FILEMƆ 1 - WE NU GALE 1995

¹ Wi a mi Polo, wi bɔlɔkɔ we duzu Yezu Kristo, lɛ do nya lɛ Timote, lɛ kɔmɔ mbɛti gɛ hã mɔ Filemɔ, kɛ mɔ a yali ngba lɛ, nɛ mɔ 'bɔ a ngba lɛ wi dɛa toe 'da Kristo ni.

² Lɛ kɔmɔ 'bɔ ma hã boko nya lɛ Apia, wa do Arkipɛ, kɛ a mba do lɛ we bi ngɔ Dia Sakoe ni, do owi kɔ̃a wenɔ kɛ wa mba li ngba wa kɔ tɔa 'da mɔ ni.

³ E kɔ Baa lɛ Gale do Nwa Yezu Kristo, wa be dia zã 'da wa hã nɛ, nɛ wa dɛ na, nɛ dungu do gɛ̃a sila.

Kɔ̃a zã do kɔ̃a we 'da Filemɔ

⁴ 'Da fala kɛ mi ma ngɔ sambala nɛ, nɛ mi lengge do mɔ, nɛ mi hã iɔ̃nae hã Gale we duzu mɔ fai.

⁵ Mba gɔ, mi zila sako kɔ̃a zã 'da mɔ dɛ 'da owinɔ 'da Gale, do kɔ̃a we 'da mɔ dɛ 'da Nwa Yezu.

⁶ Kɔ mi aka Gale na, kɔ̃a we 'da lɛ do mɔ ma dɛ na, lɛ ĩ ti 'du gulu de dɛa mɛnɔ vɛ̃ kɛ lɛ wia we dɛ ma we duzu Kristo ni.

⁷ Aa nyae, kɔ̃a zã kɛ mɔ kɔ̃a do gɛnɛ owinɔ 'da Gale, nɛ mɔ nganda do sila wa ni, ma hã yangga hã mi, nɛ ma gɛ̃ 'bɔ sila mi wena.

Polo aka Filemɔ we Onezimɛ

⁸ Gɛnɛ kɔ Kristo hã wala hã mi we ba nu mi hã mɔ ngɔ mɛ kɛ mɔ wia tɛ dɛ nɛ ni,

⁹ nɛ nde mi kɔ̃a we aka mɔ do dia sila iko, we duzu kɔ̃a ngba wi 'da lɛ do mɔ. Wi aka mɔ, i a mi Polo, kɛ mi a kpasa wi, nɛ di ngangga ni, mi a wi bɔlɔkɔ we duzu Yezu Kristo ni.

¹⁰ Kɔ mi aka mɔ we Onezimɛ, kɛ a hɔa be 'da mi tɛ kɔ bɔlɔkɔ gɛ.

¹¹ Zi dati, a dɛ́ zi to hã mɔ ngboo gɔ, nɛ nde ngangga ni, a wia tɛ gala mɔ ɔ nɛ kɛ a gala do mi ni.

¹² A ngɔ sila mi ngboo. Kɔ ngangga ni, mi gese a hã mɔ.

¹³ Mi kɔ̃a sɔ na, a 'bana do mi kɔ tɔa bɔlɔkɛ kɛ mi lia we duzu Dia Sakoe gɛ, takɔ a gala mi olo li mɔ.

¹⁴ Nɛ nde mi kɔ we dɛ ni do kɔ sila mi iko gɔ, kɔ mi aka mɔ dati sɛ nɛ de. Mi kɔ we hɛ̃lɛ̃ mɔ we dɛ de mɔ hã mi hɛ̃lã gɔ, nɛ nde mi kɔ̃a na, mɔ dɛ ma do kɔ sila mɔ iko.

¹⁵ Mbe gɔ, nɛ nde Onezimɛ gɔnɔ zi sanga tɛ ngba a do mɔ we bi kɔ̃ tũ sĩ iko, takɔ 'do nɛ, nɛ a si dɛ 'da mɔ i fai.

¹⁶ Kɔ ngangga ni, mɔ tɛ zɔ̀ 'bɔ a nɛ ngbá gɔ, we kɛ a nɛa ngɔ ngbá wena, a hɔa nya lɛ ngɔ sila lɛ. Mi kɔ̃ gɛnɛ a wena, nɛ mɔ kɔ̃ sɛ 'bɔ gɛnɛ a nɛ ngɔ kɛ 'da mi. Mba gɔ, a 'bɔ a ngbá 'da mɔ iko gɔ, nɛ nde a a nya mɔ ngboo kɔ Kristo.

¹⁷ Kɔ fala kɛ mɔ zɔ mi nɛ́ nya mɔ wi kɔ̃a we, nɛ mɔ kɔ̃́ gɛnɛ Onezimɛ kɔ tɔa 'da mɔ, ɔ nɛ kɛ mɔ kɔ̃ sɔ do gɛnɛ mi ni.

¹⁸ Kɔ tabi a dɛ zi 'dã mɔ dɛ 'da mɔ, tabi a do ku'da mɔ mɔ zu a nde, nɛ mɔ é sɛ ma dɛ zu mi.

¹⁹ Wi a mi Polo, mi kɔmɔ we gɛ do kɔ̃ mi wele nɛ na: Mi a mi gese sɛ olo ku'da 'da a hã mɔ. Ma wè do kɛ mi tɔ̃ we ku'da 'da mi zu mɔ ni gɔ. Ĩ na, ku'da 'da mi zu mɔ ni, mɛ a kpasi 'da mɔ ngboo.

²⁰ Kɔ nyae, mi aka mɔ do zu li Nwa na, mɔ gala mi kɔ we gɛ, nɛ mɔ gɛ̃ sila mi, ɔ nɛ kɛ onya wi kɔ Kristo wa dɛ ni.

²¹ Mi kɔmɔ mbɛti gɛ hã mɔ, we kɛ mi ĩ ti dia sila 'da mɔ, nɛ mi ĩ na, mɔ dɛ sɛ mɛ kɛ mi aka mɔ we nɛ ni. Nɛ mɔ dɛ sɛ nɛ ngɔ kɛ mi aka ni.

²² Mi kɔ̃a 'bɔ na, mɔ 'dáfá fala ɔi hã mi, we kɛ mi e sila mi ngɔ Gale na, a zele sɛ sambala 'da nɛ, nɛ a gese mi hã nɛ.

Ndɔti Iɛnggɛnɔ

²³ Epafrasi, kɛ a do mi kɔ bɔlɔkɛ gɛ we duzu Yezu Kristo ni, a tumba balɛ hã mɔ.

²⁴ Nɛ Marko, do Aristarkɛ, Demasi, do Luka, kɛ wa a ongba mi wi dɛa toe ni, wa fana 'bɔ mɔ.

²⁵ E kɔ dia zã 'da Nwa 'da lɛ Yezu Kristo, ma 'bana do nɛ.