GBA WENƆ 13 - WE NU GALE 1995

¹ Be gbisa zu lengge dɛ mbula 'da baa a. Nɛ nde be nga zu zɔ mbula li a yala iko.

² Dia wi kpa si olo wila we kɛ a wele ni. Nɛ nde wi ɔkɔlɔ wi fa tati a kpa we iko.

³ Wi kɛ a lengge we dati ni, a fɔmɔ dungu 'da a wele nɛ. Nɛ nde wi dɛ nu we 'danga dungu 'da ɛ.

⁴ 'Bã mɔ mɔ́ wi yɛlɛ do gulu nɛ bina. Nɛ nde wi kɔ̃ dɛa to a kpa sɛ mɛ kɛ a dɛ wɔ tɛ nɛ ni.

⁵ Wi bɔlɔ zu sɛnɛ lɛnggɛ bɛlɛ. Nɛ nde wila we nu wi tɔ̃ bɛlɛ, ma hã sape hã a wele nɛ, nɛ ma 'danga 'bɔ dɔ̃lɔ̃ li 'da a.

⁶ Wi dɛ mɔ do wala olo nɛ, a kpasa we bɔlɔ zu 'da a. Nɛ 'dã wi, a 'danga dungu 'da a do dɛa mɔ tɛ̃ a.

⁷ Ombe wele wa ba tɛ wa na, lo a wi kpamɔ, nɛ nde fo mɔ kɔ tɔa 'da wa bina. Nɛ ombe wele wa ba tɛ wa na, lo a wi sã, nɛ nde wa do kpamɔ wena.

⁸ Owele wa ĩ na, mɔ a wi kpamɔ, nɛ wa tulu mɔ wena, hã mɔ hã mbili hã wa, sɛ nɛ mɔ kpasa ti kɔ̃ wa de. Nɛ nde mɔ ɔ ni dɛ́ wi sã gɔ.

⁹ Tɛ wi bɔlɔ zu ndele ɔ nɛ nyɛa we ni. Nɛ nde 'dã wi ɔ nɛ we kɛ ma bi bi ni.

¹⁰ Wi dɛ ngatɛ fa tati a kpa we iko. Nɛ nde wi kɛ a zele mbula ni, a a wi hã zã.

¹¹ Kpamɔ kɛ wele kpa iko ni, ma ɔ́ gɔ. Nɛ nde mɔ kɛ wele kpa sĩ sĩ do wala dɛa to ni, ma gã dɛ dati.

¹² Mɔ e sila mɔ ngɔ mɔ, hã ma zɔlɔ, nɛ ma zɛlɛ sɛ mɔ wena. Nɛ nde mɛ kɛ mɔ e sila mɔ ngɔ nɛ, hã mɔ kpa ni, nɛ ma hã yangga hã mɔ wena.

¹³ Wi kɛ a zɔ mbula li a yala iko ni, a zɔ sɛ ngamɔ olo nɛ wena. Nɛ nde wi dɛ mbula, a kpa sɛ si olo nɛ.

¹⁴ Mbula nu wi hã zã, ma hã kpasi hã wele, nɛ ma kpasa 'bɔ wele kɔ fɛna fio.

¹⁵ Wa dɔnggɔ Owi hã zã. Nɛ nde o'dã wi wa zɔ ngamɔ kɔ dungu nza 'da wa.

¹⁶ Wi gbisa zu lengge mɔ dati, sɛ nɛ a dɛ ma de. Nɛ nde yɔnda wi be yɔnda 'da a dɛ wila fala.

¹⁷ Wi tɔ̃ to do bɛlɛ hã ngamɔ hã wele. Nɛ nde wi tɔ̃ to do gbãlã we 'dafa dia dungu.

¹⁸ Wi kɛ a kɔ̃̀ we yambala mɔ gɔ ni, nɛ wa zɔ sɛ a yala iko, nɛ a sɛ a wi sã. Nɛ nde wa dɔnggɔ sɛ wi zele mbula.

¹⁹ Wele dɛ wɔ tɛ mɔ, hã a kpa, nɛ ma hã yangga hã a, gulu nɛ a oyɔnda wi wa kɔ̃̀ we la fala 'dã mɔ gɔ ni.

²⁰ Mɔ ba 'bia do wi hã, nɛ mɔ kpa hã zã. Nɛ nde mɔ yɛnggɛ do ofumbu wi, nɛ mɔ hɔ sɛ tɛ mɛ 'bɔ fumbu wi.

²¹ 'Dã mɔ ma nɛ 'do wi dɛ 'dã mɔ. Nɛ nde yangga mɛ a si olo dɛa mɔ tɛ wi bɔlɔ zu.

²² Wi dɛ de mɔ la dia mɔ hã nu fɛlɛ a. Nɛ nde wa hã sɛ kpamɔ mɔ 'dã wi hã wi bɔlɔ zu.

²³ Owi sã wa wia sɔ do kpa nyɔngɔmɔ li fɔnɔ 'da wa wena. Nɛ nde wa zɔlɔ nyɔngɔmɔ, we kɛ o'dã winɔ wa kala ma kɔ wa.

²⁴ Wi kɛ a kɔ̃̀ we zɛ be 'da a gɔ ni, nɛ nde a kɔ̃̀ gɛnɛ a gɔ. Nɛ nde wele kɛ a kɔ gɛnɛ be 'da a ni, nɛ a zɛ sɛ a we tɔ̃ mbula hã a.

²⁵ Wi bɔlɔ zu zɔ́lɔ́ nyɔngɔmɔ gɔ. Nɛ nde 'dã wi he fai a kɔ̃a wɔ.