GALATI 3 - WE NU GALE 1995

Tɛlɛ tɛ kɛ Gale kpasa do wele ni

¹ Aa nɛ, Ogalati kɛ gbãlã zã nɛ bina gɛ, wi 'danga nɛ a wio nde? Ĩ na, mi bia zi gulu fie 'da Yezu ngɔ finda te hã nɛ dɛ wila fala vɛ.

² Kɔ mi nɛ aka nɛ do we kpo: Nɛ kpa Hi Wi Santo 'da Gale, we duzu kɛ nɛ dɛa zi mbula 'da Oyudanɔ ni nde? Tabi nɛ kpa ma we duzu kɛ nɛ zila Dia Sakoe, nɛ nɛ kɔ̃a ni nde?

³ Gulu kɛ nɛ yɔnda ní we ge nde? Nɛ ndua zi nɛ 'dɔkɔlɔ Kristo do ngawi 'da Hi Wi Santo, nɛ ngangga ni, nɛ kɔ̃a we sɔkpɔ ma do ngawi 'da nɛ iko nde?

⁴ Mɛnɔ vɛ̃ ma dɛa zi nɛ ni, ma yala iko nde? Mi lengge na, ma yala iko gɔ.

⁵ Nɛ lengge na, Gale hã zi Hi Wi 'da a hã nɛ, nɛ a dɛa ogba sɔ̃ mɔ sanga nɛ we duzu kɛ nɛ dɛa mbula ni nde? Tabi ma we duzu kɛ nɛ zila Dia Sakoe, nɛ nɛ kɔ̃a ni nde?

⁶ Nɛ lénggé Abrahama sɛ! Wa kɔma kɔ 'Buki 'da Gale do zu li a na: “Abrahama kɔ̃a zɛ́ zu li Gale, nɛ we duzu kɔ̃a we ni, Gale ba a na, a a wi bɔlɔ zu.”

⁷ Kɔ nɛ ĩ́ na, ngbongbo benɔ 'da Abrahama, wi a owinɔ kɛ wa do kɔ̃a we ni.

⁸ Wa kɔma zɛ́ kɔ 'Buki 'da Gale dati na, Gale kɔ̃a na owinɔ kɛ wa a Oyuda gɔ ni, wa hɔ Owi bɔlɔ zu li a we duzu kɔ̃a we 'da wa. Nɛ 'Buki ni mbisa Abrahama do dia sakoe gɛ na: “Mi wele sɛ nu mi tɛ nu kɔnggɔ winɔ ngɔ nù gɛ vɛ́ we duzu mɔ.”

⁹ Nɛ Abrahama kɔ̃a, nɛ Gale wila nu ɛ tɛ a. Na mɛ ni, owinɔ vɛ kɛ wa do kɔ̃a we boe ni, Gale a wele sɛ nu a tɛ wa, ɔ nɛ kɛ a wila zi do nu a tɛ Abrahama ni.

¹⁰ Owinɔ kɛ wa lengge na, lo kpasa sɛ fala kɛ lo dɛ mbula 'da Oyudanɔ ni, wa kpa fɔmba ia. Mba gɔ, wa kɔma kɔ 'Buki 'da Gale na: “Wi kɛ a dɛ̀ mɛnɔ kɛ wa kɔma kɔ 'Buku Mbula ni do olo tɛ nɛ vɛ gɔ, nɛ nde fɔmba 'da Gale tia ngɔ a ia.”

¹¹ Kafi bina, wele hɔ́ wi bɔlɔ zu li Gale do wala dɛ mbula gɔ. Mba gɔ, wa kɔma kɔ 'Buki na: “Wi kɛ a hɔ wi bɔlɔ zu li Gale we duzu kɔ̃a we 'da a, nɛ a kpasa sɛ.”

¹² Nɛ nde dɛ mbula ma wè kɔ̃ do kɔ̃a we gɔ, we kɛ wa kɔma kɔ 'Buki na: “Wi kɛ a dɛ mbulanɔ vɛ, nɛ a kpasa sɛ do wala 'da mbulanɔ ni.”

¹³ Kristo kpa fɔmba we duzu lɛ. Na mɛ ni, a gɔna zi zu lɛ kɔ fɔmba kɛ lɛ nɛ kpa sɔ ma, we kɛ lɛ zɔla dɛ mbula ni. Mba gɔ, wa kɔma kɔ 'Buki 'da Gale na: “Wi kɛ wa gãlã a nu te ni, fɔmba 'da Gale tia ngɔ a.”

¹⁴ Ma dɛa tɛ ɛ na mɛ ni, takɔ wila nui kɛ Gale wila zɛ́ tɛ Abrahama ni, ma kpa tɛ mɛ 'bɔ owinɔ kɛ wa a Oyuda gɔ ni, do wala kɔ̃ zu li Yezu Kristo. Ma kɛ lɛ kpa tɛ mɛ 'bɔ Hi Wi Santo kɛ Gale kpua zɛ́ mbulu hã a hã lɛ, we duzu kɔ̃a we ni.

Mbula ma 'dàngà mbuli 'da Gale gɔ

¹⁵ Aa onyae, mi nɛ tɔ̃ mbe wia we hã nɛ. Tɛ 'da lɛ winɔ, fala kɛ wele bɔa wa ba zã zu we, kɔ wa dɛ mbɛti ngɔ nɛ do wala olo nɛ ngboo, nɛ nde gele wele wè tɛ gbɛ ma gɔ, nɛ wele wè tɛ e mbé we ngɔ nɛ gɔ.

