GBA WENƆ 17 - WE NU GALE 1995

¹ Nyɔngɔ be 'bulu nyɔngɔmɔ kɔ tɔa kɛ ma do dungu fio ni dia nɛa ngɔ nyɔngɔ dia mɔ kɔ tɔa kɛ ma dunu do kpawe ni.

² Wi dɛa to kɛ a do gbãlã zã a boe ni, a dungu sɛ olo be wele tɔa kɛ fo gbãlã zã a bina ni, nɛ a kpa sɛ mbe mɔ olo be ni.

³ Wa yamba mɔ mbali, do fɛ̃a mɔ bolo li we we ĩ ti dia nɛ. Nɛ nde wi yamba sila wele, wi a NWA Gale.

⁴ Zele 'dã linggamɔ ma de tɛ wi dɛ 'dã mɔ wena. Nɛ lɛnggɛ bɛlɛ ɛ̃fɛ̃ tɛ wi 'bili bɛlɛ wena.

⁵ Wi kɛ a mɔmɔ Owi sã ni, a dã zu li Gale, kɛ a dɛa wa ni. Wele kɛ a zɔ ngamɛ 'da ngba a, nɛ a dɛ yangga nɛ ni, a kpa sɛ etumbu.

⁶ Kpasa winɔ wa dɛ wali obe yaa wa, ɔ nɛ kɛ obulu benɔ wa dɛ do wali baa wa ni.

⁷ Yɔndɔ wi wè tɛ tɔ̃ dia lɛnggɛ gɔ. Nɛ 'bili bɛlɛ ìlì tɛ mɛ 'bɔ do gã wi gɔ.

⁸ Mbe winɔ wa lengge na, futa avoka ma ɔ nɛ sɔ̃ kɛ ma gala wa kɔ mɛnɔ vɛ̃ ni.

⁹ Mɔ kɔ̃ we be dɛa na, nɛ mɔ ele 'dã mɛnɔ 'da ongba mɔ. Kɔ mɔ tɔ̃ we 'dã mɔ kɛ ngba mɔ dɛa ni fai, nɛ nde mɔ 'danga dɛa na 'danga.

¹⁰ Mɔ kɔ'dɔ wi hã zã fala kpo, nɛ ma gala sɛ a. Mɔ zɛ yɔndɔ wi fala kama, nɛ nde ma gálá sɛ a gɔ.

¹¹ 'Dã wi a dɛ fai a nga zu, nɛ a fa ngamɔ dɛ tɛ̃ a wele nɛ.

¹² Kpa ngba mɔ do naa gbɔgbɔ kɛ a fa obenɔ 'da a ni, dia nɛa ngɔ kpa ngba mɔ do yɔnda wi kɛ zu a dunu do yia linggamɔ ni.

¹³ Fala kɛ mɔ gese 'dã mɔ olo dia mɔ, nɛ ngamɔ fó sɛ tɛ̃ ɛ kɔ tɔa 'da mɔ gɔ.

¹⁴ 'Da fala kɛ mɔ ndo mɔ mɔ̃lã, nɛ ma ɔ nɛ mɔ hũi wala ngamɔ dɛ tɛ mɔ ni. Ma wia na, mɔ la fala nɛ, dati a kɛ na go'do nɛ gã ni.

¹⁵ NWA Gale sɛnɛ gbɛ dia gulu we hã o'dã wi, tabi gbɛ 'dã gulu we hã dia wi wena.

¹⁶ Ma wè na yɔndɔ wi 'danga mbili mɔ́ a we futa wi be mɔ hã a gɔ, we kɛ a do gbãlã zã a we yambala mɔ bina.

¹⁷ Ngbongbo yali ngba mɔ ngboo, nɛ a kɔ̃ sɛ gɛnɛ mɔ fai. A ɔ nɛ nya mɔ kɛ a si 'do mɔ do ngba soe 'bako ni.

¹⁸ Tati a yɔndɔ wi hã a ba ku'da mɔ́ ngba a dɛ zu a.

¹⁹ Mɔ kɔ̃ mɔ̃lã, nɛ nde mɔ kɔ̃a ngbangga. Mɔ be tɛ mɔ wena, nɛ nde mɔ fa ngamɔ.

²⁰ 'Dã wi kpá dia mɔ gɔ. Nɛ wi kɛ nu a 'danga wena ni, a fa ngamɔ iko.

²¹ Mɔ ko be, kɔ a a yɔndɔ wi, nɛ nde mɔ a wi 'bako. Nɛ mɔ sɛ do yangga fala kpo bina.

²² Ɔ do yangga, ma kpasa wele tɛ zɛlɛ kpasa. Ɔ do 'bako, ma e ngawi 'da wele ia.

²³ O'dã wi gɔnɔ we wa kɔ̃ gɛnɛ avoka kɛ wa 'dɔlɔ hã wa ni, sɛ nɛ wa 'bili we do bɛlɛ de.

²⁴ Wi kɛ gbãlã zã a boe ni, a kɔ̃a we dɛ mɔ kɛ mɛ a mɔ hã zã ni. Nɛ nde yɔndɔ wi kɔ̃a we dɛ omɔ dɛlɛ wena fala kpo.

²⁵ Yɔndɔ be hã 'bako hã baa a, nɛ a zɛlɛ sila naa a.

²⁶ Ma wè na, wi kɛ a do 'dã mɔ bina ni, a futa we gɔ. Nɛ ma wè 'bɔ na, wa hã etumbu hã dia wi gɔ.

²⁷ Wi kɛ li a ĩ mɔ ĩ ni, a wélé we wena gɔ. Nɛ wi kɛ a lengge mɔ dati ni, a do hã zã boe.

²⁸ 'Da fala kɛ yɔndɔ wi dungu fio, nɛ mɔ wia we lengge na, gbãlã zã a boe. A kpe nu a, nɛ mɔ lengge na, a a wi ĩ ti mɔ.