GBA WENƆ 15 - WE NU GALE 1995

¹ Gese nu we do dia nɛ, ma gɛ̃ sila wi mãlã gɛ̃a. Nɛ nde lɛnggɛ nga zu, ma dãlã sila wi dãlã.

² Lɛnggɛ nu wi hã zã, ma hã wɔ yambala mɔ hã wi kɛ a zele ma ni. Nɛ nde gbãlã zã lɛnggɛ nu yɔndɔ wi bina.

³ NWA Gale ka mɔ falanɔ vɛ̃. Gɛnɛ kɔ dia winɔ do 'dã winɔ, nɛ nde a zɔ wa zɔa.

⁴ Lɛnggɛ dɛa na, ma hã kpasi hã wele. Nɛ nde wila we dã, ma 'bɔ sila wi 'bɔa.

⁵ Mɔ bɛ̃ mbula nu baa mɔ, nɛ nde mɔ a yɔndɔ wi. Kɔ mɔ kɔ̃ gɛnɛ nɛ, nɛ nde mɔ a wi hã zã.

⁶ Tɔa mɔ́ wi bɔlɔ zu ma dunu do kpamɔ. Nɛ nde kpamɔ kɛ 'dã wi kpá do bɔlɔ wala gɔ ni, ma hã sɛ yangga hã a gɔ.

⁷ Lɛnggɛ nu wi hã zã, ma gã 'da ĩ ti mɛ 'da winɔ. Nɛ nde kɛ 'da yɔndɔ wi, ma gálá wi gɔ.

⁸ NWA sɛnɛ dɔnggamɛnɔ 'da o'dã winɔ wena, nɛ nde a kɔ̃a gɛnɛ sambala 'da owi bɔlɔ zunɔ.

⁹ NWA sɛnɛ dɛa mɔ tɛ o'dã winɔ wena, nɛ nde a kɔ̃a gɛnɛ wanɔ kɛ wa dɛ bɔlɔ zu dɛa mɔ ni.

¹⁰ Wi kɛ a dɛ 'dã mɔ ni, nɛ a kpa sɛ etumbu. Nɛ wi kɛ a kɔ̃̀ na, wa bɔlɔ ɛ gɔ ni, a fe sɛ.

¹¹ NWA ĩ ti mɛnɔ vɛ̃. Gɛnɛ kɔ mɛnɔ ma la kɔ le 'da ofionɔ i ni, nɛ nde a ĩ ti ma. Kɔ ní a mɔ nɛ dɛ fala usu linggamɔ kɔ sila mɔ do a nɛ nde?

¹² Wi dɛ ngatɛ kɔ̃̀ na, wa tɔ̃ mbula hã ɛ gɔ. Nɛ a kɔ̃̀ 'bɔ mbe we aka wi kɛ a do hã zã nɛa ngɔ a ni gɔ.

¹³ Wi kɛ a do yangga ni, nɛ bula li a ma pɛ pɛsa. Nɛ nde wele kɛ a do 'bako, nɛ bula li a ma kpu kpua.

¹⁴ Wi kɛ a lengge mɔ lingga ni, a do wɔ yambala mɔ boe. Nɛ nde yɔndɔ wi lengge fai do yia mɔ.

¹⁵ Tɛ wi 'bako ɔ́mɔ́ tɛ zɛlɛ nɛ gɔ. Nɛ nde wi yangga kpasa fai do gbãlã ngbali ti zɛlɛ a.

¹⁶ Ɔ wi sã, nɛ mɔ ba tɛ mɔ hã NWA Gale, ma dia nɛa ngɔ ɔ wi kpamɔ, nɛ nde sila mɔ ɔ ngɔ fai ni.

¹⁷ Nyɔngɔ nwá Sanggo iko do Owi kɔ gɛnɛ mɔ, dia nɛa ngɔ nyɔngɔ mɔ sɔkpã do wanɔ kɛ wa sɛnɛ mɔ ni.

¹⁸ Wi kɛ a a wi nga sila ni, a fa kpawe wena. Nɛ nde wi gɛ̃a sila, a ga kpawe.

¹⁹ Wala mɔ́ sulu wi dunu do tɛ̃, nɛ nde kɛ 'da wi bɔlɔ zu lɔ wena.

²⁰ Be hã zã hã yangga hã baa a. Nɛ nde yɔndɔ be zɔ naa a li a yala.

²¹ Yɔndɔ wi dɛ yangga yia dɛa mɔ tɛ̃ a. Nɛ nde wele kɛ a lengge mɔ lingga ni, a dɛ mɔ kɛ ma ɔ bɔlɔ ni.

²² Wele kɔ̃̀ we aka ngba a ngɔ mɔ kɛ a kɔ̃a we dɛ nɛ ni gɔ, nɛ mɛ ni ma te sɛ. Nɛ nde wele zele mbula 'da ongba a ngɔ mɔ kɛ a kɔ̃a we dɛ nɛ ni, nɛ ma de sɛ.

²³ Ma dia fɛ̃ na, wele ĩ ti gese nu we do dia nɛ. Mɛ a yangga we tɔ̃ lɛnggɛ do wala olo nɛ.

²⁴ Wi hã zã ba wala kpasi, nɛ a sɛnɛ wala fio.

²⁵ NWA Gale 'danga nu tɔa 'da wi dɛ ngatɛnɔ, nɛ a fɔmɔ kɔ ngbo 'da wi fio wili.

²⁶ NWA sɛnɛ 'dã linggamɔ zu wi, nɛ a dɛ yangga do lɛnggɛ dɛa na.

²⁷ Wi kɛ a fa mbili do 'dã hã ni, nɛ ma 'danga sɛ nu fɛlɛ a. Mɔ sɛnɛ kpa avoka kɔ dɛa to, nɛ mɔ ɔ sɛ dɔa kɔ̃ tũ ngɔ nù gɛ.

²⁸ Wi bɔlɔ zu lengge we dati, sɛ nɛ a gese de. Nɛ nde 'dã wi gese we dɔ̃ dɔ̃, nɛ lɛnggɛ nu a fa kpawe iko.

²⁹ NWA dɛ́ yangga zele sambala 'da o'dã winɔ gɔ. Nɛ nde wi bɔlɔ zu sambala a, nɛ a zele.

³⁰ Wele soko mɔ tɛ mɔ do dia li, nɛ ma hã sɛ yangga hã mɔ. Mɔ zele dia sako, nɛ ma hã sɛ mbé ngawi hã mɔ.

³¹ Wele kɔ'dɔ mɔ, kɔ mɔ zele, nɛ mɔ hɔ sɛ wi hã zã.

³² Mɔ kɔ̃̀ we yambala mɔ gɔ, nɛ nde mɔ 'danga dungu 'da mɔ wele nɛ. Nɛ nde wele kɛ a kɔ̃ na, wa kɔ'dɔ a ngɔ 'dã mɛ 'da a ni, nɛ a saka sɛ.

³³ Dɛ kili NWA Gale, mɛ a wala kpa hã zã. Nɛ dati kɛ na mɔ kpa dɔ̃lɔ̃ li ni, ma wia na, mɔ ba tɛ mɔ dɛ nù.