GBA WENƆ 10 - WE NU GALE 1995

Ogba wenɔ 'da Salɔmɔ

¹ Kɛ gɛ a ogba wenɔ kɛ Salɔmɔ tɔ́a zi ma. A na, saka be a hã yangga hã Owi ko a, nɛ yɔnda be a hã 'bako hã Owele a.

² Dia mɔ kɛ wele kpa do wala zũ ni, ma gálá a gɔ, tati a dia mɔ kɛ wele kpa do bɔlɔ wala ni, sɛ nɛ ma gala a de.

³ NWA Gale lá dia wi na, a fe wɔ gɔ, nɛ nde a kɔ̃̀ na, 'dã wi kpa mɔ kɛ a 'bã ma ni gɔ.

⁴ Wi kɛ a kɔ̃̀ we dɛ to gɔ ni, nɛ sã ma ba sɛ a. Nɛ nde wi kɛ a kɔ̃ we dɛ to wena ni, nɛ a kpa sɛ tɛ mɛ 'bɔ mɔ wena.

⁵ Wi kɛ a ngɛmɛ li okpalɛ do li zɔlɔ nɛ ni, a a wi hã zã. Nɛ nde wi kɛ a ɔ yala do zɔlɔ kala kpalɛ li fo ni, a a yɔndɔ wi.

⁶ Wa wele sɛ nu wa tɛ wi bɔlɔ zu. Nɛ nde 'dã wele usu 'dã mɔ dɛ kɔ sila a.

⁷ Wa lengge dia wi 'da fala fai, nɛ wa hã iɔ̃nae hã Gale we duzu a. Nɛ nde ta zu wele ele ngɔ 'dã wi do li a vɛ̃.

⁸ Wi hã zã kɔ̃a we zele mbula. Nɛ nde wele kɛ a wele we mba mba iko ni, a kpa sɛ ngamɔ.

⁹ Wi yɛnggɛ bɔlɔ zu yali, a kpá sɛ 'dã mɔ gɔ. Nɛ nde wi kɛ a yɛnggɛ vĩ zu yali ni, nɛ dunguu nɛ ma be sɛ tɛ̃ ɛ.

¹⁰ Wi 'bili bɛlɛ hã zɛlɛ tɛ hã ongba a. Nɛ nde wi tɔ̃ gbãlã we hã gɛ̃a sila hã ongba a.

¹¹ Lɛnggɛ nu dia wi ɔ nɛ zu lì kɛ ma hã kpasi. Nɛ nde lɛnggɛ nu 'dã wi, ma ko kpawe.

¹² Wi kɛ a do sɛnɛmɔ ni, a fa mɔ̃lã. Nɛ nde wi kɛ a do kɔ̃a zã ni, a lénggé do 'dã mɔ kpo gɔ.

¹³ Wa ĩ fala wi hã zã kɔ gbãlã we lɛnggɛ nu a. Nɛ nde wele kɛ gbãlã zã lɛnggɛ zã a bina ni, nɛ a te sɛ li ngbangga.

¹⁴ Wi hã zã a kpa sɛ mbé hã zã dɛ dati fai. Nɛ nde yɔndɔ wi kɛ a wele we pua pua ni, a fa we 'danga le 'danga.

¹⁵ Ngawi 'da wi kpamɔ mɛ a mbili 'da a. Nɛ nde sã ba mɔ, nɛ mɔ sɛ do 'bako fai.

¹⁶ Dɛ mɔ do bɔlɔ zu, ma 'dafa wele fai. Nɛ nde dɛ mɔ do 'dã nɛ, ma 'danga wele dɛ dati.

¹⁷ Wi zele mbula yɛnggɛ do wala kpasi. Nɛ nde wi kɛ a kɔ̃̀ we zele mbula gɔ ni, a yɔ sɛ dɛ dati.

¹⁸ Wi sɛnɛmɔ kɛ a usu mãlã dɛ kɔ sila a ni, a a wi bɛlɛ, nɛ wi tɔ̃ tɛ wi a a yɔndɔ wi.

¹⁹ Wi dɛ nu we yɔ dɛ dati. Nɛ nde wi yɔ'dɔ we a wi hã zã.

²⁰ We nu wi bɔlɔ zu ɔ nɛ dia mɔ mbali. Nɛ nde linggamɔ zu 'dã wi, ma do gulu nɛ bina.

²¹ We nu wi bɔlɔ zu gala wi wena. Nɛ nde yia wi fe we kɛ a zɔlɔ hã zã.

²² Mɛ ma hã kpamɔ hã wele ni, mɛ a wila nu 'da Gale. Nɛ nde dɛ mɔ do nga ngu'du, ma é mbé mɔ ngɔ nɛ gɔ.

²³ Wi kɛ gbálá zã a bina ni, a zɔ dɛ 'dã mɔ ɔ nɛ mɔ dɛa sa ni. Nɛ nde dɛ mɔ do dia hã, ma hã yangga hã wi hã zã.

²⁴ Mɔ kɛ o'dã wi wa dɛ kili nɛ ni, ma kpa sɛ wa. Nɛ nde mɔ kɛ wi hã zã kɔ̃a ni, nɛ wa hã sɛ ma hã a.

²⁵ Ngamɔ hɔ kɔ le, nɛ ma kpa sɛ o'dã wi. Nɛ nde odia wi wa 'bana sɛ do lɔa tɛ wa fai.

²⁶ Mɔ tɛ sà mɔ hã wi yɛlɛ na, a dɛ to hã mɔ gɔ. We kɛ a zɛlɛ sɛ tɛ mɔ, ɔ nɛ kɛ kpã ndimɔ fe do gbato tɛ gogo wele, nɛ zɛ̃ we ngbɛnzɛ do li wele ni.

²⁷ Mɔ dɛ olo nu NWA Gale, nɛ zu mɔ kutu sɛ mbu. Kɔ mɔ dɛ 'dã mɔ, nɛ 'do mɔ nyɛ́lɛ́ sɛ ngɔ nù gɛ gɔ.

²⁸ Mɔ kɛ wi bɔlɔ zu e sila a ngɔ nɛ ni, ma hã sɛ yangga hã a. Nɛ nde mɔ kɛ 'dã wi 'bã ni, ma sɔ́kpɔ́ do dia nɛ gɔ.

²⁹ NWA Gale a ɔ nɛ gba ngbo kele zu odia wi, nɛ nde a kumu Owi dɛ 'dã mɔ.

³⁰ Owi dɛ bɔlɔ zu dɛa mɔ wa sɛ do mɔ kpo we yɛkɛ wa bina. Nɛ nde o'dã winɔ wa 'báná sɛ ngɔ nùi gɛ gɔ.

³¹ Wi bɔlɔ zu wele we do hã zã, nɛ nde ma wia na, wa 'bili lɛfɛ wi 'bili bɛlɛ.

³² Wi bɔlɔ zu wele we mbɔkɔ sila wi. Nɛ nde we nu 'dã wi ma nɔ̃lɔ̃ zã wele nɔ̃lã.