GBA WENƆ 1 - WE NU GALE 1995

¹ Kɛ gɛ a gba wenɔ kɛ Salɔmɔ, be 'da Davidi tɔ̃a zi ni. Salɔmɔ zi a nwa ngɔ nù Israɛlɛ.

Gulu 'buki

² Ogba wenɔ gɛ, ma be tɛlɛ tɛ kɛ wele wia we kpa hã zã, nɛ a dɛ mɔ tɛ̃ a do wala olo nɛ ngboo ni. Ma gala 'bɔ wele na, a ĩ ti wenɔ kɛ ma do 'du gulu nɛ boe ni.

³ Ma be 'bɔ mɔ hã wele na, gbãlã zã a siki, nɛ a ɔ do bɔlɔ zu, nɛ a dɛ de mɔ do winɔ vɛ̃.

⁴ Wele kɛ a ĩ̀ ti mɔ dati gɔ ni, a wia we kpa hã zã. Wele kɛ a 'bana be zagbãlã ni, a wia we ĩ ti mɔ, nɛ a lengge mɔ 'du wena.

⁵ Wele kɛ a do hã zã ni, nɛ gba wenɔ gɛ ma gã sɛ 'da hã zã 'da a. Nɛ wele kɛ a yambala tabi mɔ dati wena nde, nɛ ma tɔ̃ sɛ 'bɔ mbé mbula hã a.

⁶ Wanɔ wa zele gba wenɔ gɛ, nɛ wa ĩ sɛ ti 'du gulu wenɔ kɛ ma usu tɛ̃ ɛ 'do nɛ ni. Nɛ wa yambala sɛ mɛnɔ kɛ hã zã be ma, nɛ ma nganda wena ni.

⁷ Ndo nyanga kpa hã zã, mɛ a dɛ kili NWA. Oyɔndɔ winɔ wa zɔ bia wenɔ li wa yala iko, nɛ wa kɔ̃̀ we zele lɛnggɛnɔ kɛ wi hã zãnɔ wa be ni gɔ.

Mbulanɔ we obe zagbãlãnɔ

⁸ Aa bulu be 'daa, mɔ zélé baa mɔ do naa mɔ, nɛ mɔ tɛ bɛ mbula wa tɔ̃ hã mɔ ni gɔ.

⁹ Bia wenɔ 'da wa, ma ɔ sɛ we mɔ nɛ dia ndasa, kɛ mɔ gu zu mɔ, tabi dia iyaka, kɛ mɔ fi gɛlɛ mɔ ni.

¹⁰ Bulu be 'daa, mɔ tɛ kɔ̃̀ na, o'dã yali ngba mɔ wa ɔlɔ mɔ, nɛ mɔ dɛ 'dã mɔ gɔ.

¹¹ Wa tɔ̃ sɛ hã mɔ na: “Mɔ tɛ́, hã lɛ nɛ we wɛ Owi la walanɔ, kɔ lɛ gbanga wa. Gɛnɛ kɔ wanɔ wa dɛ̀ 'dã mɔ do lɛ gɔ ni, nɛ lɛ bi wa.

¹² Lɛ kala wa do tunu li wa, nɛ lɛ gbɛ wa do ti, nɛ lɛ tombo wa dɛ le 'da ofionɔ i.

¹³ Lɛ nɛ́, hã lɛ zũ dia mɛnɔ kpi do kpi, takɔ ma dunu tɔanɔ 'da lɛ.

¹⁴ Mɔ tɛ́, nɛ lɛ gɔnɔ sɛ sanga mɛnɔ ni do mɔ.”

¹⁵ Bulu be 'daa, fala kɛ wa tɔ̃ na mɛ ni, nɛ mɔ tɛ zèlè wa gɔ. Nɛ mɔ tɛ kòlò do wa gɔ.

¹⁶ We kɛ wa fa we 'danga mɔ, nɛ wa 'bɔ we gbɛ wele iko.

¹⁷ Fala kɛ nɔɛ zɔ wi yali ɛngga tɛ ndɔ bili hã a, nɛ nde a bá sɛ bili ni gɔ.

