GALATI 6 - WE NU GALE 1995

Le gálá ngba lɛ 'da fala ngamɔ

¹ Onyae, 'da fala kɛ nɛ kpa mbe ngba nɛ tɛ dɛ 'dã mɔ nde, nɛ nɛ, kɛ Hi Wi 'da Gale kɔ nɛ boe ni, nɛ gala wi ni, takɔ a hɔ dɛ ngɔ bɔlɔ wala. Nɛ nɛ dɛ́ ma do gɛ̃a sila. Nɛ li nɛ sɔ̃́ tɛ kili tɛ nɛ wele nɛ, da dɛ kɔ sila nɛ ɔ́lɔ́ tɛ mɛ 'bɔ nɛ gɔ.

² Nɛ gálá ngba nɛ kɔ ngamɔ. Nɛ dɛ na mɛ ni, nɛ nde nɛ dɛa mbula 'da Kristo ia.

³ Wi kɛ a lengge na, ɛ nɛa ngɔ tala ongba ɛ, nɛ nde a nɛ ngɔ wa gɔ ni, a ɔlɔ tɛ́ a wele nɛ.

⁴ Ma wia na, wele do wele soko dɛa mɔ tɛ a wele nɛ we zɔ na, ma a dia nde. Hã ma a dia, nɛ a dɔnggɔ tɛ a we nɛ. Nɛ nde a tɛ wè dɛa to tɛ a do kɛ 'da ngba a gɔ.

⁵ Mba gɔ, wele do wele do toe kɛ Gale hã ma hã a ni boe.

⁶ Ma wia na, wi kɛ wa be we nu Gale hã a ni, a kala mbe tɛ mɛnɔ 'da a vɛ, nɛ a gbaka do wi kɛ a be mɛ hã a ni.

⁷ Sila nɛ tɛ ɔ̀lɔ̀ nɛ gɔ, wa mɔ́mɔ́ Gale gɔ. Wele do wele a kala sɛ mɔ li fɔɛ 'da a, ɔ nɛ kɛ a mi zi ni.

⁸ Wi kɛ a nɛ 'dɔkɔlɔ wɔ kɔ kili tɛ́ a ni, a ɔ nɛ wi mi 'dã kpalɛ ni. A kpa sɛ mɔ kɛ ma yolo kɔ kili tɛ wele ni, mɛ a fio. Wi kɛ a zele nu Hi Wi 'da Gale ni, a ɔ nɛ wi mi dia kpalɛ ni. A kpa sɛ mɔ kɛ ma yolo 'da Hi Wi ni, mɛ a kpasi kɛ ma é sɛ gɔ ni.

⁹ Ní nɛ lɛ tɛ mbɔ̀kɔ̀ tɛ dɛ de mɔ gɔ. Mba gɔ, 'da fala kɛ lɛ mbɔ̀kɔ̀ gɔ, nɛ lɛ kpa sɛ si olo nɛ do li zɔlɔ nɛ.

¹⁰ Na mɛ ni, 'da fala kɛ lɛ kpa wala we dɛ de mɔ, nɛ lɛ dɛ́ ma hã owinɔ vɛ́. Nɛ nde lɛ dɛ́ wena hã onya lɛ wi kɔ̃a wenɔ.

Ndɔti wenɔ

¹¹ Nɛ zɔ́ gã gbãlã mbɛti mi dɛa hã nɛ gɛ! Mi kɔma ma do zu kɔ̃ mi wele nɛ.

¹² Owinɔ kɛ wa hɛ̃lɛ̃ nɛ na, nɛ nɛ gaza ni, wi a owanɔ kɛ wa fa we be tɛ wa nɛ́ bɔlɔ zu wele li owinɔ ni. Wa dɛ ní na, da dɛ kɔ Owele wa zɛ́lɛ́ tɛ wa 'da fala kɛ wa be gulu we fie 'da Yezu ngɔ finda te ni gɔ.

¹³ Gɛnɛ kɔ owinɔ wa nɛa gaza nɛa ni, nɛ nde wa dɛ́ mbulanɔ 'da Oyudanɔ do olo tɛ nɛ vɛ́ gɔ. Nɛ wa kɔ̃a na, nɛ nɛ gaza, takɔ wa dɔnggɔ tɛ wa na, nɛ zila we nu wa, kɔ nɛ nɛa gaza.

¹⁴ Kɛ 'da mi, mi kɔ̃a we dɔnggɔ tɛ mi tati a do fie 'da Nwa 'da lɛ Yezu Kristo ngɔ finda te. We duzu fie 'da a ngɔ finda te, ma a mɛnɔ ngɔ nù gɛ vɛ ɔ li mi nɛ kɛ ma fi fia ni, nɛ mi ɔ tɛ mɛ 'bɔ li mɛnɔ ngɔ nù gɛ nɛ kɛ mi fi fia ni.

¹⁵ Kɔ fala wele nɛ gaza, tabi a nɛ̀ gaza gɔ, nɛ nde ma dɛ́ mɔ gɔ. Mɛ kɛ ma dɛ mɔ, mɛ a kɛ na, Gale dɛ lɛ do mbé wi.

¹⁶ E kɔ Gale be dia zã hã winɔ vɛ́ wa dɛ mbula gɛ ni, nɛ a dɛ na, wa dungu do gɛa sila. Mi aka 'bɔ na mɛ ni we duzu owinɔ 'da Gale vɛ.

¹⁷ Tala lɛnggɛ 'da mi ma kɛ: Mi kɔ̃̀ na, wele tulu 'bɔ mi gɔ, we kɛ mi do dã 'da Yezu Kristo tɛ mi gɛ boe.

¹⁸ Onyae, e kɔ dia zã 'da Nwa 'da lɛ Yezu Kristo 'bana do nɛ! Amɛ.