GALATI 4 - WE NU GALE 1995

¹ Mi kɔ̃a we tɔ̃ hã nɛ na: Be wele tɔa wia tɛ kpa mɔ olo baa a. Nɛ nde 'da fala kɛ a 'bana do be, nɛ a ɔ kpasaa nɛ ngbá ni, ĩ na, a a wele mɛnɔ vɛ́.

² Do 'da fala a tɛ gã̀ gɔ ni, nɛ nde a 'bana ti kɔ̃ Owi zɔ mɔ tɛ̃ a do owi fɔmɔ mɛnɔ 'da a gbaa ndɔti nɛ a kɛ a hɔ sabɛlɛ kɛ baa a wia ni sɛ nɛ de.

³ Ma 'bɔ na mɛ ni we lɛ. 'Da fala kɛ lɛ 'bana zi do hã zã mɔ́ be ni, lɛ zi a ngbá ti kɔ̃ o'dã hi winɔ nù gɛ.

⁴ Nɛ nde 'da fala ngba soe nɛ wia zi ni, nɛ Gale tumba Be 'da a ngɔ nù gɛ. Wuko kua a, nɛ a zi ti mbula 'da Oyudanɔ.

⁵ Gale tumba a na, a gɔnɔ zu owinɔ kɛ wa a ti mbula ni, takɔ lɛ hɔ obenɔ 'da Gale ngboo.

⁶ Nɛ we be na, lɛ a obenɔ 'da Gale ni, nɛ Gale tumba Hi Wi 'da Be 'da a dɛ kɔ sila lɛ, nɛ Hi Wi ni he mɔ hã a na: “Aa Baa mi!”

⁷ We duzu ma, nɛ 'bɔ a ngbá gɔ, nɛ nde nɛ a obe wele tɔa. Kɔ nɛ́ kɛ nɛ a obenɔ 'da Gale ni, a hã sɛ mɛnɔ vɛ́ kɛ a kpua zɛ́ mbulu nɛ hã benɔ 'da a ni hã nɛ.

Polo do linggamɔ wena we owi Kristonɔ tɛ Galati

⁸ Zi dati, nɛ ĩ̀ zi ti Gale gɔ, nɛ nɛ zi a ngbá 'da ogalenɔ kɛ wa a ngbongbo Gale gɔ ni.

⁹ Kɔ ngangga ni, nɛ ĩ ti Gale, tabi we tɔ̃ do ngbongbo nɛ, Gale ĩ ti nɛ. Ní a dɛ do kɛ nɛ gili 'bɔ tɛ nɛ 'da oyia hi winɔ kɛ wa do ngawi bina ni nɛ nde? Nɛ kɔ̃a we hɔ 'bɔ ngbánɔ 'da wa nɛ́ kɛ zi dati ni nde?

¹⁰ Nɛ 'bana tɛ dungu ɛngga kɔ ombe kɔ̃ tũnɔ, do zɛkɛnɔ, do mbe ngba soenɔ, do sabɛlɛnɔ.

¹¹ Kɛ nɛ dɛ ni, kili nɛ ba mi wena na, dɔ olo dɛa toe 'da mi sanga nɛ ɔ́ yala iko gɔ.

¹² Onyae, mi ala nu mi hã nɛ na, nɛ hɔ́ mi! We kɛ mi hɔa tɛ mɛ 'bɔ nɛ. Nɛ dɛ̀ 'dã mɔ do mi gɔ.

¹³ Nɛ ĩ ti tɛlɛ tɛ kɛ mi hɔa zi 'da nɛ i, nɛ mi bia Dia Sakoe hã nɛ ni. Do kuti be Dia Sakoe ni, mi zi do zɛlɛ.

¹⁴ Gɛnɛ kɔ zɛlɛ 'da mi hã zi ngamɔ hã nɛ wena, nɛ nde nɛ zɔ̀ zi mi li nɛ yala iko gɔ, nɛ nɛ sìkì zi 'do nɛ lo do mi gɔ. Nɛ dɛa zi gɛnɛ mi ɔ nɛ kɛ mi a anzɛ 'da Gale, tabi ɔ nɛ mi a Yezu Kristo ngboo ni.

¹⁵ Nɛ zi do yangga wena, kɔ gulu kɛ nɛ 'bɔ do yangga ngangga gɛ bina ni we ge nde? Gbãlã we, mi ĩ na, nɛ dɔ̀ zi mi do mɔ gɔ. Ma we zi na, nɛ 'dɔ gbali nɛ we hã hã mi, nɛ nɛ dɛ zi ma.

¹⁶ Kɔ ngangga gɛ, mi hɔa tabi wi sɛnɛ nɛ, we kɛ mi tɔ̃ gbãlã we hã nɛ ni nde?

