GALATI 1 - WE NU GALE 1995

¹ Wi a mi Polo, wi nɛ toe 'da Yezu Kristo. Mi a wi nɛ to mɔ́ wele gɔ, nɛ wele a tòmbò mi na, mi hɔ wi nɛ to gɔ. Nɛ nde wi a Yezu Kristo ngboo, do Baa lɛ Gale, kɛ a tunu zi Yezu kɔ fio ni, wa a wa tumba mi.

² Mi do onya mi wi Kristonɔ i nga vɛ́, lɛ hã balɛ hã nɛ Owi Kristonɔ ngɔ nù Galati.

³ E kɔ Baa lɛ Gale, do Nwa 'da lɛ Yezu Kristo wa be dia zã 'da wa hã nɛ, nɛ wa dɛ 'bɔ na, nɛ dungu do gɛa sila.

⁴ Kristo fia zi we 'dã mɛnɔ 'da lɛ, takɔ a fo lɛ ti ngawi 'da 'dã mɛnɔ ngɔ nù gɛ. A dɛa ni do kɔ̃a zã 'da Baa lɛ Gale.

⁵ E kɔ lɛ dɔnggɔ Gale kɔ sabɛlɛ do sabɛlɛ! Amɛ.

Dia Sakoe kpo iko

⁶ Mi ɔngbɔ wena, tɛ kɛ nɛ siki 'do nɛ dɔ̃, nɛ nɛ lua do Gale, kɛ a sa mɔ hã nɛ do dia zã 'da Kristo, nɛ nɛ yu 'dɔkɔlɔ mbé gele Dia Sako ni.

⁷ Fo mbé gele Dia Sako bina. Nɛ nde mbe winɔ wa vĩ zu nɛ, nɛ wa fa we 'danga Dia Sakoe 'da Kristo.

⁸ Kɔ fala kɛ ma ɔ do lɛ, tabi anzɛ kɛ a yula li nza i, kɔ a be Dia Sako kɛ ma si tɛ́ ɛ do kɛ lɛ bia zi hã nɛ ni nde, nɛ Gale fɔ́mbɔ́ a.

⁹ Lɛ tɔ̃a zi hã nɛ dati ia, nɛ sɔɛ gɛ mi tɔ̃ 'bɔ mbé nɛ na, wi kɛ a be Dia Sakoe kɛ ma si tɛ ɛ do kɛ nɛ kɔ̃a zi ia ni, nɛ Gale fɔ́mbɔ́ a!

¹⁰ Nɛ lengge na, mi kɔma mbɛti gɛ hã nɛ ní, takɔ mi de li winɔ nde? Gɔ! Mi fa we de li Gale. Mi fa na, Owele wa dɔnggɔ mi nde? Ɔ do kɛ mi fa sɔ na Owele wa dɔnggɔ mi, nɛ nde mi sɔ 'bɔ a wi dɛ toe 'da Kristo gɔ.

Polo tɔ̃a gulu toe 'da a

¹¹ Onyae, mi kɔ̃a na nɛ ĩ́ do dia nɛ na, Dia Sakoe kɛ mi bia hã nɛ ni, ma yòlò kɔ Owele gɔ.

¹² Mi kpà zi ma kɔ̃ wele gɔ, nɛ wele bè zi 'bɔ ma hã mi gɔ. Nɛ nde wi bia ma hã mi, wi a Yezu Kristo.

¹³ Nɛ zila zi sako dɛa mɔ tɛ mi, 'da fala kɛ mi 'bana zi tɛ dɛ mbula 'da Oyudanɔ ni. Mi zɛlɛ zi tɛ Eklezia 'da Gale wena, nɛ mi fa zi do walanɔ vɛ na, mi gbɛ ma.

¹⁴ Mi zila zi mbula 'da Oyudanɔ, nɛ mi hã tɛ mi we mbula 'da oyaa lɛ nɛa ngɔ ongba mi kɛ lɛ gã do wa ni vɛ.

¹⁵ Nɛ nde Gale bia zi dia zã 'da a hã mi, nɛ a saka mi dati kɛ na wa tɛ kò mi gɔ ni, nɛ a ia mi we dɛ to hã a.

¹⁶ A bia zi Be 'da a hã mi, takɔ mi be Dia Sakoe 'da a hã owinɔ kɛ wa a Oyuda gɔ ni. Nɛ 'do nɛ, mi àkà 'bɔ wele na, a be wala hã mi gɔ.

¹⁷ Nɛ mi nɛ̀ zi 'bɔ Yeruzalɛmɛ we zɔ Owi nɛ tonɔ 'da Kristo, kɛ wa zi dati hã mi ni gɔ. Nɛ nde mi nɛa ngɔ nù Arabi, nɛ 'do nɛ, nɛ mi kpolo tɛ mi dɛ Damasi.

¹⁸ Nɛ olo nɛ la sabɛlɛ talɛ, sɛ a mi nɛ Yeruzalɛmɛ i, kɔ lɛ ĩ ti ngba lɛ do Petro de. Nɛ mi ɔa 'da a pɔsɔ bɔa.

¹⁹ Nɛ nde mi kpà zi ngba mi do gele wi nɛ toe 'da Kristo gɔ, tati a Zake, nya Nwa Yezu iko.

²⁰ We mi kɔmɔ hã nɛ gɛ, mɛ a ngbongbo we. Gale ĩ na, mi 'bílí bɛlɛ gɔ.

²¹ 'Do ki ni, nɛ mi nɛa ngɔ nù Siri do Silisi.

²² Nɛ oeklezianɔ 'da Kristo ngɔ nù Yude vɛ̃, wa ĩ̀ zi ti mi gɔ.

²³ Wa zele zi sako 'da mi zila iko na, wi kɛ a zɛlɛ zi tɛ lo ni, a siki tɛ̃ a, kɔ a tɛ be Dia Sakoe 'da Kristo kɛ a kɔ̃a zi we 'danga ma ni hã winɔ.

²⁴ Kɔ wa zila ni, nɛ wa dɔngga Gale we duzu mi.