GBA WENƆ 16 - WE NU GALE 1995

¹ Wele 'dafa linggamɔ we dɛ mɔ. Nɛ nde wi wia we 'bili na, ma dɛ tɛ̃ ɛ, tabi ma tɛ dɛ̃ tɛ̃ ɛ gɔ ni, wi a NWA Gale.

² Gɛnɛ kɔ mɔ wele mɔ zɔ na, mɛnɔ vɛ̃ mɔ dɛ ni, ma a dia, nɛ nde NWA hã a zɔ kɔ sila mɔ ngboo.

³ Mɔ tɔ̃ linggamɔ zã mɔ hã NWA Gale, nɛ a dɛ sɛ na, mɛ mɔ lengge we dɛ nɛ ni, ma Sɔkpɔ do dia nɛ.

⁴ Mɛnɔ vɛ̃ NWA dɛa ni, ma do gulu nɛ boe. Gulu o'dã winɔ mɛ a kɛ na, wa te li ngbangga do kɔ̃ tũ kɛ NWA wia ni.

⁵ NWA sɛnɛ Owi gã zunɔ wena, nɛ a lá sɛ fala hã etumbu hã wa gɔ.

⁶ Mɔ dungu do kɔ̃a zã, hã mɔ dɛ olo nu NWA, nɛ a fo sɛ ku'da 'dã mɔ zu mɔ. Fala kɛ mɔ dɛ kili NWA, nɛ mɔ yu 'dã mɔ.

⁷ Fala kɛ dɛa to tɛ mɔ de tɛ NWA Gale ia, nɛ a dɛ sɛ na, Owi sɛnɛ mɔ wa dɛ na do mɔ.

⁸ Kpa be mbili sĩ olo dɛa to kɛ mɔ dɛa do wala olo nɛ ni, ma dia nɛa ngɔ kpa gã mbili do 'dã wala.

⁹ Wele 'dafa linggamɔ we dɛ mɔ. Nɛ nde wi kɛ a dɛ na, mɛ ni dɛ tɛ̃ ɛ ni wi a NWA.

Gba we ngɔ nwanɔ

¹⁰ Nwa kɛ a wele we do ngawi 'da Gale ni, a 'bili wenɔ 'da a vɛ̃ do bɔlɔ nɛ.

¹¹ NWA Gale kɔ̃a na, kilonɔ kɛ wa we do mɔ ni, ma ɔ a dia. A wele nɛ, a wia dĩ mɛnɔ ia.

¹² Ma wè na, nwa dɛ 'dã mɔ fala kpo gɔ, we kɛ to nwa 'da a ma nganda we bɔlɔ zu dɛa mɛ 'da a.

¹³ Nwa kɔ̃a gɛnɛ wanɔ kɛ wa wele gbãlã we hã a ni, nɛ a dɛ wa de wena.

¹⁴ Zã nwa nɔ̃lɔ̃, nɛ a 'bili we fio. Nɛ nde wi kɛ a do hã zã ni, a yamba sɛ we gɛ̃ sila nwa.

¹⁵ Fala kɛ nwa dɛ yangga do mɔ, nɛ mɔ dungu sɛ do dia nɛ. A be dia zã 'da a hã mɔ, nɛ nde ma dia ɔ nɛ kolo kɛ ma tɛ ngɔ kula nù ni.

Gba we ngɔ dungi 'da wele

¹⁶ Kpa hã zã ma dia nɛa ngɔ kpa mɔ mbali. Nɛ ĩ ti mɔ ma dia nɛa ngɔ kpa fɛ̃a mɔ bolo.

¹⁷ Wi bɔlɔ zu yu 'dã mɔ, nɛ a ba bɔlɔ wala. Ní a li mɔ sɔ̃ ngɔ dɛa to tɛ̃ mɔ, nɛ mɔ kpasa sɛ.

¹⁸ Dɛ mɔ do gã zu, ma e te nu wele ia. Nɛ dɛ mɔ do wali, ma 'danga wele 'danga.

¹⁹ Ɔ wi sã, nɛ mɔ dungu fala nɛ kpo do owi gbisa zu, ma dia nɛa ngɔ kɛ̃ sanga kpamɔ do owi gã zunɔ kɛ wa zɛlɛ tɛ winɔ ni.

²⁰ Wi kɛ a lengge we nu NWA Gale ni, nɛ a dungu sɛ do dia nɛ. Nɛ wi kɛ a gbini zã a do a ni, nɛ a kpa sɛ yangga.

²¹ Wi kɛ li a ĩ mɔ ĩ ni, a gɔnɔ we do hã zã. Tɔ̃ lɛnggɛ do dia sila, ma gbini sila wele, nɛ a kɔ̃ gɛnɛ nɛ.

²² Wele ɔ do hã zã, nɛ a kpasa sɛ. Nɛ nde oyɔndɔ wi wa kpa sɛ si olo yia dɛa mɔ tɛ wa.

²³ Owi hã zãnɔ wa lengge mɔ, sɛ nɛ wa wele we de. Nɛ lɛnggɛ nu wa ma gbini sila wele, nɛ a kɔ̃ gɛnɛ nɛ.

²⁴ Tɔ̃ lɛnggɛ do dia sila, ma ɔ nɛ nɔ gɔlɔ ni. Ma ɛ̃fɛ̃ nu wi, nɛ ma 'dafa kili tɛ wi.

²⁵ Mbe wele lengge na, dɛa to tɛ̃ ɛ vɛ̃ de wena. Nɛ nde do Sɔkpɔ nɛ vɛ̃, nɛ ma kã a li fio.

²⁶ Wɔ ba wi dɛa to, nɛ ma tombo a na, a dɛ to nganda hã a kpa nyɔngɔmɔ.

²⁷ Yia wi fa fai we dɛ 'dã mɔ iko. Lɛnggɛ nu a ma ɔ nɛ we kɛ ma bɛlɛ wele ni.

²⁸ Wi 'dã hã fa kpawe iko. Nɛ wi tɔ̃ tɛ wi kɛ̃ sanga ongba a kɛ̃a.

²⁹ Wi kɛ a ɔlɔ ngba a, nɛ a be 'dã wala hã a ni, a a 'dã wi ngboo.

³⁰ Li mɔ sɔ̃ tɛ wi kɛ a nyɛ li a hã mɔ, nɛ a mɔmɔ dɛ 'da mɔ ni. A 'dafa we dɛ 'dã mɔ do mɔ ia.

³¹ Wi dɛ bɔlɔ zu dɛa mɔ a dungu sɛ nza, nɛ 'do a nyɛlɛ, nɛ mbu zu a sɛ a ndasa dɔ̃lɔ̃ li we a.

³² Wi ngawi ngboo a wele kɛ a ĩ ti kunu sila a ni. Ɔ nwa ngɔ kili tɛ mɔ wele nɛ, ma dia nɛa ngɔ dungu nwa ngɔ le.

³³ Owele wa to zeke we ĩ ti mɛnɔ kɛ ma hɔ sɛ do 'do ni. Nɛ nde wi 'bili we, nɛ a gese nu nɛ ɔ nɛ kɛ ma wia ni, wi a NWA Gale.