¹⁷ Owinɔ ni wa fa we 'danga Dia Sakoe we dɛ na do nɛ, nɛ nde linggamɔ zu wa dè gɔ. Wa fa we gɔnɔ sanga lɛ do nɛ, kɔ nɛ nɛ 'dɔkɔlɔ wa.

¹⁸ Dɛ na do wele ma a dia, 'da fala kɛ mɔ dɛ ma do dia linggamɔ ni. Nɛ nde ma wia na, ma dɛ tɛ́ ɛ fai, gɛnɛ kɔ mi sanga nɛ boe, tabi mi sanga nɛ bina.

¹⁹ Aa benɔ 'daa, tɛ mi zɛlɛ we nɛ ɔ nɛ wuko kɛ a do zɛlɛ kula ni. Nɛ tɛ mi ma zɛlɛ sɛ we nɛ ni fai gbaa na, nɛ ba tɛlɛ tɛ Kristo vɛ sɛ nɛ de.

²⁰ Mi kɔ̃a sɔ we nɛ 'da nɛ i ngangga gɛ, takɔ mi 'dafa wila we nu mi we do nɛ. We kɛ mi do linggamɔ wena we nɛ.

Lɛnggɛ 'da Sara do Agarɛ

²¹ Nɛ gɛ, kɛ nɛ kɔ̃a we 'bana ti mbula 'da Oyudanɔ ni, nɛ tɔ̃́ hã mi sɛ! Nɛ zèlè we kɛ mbula tɔ̃ ma ni gɔ nde?

²² Wa kɔma kɔ 'Buki 'da Gale na: “Abrahama kua zi obulu be bɔa. A kua mbe kpo do Agarɛ wuko ngbá, nɛ a ko mbee nɛ do Sara wuko 'da a.”

²³ Nɛ be kɛ Abrahama kua a do wuko ngbá ni, a kua zi a ɔ nɛ kɛ wa ko do benɔ vɛ ni, nɛ nde be kɛ a kua a do wuke 'da a ni, a kua a olo mbuli kɛ Gale kpua zi hã a ni.

²⁴ We ni, mɛ a wia we. Owukonɔ bɔa ni, wa be gba tɔkɔnɔ bɔa kɛ Gale gba zɛ́ do owinɔ ni. Wele kɛ dati wi a Agarɛ, a be gba tɔkɛ kɛ Gale gba zɛ́ do winɔ ngɔ kala Sinai ni. A kua zɛ́ a obe ngbá iko.

²⁵ Agarɛ ni a kala Sinai kɛ ma ngɔ nù Arabi i ni. Nɛ a wia 'bɔ kɔ̃ do gã le Yeruzalɛmɛ ngangga gɛ, we kɛ le ni, mba do winɔ kɔ nɛ vɛ́ wa a ngbá ti mbula 'da Mɔizɛ.

²⁶ Nɛ nde le Yeruzalɛmɛ kɛ li nza i ni, ma ti mbula bina, nɛ le ni a naa lɛ.

²⁷ Ma ɔ nɛ kɛ wa kɔma kɔ 'Buki 'da Gale na: “Aa mɔ, wuko ndɔlɛ kɛ mɔ kó zi gɔ ni, mɔ dɛ́ yangga! Mɔ, wuke kɛ kula to mɔ gɔ ni, mɔ zɛ́ kaliã! Mba gɔ, wuko ndɔlɛ kɛ wili a bɛa a ni, a ko sɛ gba gili obe, nɛ wa dɛlɛ sɛ nɛ ngɔ obenɔ 'da wuke kɛ a 'bana do wili a ni.”

²⁸ Onyae, nɛ tɛ mɛ 'bɔ a benɔ kɛ wa kua nɛ olo mbuli kɛ Gale kpua zi ni, ɔ nɛ kɛ wa kua zi do Izaka ni.

²⁹ Zi dati, be kɛ wa kua a ɔ nɛ kɛ wa ko do benɔ vɛ́ ni, a zɛlɛ zi tɛ be kɛ wa kua a do ngawi 'da Hi Wi ni. Nɛ ngangga gɛ, ma dɛ 'bɔ tɛ ɛ na mɛ ni dɛa.

³⁰ Kɔ wa kɔma kɔ 'Buki 'da Gale na ge nde? Wa kɔma na: “Mɔ ndáká wuko ngbá do bulu be 'da a do'do, we duzu kɛ ma wè na, be 'da wuko ngbá ni mba ngɔ kpamɔ olo baa a fala nɛ kpo do be 'da wuko wele tɔa gɔ.”

³¹ Nɛ zɔ́, onyae, lɛ a benɔ 'da wuko ngbá gɔ, lɛ a benɔ 'da wuko wele tɔa.