GBA WENƆ 14 - WE NU GALE 1995

¹ Wuko kɛ a do hã zã ni, a 'dafa nu tɔa 'da a 'dafa. Nɛ nde yɔnda wuko 'danga nu tɔa 'da ɛ 'danga.

² Wi kɛ a yɛnggɛ do bɔlɔ nɛ ni, a dɛ kili NWA. Nɛ nde wele kɛ a yɛnggɛ tɛ dɛ 'dã mɔ ni, a zɔ NWA yala iko.

³ Lɛnggɛ nu yɔndɔ wi, ma be ngatɛ 'da a. Nɛ nde kɛ 'da wi hã zã, ma amba a kɔ 'dã mɔ.

⁴ Fo mɔ wa do mɔ kɔ̃ mɔ bina, nɛ nde mɔ nyɔ́ngɔ́ sɛ mɔ gɔ. Kɔ ma ɔ kɔ mɔ boe, nɛ yangga 'da mɔ ma dunu sɛ.

⁵ Ngbongbo temɔɛ ngboo ni, a tɔ̃ bɛlɛ gɔ. Nɛ nde temɔɛ kɛ a dè gɔ ni, a tɔ̃ fai a bɛlɛ.

⁶ Wi dɛ ngatɛ fa hã zã, nɛ nde a kpá gɔ. Nɛ nde wi kɛ a lengge mɔ lingga ni, a kpa hã zã dɛ mɔ dɔ̃ iko.

⁷ Mɔ yú oyɔndɔ wi, we kɛ mɔ zélé sɛ lɛnggɛ gala mɔ nu wa gɔ.

⁸ Wi sɔ̃a li zimi dɛa to tɛ̃ a, we kɛ a do hã zã boe. Nɛ nde yɔndɔ wi zímí tɛ̃ ɛ gɔ, a ɔkɔlɔ tɛ̃ a iko, we kɛ a do hã zã bina.

⁹ Oyɔndɔ winɔ wa lénggé we 'dafa 'dã mɛnɔ kɛ wa dɛ do ongba wa ni gɔ. Nɛ nde kɛ 'da wi bɔlɔ zunɔ, wa 'dafa ngbala ngba wa fai.

¹⁰ Gele wele mbá ngɔ 'bako tabi yangga kɔ sila ngba a gɔ. Ma dɛ kɔ sila wele do wele.

¹¹ Nu tɔa mɔ́ 'dã wi ma ku kulu. Nɛ nde kɛ 'da wi bɔlɔ zunɔ, ma 'bɔ wena.

¹² Mbe winɔ wa lengge na, dɛa to tɛ wa de wena. Nɛ nde do Sɔkpɔ nɛ vɛ̃, nɛ ma kã wa dɛ li fio.

¹³ Mbe wele mɔmɔ we mbɔlɔ linggamɔ kɔ sila a. Nɛ yangga a dɛ ni, ma Sɔkpɔ do 'bako.

¹⁴ Owi bɛ̃ Gale wa kpa sɛ si olo mɛ kɛ ma wia do wa ni. Nɛ nde Owi kɔ̃ Gale wa kpa sɛ tɛ mɛ 'bɔ si olo dɛa mɔ tɛ wa.

¹⁵ Wi kɛ li a ĩ̀ mɔ gɔ ni, a kɔ gɛnɛ wenɔ vɛ̃ wa tɔ̃ hã a ni. Nɛ nde wi gbisa zu lengge mɔ dati sɛ nɛ a dɛ de.

¹⁶ Wi hã zã dɛ kili 'dã mɔ, nɛ a gbili ma. Nɛ nde yɔndɔ wi dɛ mɔ dɔ́ dɔ̃, nɛ a dɛ́ kili mɔ kpo gɔ.

¹⁷ Wi kɛ zã a nɔ̃lɔ̃ dɔ́ dɔ́ ni, a dɛ yɔnda dɛa mɔ wena. Nɛ wele kɛ a do hã zã ni, a dungu sɛ do gɛ̃a sila.