¹⁸ Nɛ nde winɔ ni wa ndɔ bili hã kpo kili tɛ wa wele nɛ. Bili ni ma ba sɛ wa, nɛ ma gbɛ wa.

¹⁹ Kɛ 'da Owi zũnɔ ma ɔ sɛ na mɛ ni. 'Da fala kɛ wa a tɔkɔ nù, nɛ wa a sɛ tɛ mɛ 'bɔ tɔkɔ tɛ wa nù.

Hãzã tɛ mbese owinɔ

²⁰ Nɛ zélé sɛ, Hãzã nɛ wele we. A wele we do li walanɔ do li fandanɔ.

²¹ A tɛ he mɔ dɛ ngɔ hã owinɔ tɛ li fandanɔ do falanɔ wa mba do ngba wa ni na:

²² “Aa nɛ, Owi bi gbãlã zãnɔ gɛ, nɛ nɛ dɛ yangga dɛa mɔ bɔnɔ nɛ dɛ gɛ, gbaa soe ki nge nde? Aa nɛ, kɛ nɛ fi tɔɛ zu mi gɛ, nɛ dɛ sɛ yangga we mɔmɔ mi gbaa soe ki nge nde? Nɛ kpa sɛ hã zã soe ki nge nde?

²³ Nɛ zélé bia wenɔ mi nɛ be hã nɛ ni. Mi nɛ gala nɛ do mbulanɔ 'da mi, nɛ mi nɛ be hã zã 'da mi hã nɛ.

²⁴ “Mi sa mɔ hã nɛ na, nɛ tɛ 'da mi nga, nɛ nɛ bɛ̃a we zele mi. Mi ɛfɛ kɔ̃ mi hã nɛ we gbaka nɛ, nɛ nɛ zɔa ma li nɛ yala.

²⁵ Nɛ da mbulanɔ 'da mi nù, nɛ nɛ kɔ̃̀ na, mi e nɛ li bɔlɔ wala gɔ.

²⁶ Kɔ 'da fala kɛ ngamɔ kpa nɛ, nɛ mi mɔmɔ sɛ nɛ. 'Da fala kɛ kili ba nɛ, nɛ mi fi sɛ gbɛlɛgbɛsɛ zu nɛ.

²⁷ Mba gɔ, ngba soe kpo, nɛ ngamɔ ma kpa sɛ nɛ. Ma tɛ sɛ ɔ nɛ gba kolo kɛ ma tɛ do gba bũ kamba ni. Kili ma ba sɛ nɛ, nɛ nɛ sɛ kɔ 'bako.

²⁸ 'Da fala kɛ ma dɛ tɛ̃ ɛ na mɛ ni, nɛ nɛ sa sɛ mɔ hã mi na, mi gbaka nɛ. Nɛ nde mi gésé sɛ nu nɛ hã nɛ gɔ. Nɛ fa sɛ mi falanɔ vɛ̃, nɛ nde nɛ kpá sɛ mi gɔ.

²⁹ Mba gɔ, nɛ fà we kpa hã zã gɔ, nɛ nɛ bɛ̃a we dɛ olo nu NWA.

³⁰ Nɛ da mbulanɔ 'da mi nù, nɛ nɛ kɔ̃̀ na, mi e nɛ li bɔlɔ wala gɔ.

³¹ We duzu ma, nɛ kpa sɛ si olo yia dɛa mɛnɔ 'da nɛ. Nɛ ma dɛ sɛ na, nɛ ɔ nɛ wi kɛ zɛlɛ ba a, nɛ ma mbɔkɔ a vɛ̃ ni.

³² “Wi bi gbãlã zã wele fe fio, we kɛ a bɛ̃a we kpa hã zã. Nɛ yɔndɔ wi kpa ngamɔ, we kɛ a lénggé mɔ gɔ.

³³ Nɛ nde wele kɛ a zele we mi tɔ̃a ni, nɛ a dungu sɛ do dia nɛ. Nɛ mɔ kpo dɛ́ sɛ a gɔ, nɛ a dɛ́ sɛ kili ngamɔ gɔ.”