¹⁶ Kɔ nɛ zɔ́, Gale kpua zɛ́ mbulu hã Abrahama do be zã a. Wa kɔ̀mɔ̀ kɔ 'Buki na, Gale kpua zɛ́ mbulu hã Abrahama do obe zã a, ɔ nɛ kɛ wa dɛlɛ wena ni gɔ. Nɛ nde wa kɔma na, a kpua mbuli hã a do be zã a, ma be na, be ni kpo iko, wi a Kristo.

¹⁷ Gulu we mi kɔ̃a we tɔ̃ hã nɛ gɛ ma kɛ: Zɛ́ dati, Gale gba tɔkɔ do Abrahama, nɛ a kpua mbulu na, ɛ dɛ sɛ ma. 'Do mbuli ni la sabɛlɛ kama nalɛ do 'bu nɛ talɛ, nɛ mbula 'da Mɔizɛ hɔa. Na mɛ ni, mbula ni wè tɛ 'danga gba tɔkɛ kɛ Gale gba zɛ́ do Abrahama dati ia ni gɔ, nɛ ma wè tɛ yala mbuli kɛ Gale kpua ni gɔ.

¹⁸ Ɔ do kɛ Gale hã sɔ de mɔ hã Owele, we kɛ wa dɛ mbula, nɛ nde wa kpá sɔ ma we duzu mbuli kɛ a kpua zɛ́ ma ni gɔ. Nɛ nde nɛ ĩ́ na, Gale bia zɛ́ dia zã 'da a hã Abrahama do wala 'da mbuli ni.

Gulu mbula na ge nde?

¹⁹ Kɔ ní, nɛ gulu kɛ Gale hã 'bɔ mbula dɛ ngɔ mbuli a kpua zɛ́ ni we ge nde? A hã ma takɔ owele wa ĩ ti 'dã mɛnɔ wa dɛ ni. Gale hã zɛ́ ma we 'bɔ 'da ngba soe hɔa 'da be zã Abrahama, kɛ a kpua zɛ́ mbuli we a ni. Oanzɛnɔ wa ia zɛ́ mbula ni dɛ kɔ̃ wi kɛ a zi sanga Gale do owinɔ ni.

²⁰ Ĩ na, 'da fala Gale kpua zɛ́ do mbuli hã Abrahama ni, nɛ nde a zi zu a kpo. Kɔ fala kɛ wele dɛ mɔ zu ɛ kpo, nɛ fo sɛ gele wele sanga a bina.

²¹ Ki ni ma kɔ̃a we tɔ̃ na, mbula 'da Mɔizɛ bɛ̃a mbuli kɛ Gale kpua zɛ́ ni nde? Fala kpo gɔ. Ɔ do kɛ mbula 'da Mɔizɛ sɔ do ngawi we hã kpasi hã wele, nɛ wele a hɔ sɔ wi bɔlɔ zu li Gale we kɛ a dɛ mbula ni.

²² Nɛ nde wa kɔma kɔ 'Buki 'da Gale na, 'dã mɔ ɛnza owinɔ ngɔ nù gɛ vɛ́. Na mɛ ni, owinɔ wa kɔ̃a zu li Yezu Kristo ni, wa kpa de mɛ kɛ a kpua zɛ́ mbulu nɛ hã wa ni.

²³ Zɛ́ dati, 'da fala kɛ Kristo tɛ hɔ̀ zi na, lɛ kɔ̃ zu li a gɔ ni, mbula ɛnzɛ zi lɛ ɔ nɛ Owi bɔlɔkɔ ni. Nɛ ma dɛa tɛ̃ ɛ ni gbaa we hɔ ngba soe kɛ Gale bia Kristo hã lɛ, nɛ lɛ kɔ̃a zu li a ni.

²⁴ Na mɛ ni, mbula zɔa zi mɔ tɛ lɛ ni gbaa, we 'bɔ do 'da tɛa 'da Kristo, takɔ lɛ hɔ Owi bɔlɔ zu li Gale do wala kɔ̃ zu li Kristo.

²⁵ Kɔ ngangga ni, ɔ nɛ kɛ lɛ kɔ̃a zu li Kristo ia ni, lɛ 'bànà 'bɔ ti ngawi 'da mbula gɔ.

²⁶ Nɛ vɛ́ kɛ nɛ kɔ̃a zu li Yezu Kristo ni, nɛ hɔa benɔ 'da Gale we duzu a.

²⁷ Gbãlã we, nɛ vɛ kɛ nɛ kpa batisimɔ ni, nɛ mba kpo do Kristo, nɛ ngangga ni, nɛ ba tɛlɛ tɛ Kristo ngboo.

²⁸ Na mɛ ni, fo 'bɔ gɔnɔ sanga tɛ ngba wi kɔ nɛ bina. Nɛ ɔ do be Yuda tabi gele wi, ngbá tabi wele le, wi wili tabi wuko, nɛ nde nɛ vɛ nɛ wia kɔ̃, nɛ nɛ hɔa wele kpo kɔ Kristo.

²⁹ Kɔ nɛ́ kɛ nɛ vɛ́ a winɔ 'da Kristo ni, nɛ a obe zã Abrahama. Nɛ nɛ kpa sɛ mɛnɔ vɛ kɛ Gale kpua zɛ́ mbulu nɛ hã Abrahama do obe zã a ni.