GBA WENƆ 2 - WE NU GALE 1995

Hã zã kpasa wele kɔ 'dã mɔ

¹ Be 'daa, mɔ zélé wenɔ mi be hã mɔ gɛ, nɛ ta zu mɔ tɛ èlè ngɔ mbulanɔ mi tɔ̃ hã mɔ ni gɔ.

² Mɔ zélé wenɔ kɛ ma do hã zã ni, nɛ mɔ dɛ́ nganda we ĩ ti nɛ.

³ Mɔ bá tɛ mɔ vɛ̃ we fa hã zã, takɔ mɔ ĩ ti gulu mɛnɔ,

⁴ Mɔ fá mɛnɔ ni do ngawi 'da mɔ vɛ̃, ɔ nɛ kɛ wele fa do mbili, tabi mɔ olo gã gole kɛ wa usu ma usu ni.

⁵ Mɔ dɛ ní, nɛ mɔ ĩ sɛ ti tɛlɛ tɛ dɛ kili NWA Gale, nɛ mɔ yambala sɛ we ĩ ti a.

⁶ Wi kɛ a hã hã zã hã wele, wi a NWA Gale. A be mɔ hã wele na, a ĩ ti mɛnɔ, nɛ a zele gulu nɛ ngboo.

⁷ NWA gala Owi bɔlɔ zunɔ, nɛ a kele zu wanɔ wa dɛ mɔ do wala olo nɛ ni.

⁸ A gbaka wanɔ wa dɛ ngba wa do li zuma nɛ ni, nɛ a fɔmɔ winɔ kɛ wa hã te wa hã a ni.

⁹ Be 'daa, mɔ zélé mi, nɛ mɔ ĩ sɛ ti gbãlã we. Nɛ mɔ dɛ sɛ mɔ kɛ ma a dia, nɛ ma a bɔlɔ ni. Nɛ mɔ ĩ sɛ ti bɔlɔ wala kɛ ma wia na, mɔ ba nɛ ni.

¹⁰ Mɔ hɔ sɛ wi hã zã, nɛ ĩ ti mɛ 'da mɔ, ma hã sɛ yangga hã mɔ.

¹¹ Mɔ ĩ sɛ ti gulu mɛnɔ, nɛ gbãlã zã mɔ ma siki sɛ, nɛ ma gala sɛ mɔ wena.

¹² Nɛ ma amba sɛ mɔ na, mɔ tɛ dɛ̀ 'dã mɔ gɔ. Nɛ ma dɛ sɛ na, mɔ tɛ kɔ̀lɔ̀ do Owi 'bili bɛlɛ gɔ.

¹³ Nɛ ma dɛ sɛ 'bɔ na, mɔ tɛ kɔ̀lɔ̀ do wanɔ kɛ wa fo tɛ wa li bɔlɔ wala, nɛ wa ba li wala 'dã mɔ ni gɔ.

¹⁴ Owinɔ ni wa dɛ yangga dɛ 'dã mɔ, nɛ wa dɔnggɔ tɛ wa do yia dɛa mɛnɔ wa dɛ ni.

¹⁵ Dɛa mɔ tɛ wa dè gɔ, nɛ wa yɛnggɛ do li gu walanɔ.

¹⁶ Be 'daa, mɔ zélé mi, nɛ mɔ we sɛ we kpãlã sila mɔ dati wuko kɛ a a kɛnɛ mɔ gɔ, nɛ a fa we ɔlɔ mɔ do ɛ̃fɛ̃ lɛnggɛ nu a ni.

¹⁷ Mɛ a wuko kɛ a dɔnggɔ wili a gɔ, nɛ a 'danga mbulu ba wili kɛ a kpua zi ma gbali Gale ni.

¹⁸ Mɔ le kɔ tɔa 'da a, nɛ nde mɔ lia kɔ gba tũ. Mɔ kɔlɔ do a, nɛ nde mɔ kɔlɔ do fio.

¹⁹ Wele kɛ a nɛ we zɔ a ni, a kpóló 'bɔ tɛ̃ a 'do gɔ. Nɛ wala kpasi 'bɔ we wi ni bina.

²⁰ Ma kɛ ma wia na, mɔ ba wala olo osaka winɔ, nɛ mɔ yambala dɛa to tɛ wa.

²¹ We kɛ wele nùi gɛ sɛ a mɔ́ odia winɔ, kɛ zu wa a bɔlɔ ni, nɛ wa ɔ sɛ ngɔ nɛ fai.

²² Nɛ nde o'dã winɔ kɛ wa bɛ̃a gɛnɛ Gale ni, a ndaka sɛ wa ngɔ nɛ do'do.