¹⁸ Wele kɛ li a ĩ̀ mɔ gɔ ni, a kpá sɛ hã fala kpo gɔ. Nɛ nde wele kɛ a lengge mɔ lingga ni, a hɔ sɛ wi hã zã.

¹⁹ Dunguu, nɛ o'dã winɔ wa yolo sɛ dɛ 'do nu tɔa 'da odia winɔ do Owi bɔlɔ zunɔ, we ala nu wa hã wa, takɔ wa gala wa.

²⁰ Mɔ ɔ wi sã ia, nɛ ongba mɔ ngboo ni, wa sɛnɛ sɛ mɔ. Nɛ nde mɔ ɔ wi kpamɔ ia, nɛ oyali ngba mɔ wa dɔ sɛ wena.

²¹ Mɔ be dia kɔ sila hã Owi sãnɔ, nɛ mɔ kpa sɛ yangga. Zɔ wele yala, mɛ a 'dã mɔ.

²² Mɔ dɛ́ mɔ do 'dã hã, nɛ nde mɔ yɔa wala do'do. Kɔ mɔ dɛ de mɔ, nɛ owinɔ wa kɔ sɛ gɛnɛ mɔ, nɛ wa e sɛ sila wa ngɔ mɔ.

²³ Fala kɛ mɔ dɛ to, nɛ mɔ kpa sɛ mɔ. Nɛ nde fala kɛ mɔ si tɛ tɔ̃ lɛnggɛ iko, nɛ mɔ hɔ sɛ wi sã.

²⁴ Wi hã zã, a kpa sɛ de mɔ wena. Kɔ mɔ ɔ do yɔndɔ wi, nɛ yɔnda 'da mɔ ma é sɛ gɔ.

²⁵ Temɔɛ kɛ a tɔ̃ gbãlã we ni, a kpasa wi kpasa. Nɛ nde lɛnggɛ nu temɔɛ 'bili bele, mɛ a ɔkɔlɔ wi iko.

²⁶ Wi kɛ a dɛ kili NWA Gale, nɛ a kpa sɛ gɛ̃a dungu, fala nɛ kpo do nu fɛlɛ a vɛ̃.

²⁷ Dɛ kili Gale mɛ a kpasi, ma kpasa wele li fio kpasa.

²⁸ Dungu nwa ngɔ gba dɔa wele, ma hã dɔlɔ li hã nwa. Kɔ fala kɛ fo wele bina, nɛ nde gulu dɛa to nwa 'da a 'bɔ bina.

²⁹ Wi kɛ a do du sila ni, a wi hã zã. Nɛ nde wi kɛ zã a nɔ̃lɔ̃ wena ni, a be a yɔnda dɛa mɔ tɛ̃ a.

³⁰ Wi kɛ a do gɛ̃a sila ni, a sɛ do dia kili tɛ wi. Nɛ nde sila bɔnɛ, ma ɔ nɛ zɛlɛ kɛ ma gbɛ wi gbɛa ni.

³¹ Fala kɛ mɔ zɛlɛ tɛ wi sã, nɛ nde mɔ dã zu li Gale, wele kɛ a dɛa a ni. Nɛ wele kɛ a ĩ 'bako hã wi sã ni, a dɔnggɔ Gale dɔngga.

³² Ngamɔ ma kpa 'dã wi, nɛ zu a vĩ do'do. Nɛ nde wi bɔlɔ zu fe do gɛ̃ sila.

³³ Wi kɛ a lengge mɔ dati ni, a do hã zã boe. Nɛ nde yɔndɔ wi lénggé mɔ gɔ.

³⁴ Bɔlɔ zu dɛa mɔ ma ɔ kɔ le, nɛ li le ni ma dɔ̃lɔ̃ sɛ. Kɔ fala kɛ bɔlɔ zu dɛa mɔ kɔ le bina, nɛ owinɔ kɔ le ni, wa kpa sɛ sape.

³⁵ Onwanɔ wa kɔ̃ gɛnɛ Owi olo li wa kɛ wa do gbãlã zã wa boe ni. Nɛ nde zã wa nɔ̃lɔ̃ dɛ tɛ wanɔ kɛ wa 'danga toe 'da wa ni.