala kɔ̃ NWA Gale. Kɔ ní a wele nɛ dɛ fala ĩ ti wala kɛ a nɛ dɛ te'de ni nɛ nde?

²⁵ Ma wia na, mɔ lengge mɔ dati, sɛ nɛ mɔ ĩ ti kpo mbulu hã NWA Gale de. Mɔ dɛ ni gɔ, nɛ do 'do, nɛ mɔ sa sɛ tɛ mɔ.

²⁶ Nwa kɛ a do hã zã boe ni, a ĩ ti Owi dɛ 'dã mɛnɔ, nɛ a hã etumbu hã wa. Nɛ nde a ĩ 'bako hã wa gɔ.

²⁷ NWA Gale ufu bũ kpasi 'da a dɛ kɔ zã wele, nɛ ma ɔ nɛ mwinda ni, takɔ wele ĩ ti 'du kɔ sila a wele nɛ.

²⁸ Nwa ngɔ nù kɛ a wi dia sila, nɛ a dɛ olo nu a, nɛ a dɛ toe 'da a do bɔlɔ nɛ ni, nɛ dɛa to nwa 'da a ma nganda sɛ.

²⁹ Ngawi mɛ a dɔ̃lɔ̃ li we obe zagbãlãnɔ. Nɛ mbu mɛ a dɔ̃lɔ̃ li we okpasa winɔ.

³⁰ Hã etumbu ma wia do kpasa 'dã wi. Nɛ zɛa wi ma wia do bɔlɔ linggamɔ zu wele.