GALATI 5 - WE NU GALE 1995

Owi Kristonɔ wa ti mbula 'bɔ bina

¹ Kristo gɔnɔ zu lɛ na, lɛ tɛ ɔ̀ 'bɔ ngbá ti mbula 'da Oyudanɔ gɔ. Kɔ nɛ yóló nganda, dɔ nɛ hɔ́ 'bɔ ongbá mbé nɛ gɔ.

² Nɛ zélé we mi Polo, mi tɔ̃ hã nɛ gɛ: Fala kɛ nɛ kɔ̃ na, wa gɔnɔ nɛ do gaza, nɛ nde fo sɛ 'bɔ gulu Kristo we duzu nɛ bina.

³ Mi mbese nɛ mbé nɛ na, wi kɛ a kɔ̃a na wa gɔnɔ ɛ do gaza, nɛ ma wia na, a dɛ mbulanɔ vɛ.

⁴ Nɛ, winɔ kɛ nɛ fa we dɛ mbula, takɔ nɛ hɔ owi bɔlɔ zu li Gale ni, nɛ gɔnɔ ngbala do Kristo ia, nɛ Gale wé sɛ 'bɔ we be dia zã 'da a hã nɛ gɔ.

⁵ Nɛ nde kɛ 'da lɛ, lɛ gbini zã lɛ do Gale. A dɛ sɛ na, lɛ hɔ Owi bɔlɔ zu li a do ngawi 'da Hi Wi Santo, we kɛ lɛ kɔ̃a zu li Kristo ni.

⁶ Mba gɔ, wi kɛ a mba do Kristo kpo ni, gɛnɛ kɔ a nɛ gaza, tabi a nɛ̀ gaza gɔ, nɛ nde ma dɛ́ mɔ gɔ. Mɛ kɛ ma do gã gulu nɛ, mɛ a kɔ̃a we kɛ ma be tɛ́ ɛ kɔ kɔ̃ gɛnɛ ngba wi ni.

⁷ Zi dati, nɛ dɛ zi mɔ do dia nɛ! Kɔ wi kila wala ti nɛ na, nɛ tɛ nɛ̀ 'bɔ 'do gbãlã we gɔ ni a wio nde?

⁸ Gale kɛ a sa zi mɔ hã nɛ ni, a kèlè wala ti nɛ gɔ.

⁹ Wa tɔ̃ fai na: “Be ina hana mapa sĩ, nɛ ma yɛ'bɛ kɔ zanga mapa, nɛ ma hana ma vɛ.”

¹⁰ Nɛ nde ɔ nɛ kɛ lɛ mba kpo do Nwa Yezu ni, mi gbini zã mi do nɛ na, linggamɛ 'da nɛ ma we sɛ kɔ̃ do kɛ 'da mi. Nɛ nde wi kɛ a vĩ zu nɛ ni, gɛnɛ kɔ a a wio nde, nɛ Gale a hã sɛ etumbu hã a.

¹¹ Onyae, nɛ zɔ́ kɛ 'da mi! Fala kɛ mi 'bana sɔ 'bɔ tɛ be na, owi Kristo wa nɛ́ gaza, nɛ gulu kɛ owele wa zɛlɛ 'bɔ tɛ mi we ge nde? Mi 'bana sɔ tɛ be we na mɛ ni, nɛ nde sako fie 'da Yezu ngɔ finda te, ma sɔ 'bɔ a zugbulu te we kɔ do nyanga wi gɔ.

¹² Kɔ we duzu winɔ wa vĩ zu nɛ ni, nɛ e wa, kɔ wa hɔlɔ kulu lo'do wa wele nɛ!

¹³ Onyae, Gale sa zi mɔ hã nɛ na, nɛ hɔ nza ti mbula. Kɔ nɛ́ kɛ nɛ 'bànà ti mbula gɔ ni, nɛ tɛ lènggè na, nɛ wia we dɛ mɛnɔ ɔ nɛ kɛ wɔ kili tɛ nɛ tombo do nɛ ni gɔ. Nɛ nde ma wia na, kɔ̃ gɛnɛ ngba wi kɛ nɛ kɔ̃a do ngba nɛ ni, ma tombo nɛ we dɛ to hã ngba nɛ.

