GBA WENƆ 11 - WE NU GALE 1995

¹ Gale sɛnɛ wi be gole kɛ a e mɔ nu kilo do bɛlɛ ni. Nɛ nde a kɔ̃a wele kɛ a e ma do gbãlã we ni.

² Wi gã zu, a kpa sɛ sape. Nɛ nde wi kɛ a ba tɛ̃ a dɛ nù ni, a wi hã zã.

³ Dia dɛa mɔ tɛ wi bɔlɔ zu, ma be sɛ wala hã a, nɛ nde mbana 'da wi dɛ 'dã mɔ ma 'danga sɛ a.

⁴ Kpamɔ wè we kpasa wele ti ngbangga 'da fio gɔ. Nɛ nde bɔlɔ zu dɛa mɔ wia we kpasa wele kɔ fio.

⁵ Bɔlɔ zu mɔ́ dia wele, ma 'dafa dɛa to tɛ̃ a. Nɛ nde we tɛ 'dã wele, ma 'danga we 'dã dɛa mɔ tɛ̃ a.

⁶ Dia dɛa mɔ tɛ Owi bɔlɔ zunɔ, ma kpasa sɛ wa. Nɛ nde o'dã winɔ wa ba sɛ bili wɔ 'dã mɛ kɔ sila wa ni.

⁷ 'Dã wi fe, nɛ dia mɛnɔ a e sila a ngɔ nɛ ni ma Sɔkpɔ, nɛ kpamɛ 'da a kɛ a gbini zã a nɛ ni, ma 'danga.

⁸ Wi bɔlɔ zu hɔ nza kɔ 'bako, nɛ 'dã wi te kɔ 'bako olo a.

⁹ Wi kɛ a kafa Gale ni, a 'danga ongba a do wila we nu a. Nɛ nde wi bɔlɔ zu kpasa we ĩ ti mɛ 'da a.

¹⁰ Wi bɔlɔ zu kpa mɔ, nɛ Owi kɔ le wa dungu ɛngga nɛ, nɛ nde 'da fala fio mɔ́ 'dã wi, nɛ wa he hiamɔ yangga.

¹¹ Owi bɔlɔ zu wa dɛ na, le ma gã do dia nɛ. Nɛ nde wila we nu o'dã wi ma 'danga le 'danga.

¹² Wi kɛ a zɔ ongba a li a yala iko ni, gbãlã zã a bina. Nɛ nde wi hã zã a wi kunu sila a ngɔ mɔ.

¹³ Wi tɔ̃ tɛ wi, a yɛ'bɛ sako usu lɛnggɛ. Nɛ nde wi kɛ gbãlã zã a boe ni, a usu lɛnggɛ dɛ kɔ sila a.

¹⁴ Fo nwa ngɔ le bina, nɛ ma tingbi gbululu, nɛ nde Owi poe nwa wa dɛlɛ, sɛ nɛ dia dungu ɔ kɔ le de.

¹⁵ Mɔ kɔ̃ we si olo ku'da zu wele, nɛ mɔ kpa sɛ ngamɔ, nɛ nde ma dia fɛ̃ na, mɔ bɛ̃ we si olo ku'da ni.

¹⁶ Wuko dia zã, a kpa dɔ̃lɔ̃ li, nɛ nganda wi wili dɛ to, nɛ a kpa mɔ.

¹⁷ Wi kɛ a dɛ de mɔ, nɛ a kpa si olo nɛ, nɛ nde wi kula li zɛlɛ tɛ̃ a wele nɛ.

¹⁸ Si olo mɔ mɔ wi dɛ 'dã mɔ, ma ha yangga hã a gɔ. Nɛ nde si olo mɔ mɔ́ wi dɛ de mɔ, ma we do 'da dɛa mɔ tɛ̃ a.

¹⁹ Wi kɛ a 'dafa na ɛ dɛ mɔ do bɔlɔ nɛ ni, a kpasa sɛ. Nɛ nde wele kɛ a saka we dɛ 'dã mɔ ni, a fe sɛ.

²⁰ NWA Gale bɛ̃ gɛnɛ Owi 'dã hã, nɛ a kɔ̃ gɛnɛ wanɔ wa yɛnggɛ do bɔlɔ nɛ ni.

²¹ Do ndɔti nɛ, Owi dɛ 'dã mɔ wa zɔ́lɔ́ sɛ etumbu gɔ. Nɛ nde Owi bɔlɔ zu wa kpá sɛ etumbu gɔ.

²² Dia zɔnga mɔ́ yɔnda wuko, mɛ a mɔ gbɔlɔ mɔmu. Ma ɔ nɛ wa gãlã pɛtɛ mɔ mbali nu zɔ̃ ngulu ni.

²³ Wɔ kɔ sila wi bɔlɔ zu, mɛ tati a dɛ de mɔ, nɛ ma Sɔkpɔ do dia nɛ. Nɛ nde mɛ kɛ o'dã wele wa kɔ̃a we dɛ ma ni, mɛ a mɔ nɔ̃lɔ̃ zã Gale.

²⁴ Owi kɛ̃ mɔ gba kɔ̃, wa gã 'da kpamɔ mɔ wa. Nɛ nde owinɔ wa usu kpamɛnɔ 'da wa, we duzu wa iko ni, nɛ sã ba wa.

²⁵ Wi hã mɔ do yangga a kpa sɛ si olo nɛ, nɛ wi kɛ a hã lì hã ngba a ni, nɛ wɔ lì bá sɛ a gɔ.

²⁶ Owele wa tɔ̃ 'dã we tɛ owinɔ, kɛ wa usu Okpalɛnɔ 'da wa we 'bɔ do 'da kɛ na gole nɛ kũ ni. Nɛ nde wa tɔ̃ dia we tɛ winɔ kɛ wa be gole kpalɛnɔ 'da wa do li zɔlɔ nɛ ni.

²⁷ Mɔ fa we dɛ de mɔ, nɛ Gale a kɔ̃ sɛ gɛnɛ mɔ. Nɛ nde ngamɔ ma kpa sɛ wi kɛ a lengge tati a we dɛ 'dã mɔ ni.

²⁸ Wi kɛ a a sila a ngɔ kpamɛ 'da a ni, a kolo sɛ nɛ́ wɔkɔsɔ zɔlɔ sabɛlɛ ni. Nɛ nde wi bɔlɔ zu, a 'bɔ sɛ nɛ́ wɔkɔsɔ zɔlɔ li kolo ni.

²⁹ Wi kɛ a fɔ́mɔ́ obenɔ 'da a ɔ dia gɔ ni, a dungu sɛ sã olo wa. Nɛ yɔndɔ wi a sɛ fai a ngbá 'da wi hã zã.

³⁰ Dia dɛa mɔ mɔ́ wi bɔlɔ zu, ma ɔ nɛ wala te kpasi ni. Do wala dia hã zã 'da a, nɛ Owele wa kɔ̃ gɛnɛ lɛnggɛ nu a.

³¹ Wi dɛ de mɔ, a kpa si olo nɛ dɛ ngɔ nù gɛ. Ní a Singga wá do o'dã wi do Owi bɛ̃ we nu Gale nde? Wa kpa sɛ tɛ mɛ 'bɔ si olo 'dã mɛ 'da wa dɛ ngɔ nù gɛ.