GBA WENƆ 12 - WE NU GALE 1995

¹ Wi kɛ a kɔ̃a we kpa hã zã ni, nɛ a zele sɛ mbula. Nɛ nde wi bɛ̃ we zele mbula mɛ a yɔnda wele.

² NWA kɔ̃a gɛnɛ wi dɛ de mɔ, nɛ nde a e wi dɛ vĩ zu ti ngbangga.

³ Wele dúngú dia dungu do wala dɛ 'dã mɔ gɔ, nɛ nde mɔ kpo yɛ́kɛ́ sɛ wi bɔlɔ zu gɔ.

⁴ Wuko kɛ zu a a bɔlɔ ni, a hã dɔlɔ li hã wili a. Nɛ nde yɔnda wuko, a nyɔngɔ sila wili a, ɔ nɛ zɛlɛ nyɔngɔ gbãlã ni.

⁵ Wi bɔlɔ zu, a fa tati a mɛ kɛ ma a bɔlɔ ni. Nɛ nde 'dã wi fa tati a ɔkɔlɔ wele iko.

⁶ Lɛnggɛ nu 'dã wi wia tɛ gbɛ wele. Nɛ nde lɛnggɛ nu dia wi, wia tɛ kpasa wele li fio.

⁷ Fala kɛ 'dã wi fe, nɛ li a mbiti ngɔ nù gɛ do ti. Nɛ nde nu fɛlɛ dia wi ma 'bana sɛ fai.

⁸ Wa dɔnggɔ wi hã zã, nɛ nde wa zɔ yɔndɔ wi yala iko.

⁹ Ma dia fɛ̃ na, mɔ ba tɛ mɔ dɛ nù, nɛ mɔ dɛ to we kpa nyɔngɔmɔ. Dɛ na mɛ ni dia nɛa ngɔ kɛ na, mɔ ba tɛ mɔ dɛ ngɔ, nɛ nde fo nyɔngɔmɔ kpo kɔ̃ mɔ bina ni.

¹⁰ Wi dia sila lengge do mɛnɔ kɛ onadalamɛnɔ 'da a wa do wɔ nɛ ni. Nɛ nde dɛa mɔ tɛ 'dã wi tati a zɛlɛ te ongba a.

¹¹ Wi dɛ to fɔ zɔ́lɔ́ nyɔngɔmɔ gɔ. Nɛ nde wi kɛ a dungu tɛ lengge mɔ iko, nɛ a é ma fala to gɔ ni, a do hã zã bina.

¹² 'Dã wi fa we kpa mɔ do wala kɛ ma a bɔlɔ gɔ ni. Nɛ nde wi bɔlɔ zu kpa mɔ do wala kunu sila wi tɛ dɛa to.

¹³ 'Dã wi te kɔ̃ bɛlɛ olo nu a. Nɛ nde wi bɔlɔ zu kpasa kɔ ngamɛnɔ vɛ̃.

¹⁴ Wele kpa dia mɔ olo saka lɛnggɛ nu a, ɔ nɛ kɛ wi dɛa to kpa si olo toe 'da a ni.

¹⁵ Yɔnda wi lengge fai na, dia gulu we a mɔ́ ɛ. Nɛ nde wi hã zã kɔ̃a we zele mbula.

¹⁶ Yɔnda wi be nɔ̃lɔ̃ zã mɔ́ a dɛ nza do ti. Nɛ nde wi hã zã ĩ ti kunu sila ɛ.

¹⁷ Wi kɛ a tɔ̃ gbãlã we dɛ nza ni, a fa bɔlɔ zu we. Nɛ nde wi tɔ̃ bɛlɛ a mbo nu 'dã mɔ.

¹⁸ Wi kɛ a wele we mba mba ni, we nu a e dani li sila ngba a ɔ nɛ kɔya ni. Nɛ nde lɛnggɛ nu gbãlã wele wia we kpasa wele.

¹⁹ Lɛnggɛ nu gbãlã wele yá fala a go. Nɛ nde lɛnggɛ nu wi 'bili bɛlɛ ya fala a dɔ́ iko.

²⁰ Kɔ sila Owi dɛ 'dã mɔ dunu do ɔkɔlɔ wele. Nɛ nde yangga do wanɔ kɛ wa fa dia dɛa na ni.

²¹ Owi bɔlɔ zu wa kpá sɛ 'dã mɔ gɔ. Nɛ nde o'dã wi, wa zɔ́lɔ́ sɛ ngamɔ fala kpo gɔ.

²² NWA Gale sɛnɛ Owi tɔ̃ bele, nɛ nde a kɔ̃a gɛnɛ Owi tɔ̃ gbãlã we.

²³ Wi hã zã dɔ́nggɔ́ tɛ̃ a ngɔ hã zã 'da a gɔ. Nɛ nde wi zɔlɔ hã zã be zɔlɔ hã zã 'da a dɛ nza.

²⁴ Wi kɔ̃ dɛa to, a hɔ sɛ gã wi. Nɛ nde wi yɛlɛ, a sɛ fai ti ngbá.

²⁵ Mɔ dungu fai do linggamɔ, nɛ mɔ sɛ do yangga bina. Nɛ nde dia lɛnggɛ ma nganda sɛ sila mɔ.

²⁶ Wi bɔlɔ zu e ngba a li bɔlɔ wala. Nɛ nde dɛa mɔ tɛ 'dã wi, ma 'danga tɛ mɛ 'bɔ ongba a.

²⁷ Wi yɛlɛ yɛnggɛ yali ɛngga, nɛ mɔ sɔkpã gbó sɛ nu a gɔ. Nɛ nde wi kɔ̃ dɛa to, a kpa sɛ mɔ wena.

²⁸ Bɔlɔ zu dɛa mɔ, mɛ a wala kpasi. Nɛ mɔ yɛnggɛ li wala bɔlɔ zu, nɛ nde mɔ fé sɛ gɔ.