¹⁴ Mba gɔ, mbulanɔ 'da Mɔizɛ vɛ́, ma mba ngbɛ ɛ dɛ kɔ mbula kpo gɛ: “Mɔ kɔ̃́ gɛnɛ ngba mɔ, ɔ nɛ kɛ mɔ kɔ̃a do kili tɛ mɔ wele nɛ ni.”

¹⁵ Kɔ fala kɛ nɛ ma ngɔ zɛlɛ tɛ ngba nɛ, do e dani tɛ ngba nɛ ɔ nɛ osa'de zamɔ ni, nɛ li nɛ sɔ̃́, ní gɔ, nɛ nɛ kumu sɛ ongba nɛ vɛ.

Ma wia na Hi Wi Santo be wala hã lɛ

¹⁶ We mi kɔ̃a we tɔ̃ hã nɛ gɛ, ma kɛ: Nɛ 'dáfá dungi 'da nɛ do wala kɛ Hi Wi Santo be ma hã nɛ ni. Nɛ dɛ ní, nɛ nde nɛ dɛ́ sɛ mɛnɔ kɛ wɔ kɔ kili tɛ nɛ tombo nɛ we dɛ ma ni gɔ.

¹⁷ Mba gɔ, wɔ kɔ kili tɛ wi tombo wele we dɛ mɛnɔ kɛ Hi Wi Santo bɛ ma ni. Nɛ Hi Wi Santo tombo lɛ we dɛ mɛnɔ kɛ kili tɛ lɛ kɔ̃̀ we dɛ ma gɔ ni. Gbãlã we, ma bɔa nɛ, ma kɔ̃̀ gɛnɛ ngbɛ ɛ gɔ. Ma kɛ nɛ wé sɛ tɛ dɛ dia mɛ kɛ zã nɛ kɔ̃a sɔ we dɛ ma ni gɔ.

¹⁸ Kɔ 'da fala kɛ mɔ dɛ mɛnɔ kɛ Hi Wi Santo tombo mɔ na mɔ dɛ ni, nɛ nde mɔ 'bɔ ti mbula 'da Oyudanɔ bina.

¹⁹ Lɛ ĩ ti mɛnɔ kɛ wɔ kɔ kili tɛ wele tombo a we dɛ nɛ ni. Mɛnɔ ni, ma kɛ: yɛnggɛ vĩ zu yali, dɛ mɔ ndi li Gale, dɛ mɔ sape,

²⁰ dɔnggɔ okpikima, dɛ sɔ̃, sɛnɛ ngba wi, mɔ̃ mɔ̃lã, dɛ bɔnɛ, nɔ̃lɔ̃ zã, wɛlɛ zu mɔ, kɛ sanga tɛ ngba wi, bɛ̃ gɛnɛ ngba wi,

²¹ 'bã mɔ, te bá dɔ̃, dɛ nga'ba, do ogele 'dã mɛnɔ vɛ́ kɛ ma wia kɔ̃ do ma ni. Mi tɔ̃ hã nɛ, ɔ nɛ kɛ mi tɔ̃a zi 'bɔ hã nɛ ni na, owinɔ wa dɛ mɛnɔ ní ni, wa lé sɛ kɔ le nwa 'da Gale gɔ.

²² Nɛ nde mɛnɔ kɛ Hi Wi Santo tombo wele we dɛ ma ni, ma kɛ: kɔ̃ gɛnɛ ngba wi, do dɛ yangga, dungu do gɛa sila, do du sila, do dia zã, dɛ de dɛa mɔ, dɛ olo nu wi,

²³ ba tɛ wi dɛ nù, do kunu sila wi. Mbula bɛ̃̀ gɛnɛ mɛnɔ ni gɔ.

²⁴ Owinɔ kɛ wa mba kpo do Kristo ni, wa gbɛa 'dã wɔ kɔ kili tɛ wa, do hɛlɛnɔ kɔ sila wa ni vɛ ia.

²⁵ Nɛ́ kɛ Hi Wi Santo hã kpasi hã lɛ ni, ma wia na, lɛ e Hi Wi Santo, hã a be wala hã lɛ.

²⁶ Lɛ tɛ dɛ̀ wali gɔ, lɛ tɛ tùlù ngba lɛ gɔ, nɛ lɛ tɛ dɛ̀ bɔnɛ hã ngba lɛ gɔ.