GALATI 2 - WE NU GALE 1995

Polo kpa ngba a do Owi nɛ tonɔ 'da Yezu

¹ 'Do sabɛlɛ 'bu ngɔ nɛ nalɛ, nɛ lɛ do Barnabasi, lɛ gili 'bɔ mbé tɛ lɛ dɛ Yeruzalɛmɛ, nɛ mi kpa 'bɔ Tito nɛa do a.

² Mi gili zi tɛ mi i mɔ, we kɛ Gale bia zi hã mi na mi nɛ. Kɔ mi hɔa i mɔ, nɛ lɛ mba li ngba lɛ tati nɛ do Owi zɔ mɔ tɛ eklezianɔ iko, nɛ mi bia gulu Dia Sakoe kɛ mi be hã winɔ kɛ wa a Oyuda gɔ ni hã wa. Mba gɔ, mi dɛ zi kili na, da dɛ kɔ dɛa toe kɛ mi tɛ dɛ ma ni, tabi kɛ mi dɛa zi ia ni, ma ɔ́ yala iko gɔ.

³ Lɛ hɔa i mɔ, nɛ wa ngbɔ̀kɔ̀ Tito, ngba mi wi yali kɛ a a Grɛkɛ ni na, a nɛ gaza gɔ.

⁴ Ĩ na, ombe wi Kristo bɛlɛnɔ wa kɔ̃a zi na, lo gɔnɔ a. Winɔ ni wa lia sanga lɛ do usu nɛ, we zɔ tɛlɛ tɛ kɛ lɛ hɔa nza ti mbula 'da Yudanɔ, we kɛ lɛ mba kpo do Yezu Kristo ni. Wa fa zi na, lɛ le 'bɔ ti mbula mbé nɛ,

⁵ nɛ lɛ bɛ̃a. Mba gɔ, lɛ kɔ̃a zi we fɔmɔ gbãlã we Dia Sakoe we duzu nɛ.

⁶ Owanɔ kɛ winɔ wa zɔ wa nɛ́ ogã winɔ ni, tabi wa a ogã wi nde, ma zɔ̀ mi gɔ, we kɛ Gale sáká bula li wele gɔ. Ogã winɔ ni wa è mbula ngɔ mi gɔ.

⁷ Wa zɔa na, Gale hã to be Dia Sakoe hã ogele winɔ hã mi, ɔ nɛ kɛ a hã to be Dia Sakoe hã Oyudanɔ hã Petro ni.

⁸ Mba gɔ, Gale kɛ a saka zi Petro do wi nɛ toe 'da a, nɛ a tumba a hã Oyudanɔ ni, a saka 'bɔ mi, nɛ a tumba mi hã ogele winɔ.

⁹ Nɛ Zake, Petro do Yoanɛ kɛ owinɔ wa zɔ wa ɔ nɛ Owi zɔ mɔ tɛ wa ni, wa ĩ na, Gale a hã toe gɛ hã mi. Ma kɛ wa tua zi nu kɔ̃ lɛ do Barnabasi we be hã winɔ na, lɛ mba do wa kɔ dɛa toe kpo. Nɛ lɛ zila ngba lɛ do wa na, lɛ do Barnabasi, lɛ nɛ we be we hã ogele winɔ, nɛ wa, wa be we hã Oyudanɔ.

¹⁰ Nɛ wa aka lɛ na, lɛ gala Owi sãnɔ kɔ eklezianɔ tɛ Yeruzalɛmɛ ni. Nɛ mi ia sila mi we dɛ ma ngboo.

Polo kɔ'dɔ Petro tɛ Antiɔsɛ

¹¹ 'Da fala kɛ Petro hɔa tɛ Antiɔsɛ, nɛ mi bɛ̃a zi we 'da a dɛ li winɔ vɛ́, we kɛ a yɔ zi wena.

¹² Mba gɔ, dati kɛ na Yakɔbɔ tombo zi winɔ 'da a tɛ Antiɔsɛ i ni, nɛ nde Petro nyɔngɔ zi mɔ do owinɔ kɛ wa a Oyuda gɔ ni nyɔnga. Kɔ owinɔ 'da Yakɔbɔ wa nɛa we hɔ nɛ, nɛ Petro fo 'bɔ tɛ ɛ sanga ogele winɔ do'do. We kɛ a dɛ zi kili Oyudanɔ kɛ wa kɔ̃a zi na, ogele winɔ wa nɛ tɛ mɛ 'bɔ gaza ni.

¹³ Nɛ ombe gele Yudanɔ tɛ Antiɔsɛ ni, wa ndua zi 'bɔ ɔlɔ tɛ wa kpasaa ɔ nɛ kɛ 'da Petro ni, nɛ ma ɔlɔ sila Barnabasi, nɛ a dɛ 'bɔ na mɛ ni.

¹⁴ Kɔ mi nɛa we zɔ na, wa nɛ̀ 'do gbãlã we Dia Sakoe gɔ ni, nɛ mi tɔ̃a hã Petro dɛ li winɔ vɛ na: “Mɔ a Yuda, nɛ nde mɔ dɛ mɔ tɛ mɔ ɔ nɛ gele wi ni, nɛ mɔ la fala dɛ mɔ nɛ́ be Yuda do'do. Kɔ gulu kɛ mɔ hɛ̃lɛ̃ ogele winɔ na, wa dɛ mbula 'da Oyudanɔ we ge nde?”

Wele kpasa we kɔ̃a we

¹⁵ Kɛ 'da lɛ, lɛ a obe Yuda ngboo, lɛ a ogele winɔ, kɛ lɛ zɔ wa na, wa a owi dɛ 'dã mɛnɔ ni gɔ.

¹⁶ Gɛnɛ kɔ na mɛ ni, nɛ nde lɛ ĩ na, wele hɔ wi bɔlɔ zu li Gale we kɛ a dɛ mbula 'da Oyudanɔ ni gɔ, nɛ nde a hɔ wi bɔlɔ zu, we kɛ a kɔ̃a zu li Yezu Kristo. Lɛ tɛ mɛ 'bɔ lɛ kɔ̃a zu li Yezu Kristo, takɔ lɛ hɔ wi bɔlɔ zu li Gale, we duzu kɔ̃a we ni, nɛ nde ma we duzu kɛ lɛ dɛ mbula 'da Oyudanɔ ni gɔ. Mba gɔ, wele kpo hɔ̀ wi bɔlɔ zu li Gale we duzu kɛ a dɛ mbula 'da Oyudanɔ ni gɔ.

¹⁷ Kɔ fala kɛ lɛ fa we hɔ wi bɔlɔ zu li Gale do wala 'da Kristo, nɛ nde ma be na, lɛ a Owi dɛ 'dã mɔ ɔ nɛ ogele winɔ ni. Ní a Kristo tumba wá lɛ we dɛ 'dã mɔ nde? Fala kpo gɔ.

¹⁸ Mi la zi fala dɛ mbula 'da Oyudanɔ we hɔ wi bɔlɔ zu li Gale ia, kɔ fala kɛ mi kpolo 'bɔ tɛ mi ngɔ mbula ni, nɛ nde mi dɛa 'dã mɔ.

¹⁹ Mba gɔ, kɛ 'da mi, dati mɛnɔ ma zɔa mbula ni, mi ɔ nɛ mi fi fia ni. Nɛ kpo mbula ni a gbɛa mi, takɔ mi ɔ do mbé kpasi we dɛ toe 'da Gale. Ma ɔ nɛ kɛ mi fia ngɔ finda te do Kristo fala nɛ kpo ni.

²⁰ Wi do kpasi, wi a mi gɔ, nɛ nde Kristo a kpasa kɔ mi. Kpasi kɛ mi do ma ngangga gɛ, mi do ma we kɔ̃a we kɛ mi kɔ̃a do zu li Be 'da Gale, kɛ a kɔ̃a zi gɛnɛ mi wena, nɛ a fia we mi ni.

²¹ Mi kɔ̃̀ na, olo dia zã 'da Gale dɛ 'da mi ɔ iko gɔ. Mba gɔ, fala kɛ wele fa we hɔ wi bɔlɔ zu li Gale do wala dɛ mbula, nɛ nde ki ni ma be na, gulu fie 'da Kristo bina.