Ɛsdrasi 9 - WE NU GALE 1995

Gba gili Oyudanɔ wa kala owuko gele nunɔ

¹ Wa dɛa mɛnɔ ni vɛ̃ do'do, nɛ okpasa wi nu fɛlɛ kulanɔ wa tɛa, nɛ wa tɔ̃ hã mi na: “Mɔ zɔ́, ombe nganganɔ, do olevitɛnɔ, do tala onya lɛ Oyudanɔ, wa dɛ̃ mɔ tɛ wa la ngbɛ ɛ do ogele winɔ ngɔ nùi ni gɔ. Wa dɛa 'bɔ kpo kpo gã 'dã mɛ olo Okanana, do Ohiti, do Opɛrizi, do Oyebuzi, do Oamoni, do Omoabɛ, do Oezipeto, do Oamori.

² Wa kala owuko gele nunɔ, nɛ wa kala 'bɔ ombe wukonɔ ni hã obulu benɔ 'da wa. Nɛ mɛ wa dɛa ni, ma hã wala hã owinɔ 'da Gale na, wa mba li ngba wa do ogele winɔ ngɔ nùi ni. Ĩ na, okpasa wi nu fɛlɛ kulanɔ, do okumunɔ hã wa kpe dati, we dɛ 'bɔ kpo 'dã mɛ ni.”

³ Mi nɛa we zele wenɔ ni, nɛ ma 'danga hã zã mi wena. Nɛ mi ɛ̃a tulu tɛ mi, nɛ mi zu'du mili zu mi, do nzɛlɛ mi, nɛ mi dungu nù do 'bako vɛ̃.

⁴ Mi dungu ni gbaa, we hɔ tɛ sa kɛ wa dɔ do sa'de we dɔnggɔ do Gale do gɛ̃a wese ni. Nɛ mbe winɔ wa ma ngɔ mba li ngba wa dɛ kɛ zã mi. Wi a owanɔ kɛ wa dɛ kili 'bili we Gale 'bili hã obe Israɛlɛ, we duzu 'dã mɛ 'da Oyudanɔ kɛ wa yula kɔlɔ 'duli ni.

Ɛsdrasi sambala we owi yɔ mbulanɔ

⁵ Ma hɔa fala gbɛ sa'de we dɔnggɔ do Gale do gɛ̃a wese ni, nɛ mi kulu ngɔ kɔ 'bakoe 'da mi. Nɛ nde tulunɔ kɛ mi ɛ̃a sɔ ni, ma 'bana dɛ tɛ mi ni. Nɛ mi gu gba zugolo, nɛ mi kala kɔ̃ mi dɛ ngɔ dɛ 'da Gale 'da mi,

⁶ nɛ mi sambala a na: “Aa Gale 'da mi, mi do sape wena, nɛ mi dɛa kili ba li mi dɛ 'da mɔ ngɔ i, we kɛ 'dã mɛnɔ 'da lɛ ma dɔ wena, ma kiti dɛ ngɔ ngbɛ ɛ gbaa, we to li nza ngɔ i.

⁷ Ndo do fala 'da oyaa lɛ gbaa we hɔ sɔɛ gɛ, winɔ 'da lɛ wa dɛa gã 'dã mɔ. Nɛ we duzu 'dã mɛnɔ 'da lɛ, ma kɛ mɔ ba nu mɔ hã ogele nwanɔ na, wa bi lɛ, hã wa nɛ ngɔ lɛ do Onwanɔ, do onganganɔ 'da lɛ. Nɛ wa la do lɛ kɔlɔ 'duli, nɛ wa e mbula ngɔ lɛ, nɛ wa kala 'bɔ dia mɛnɔ 'da lɛ kɔ̃ lɛ do'do. Wa hã sape hã lɛ, nɛ wa 'bana hã 'bɔ sape hã lɛ ní tia do sɔɛ gɛ.

⁸ Kɔ di dɔ̃ ni, NWA Gale 'da lɛ, mɔ bia dia zã 'da mɔ hã lɛ we bi 'da fala sĩ. Nɛ mɔ 'dafa na, ombe kɔ winɔ 'da lɛ kɛ wa 'bana ni, wa yolo kɔlɔ 'duli, hã wa si we dungu ngɔ nùi 'da mɔ. Na mɛ ni, mɔ dɛa na, lɛ kpa mbé dungu, nɛ mɔ hã be yangga hã lɛ olo ngamɛ lɛ zɔa zi kɔ ngbá kɛ lɛ dungu ni.

⁹ Mɛ a gbãlã we, Gale 'da lɛ, lɛ zi a ngbá, nɛ nde mɔ èlè lɛ gɔ. Mɔ ia dia zã kɔ sila ogã nwa Pɛrsɛ dɛ 'da lɛ, nɛ wa gala lɛ na, lɛ kpa mbé ngawi we dɛ mbé Tɛmpɛloe 'da mɔ dɛ ã olo kɛ ma 'danga zi ni. Nɛ wa gbaka 'bɔ lɛ we kpa dia fala we amba zu lɛ tɛ Yeruzalɛmɛ, do ngɔ nù Yuda.

¹⁰ “Aa Gale 'da lɛ, olo mɛnɔ vɛ̃ kɛ ma dɛa tɛ̃ ɛ ni, lɛ nɛ tɔ̃ 'bɔ na ge nde? Lɛ yɔa mbula,

¹¹ kɛ mɔ tumba do wala 'da owi dɛa tonɔ 'da mɔ kɛ wa gba olo nu mɔ ni. Mɔ mbisa zi lɛ na, nùi lɛ nɛ ba ma we kulu dɛ tɛ nɛ ni, ma do 'dã mɔ ngɔ nɛ wena, we duzu kɛ ogele winɔ kɛ wa ɔa di ni ni, wa zi a sa wi li mɔ Gale gɔ. 'Dã mɛnɔ 'da wa, kɛ ma la li ngele ni, ma kpa ngɔ nùi ni vɛ̃.

¹² Mɔ tɔ̃a 'bɔ na, lɛ tɛ bà wuko sanga tɛ ngba lɛ do ogele winɔ ni gɔ. Nɛ lɛ tɛ gàlà 'bɔ opaganɔnɔ ni na, wa kpa de mɔ, kɔ wa nɛ dɛ dati gɔ. Mɔ tɔ̃a na, lɛ dɛ mbula ni, nɛ lɛ sɛ a nu fɛlɛ kula kɛ ma do ngawi, nɛ lɛ nyɔngɔ sɛ dia mɛnɔ ngɔ nùi ni, nɛ lɛ la sɛ nùi ni hã obenɔ 'da lɛ do mɔ́ wa fai!

¹³ “Aa Gale 'da lɛ, lɛ ĩ na, lɛ kpa ngamɛnɔ gɛ vɛ̃ we duzu gã 'dã mɛnɔ lɛ dɛa ni. Gɛnɛ kɔ na mɛ ni, nɛ nde lɛ ĩ 'bɔ na, etumbui mɔ hã hã lɛ ni, ma ga we kɔ̃ do 'dã mɛ lɛ dɛa ni gɔ. Mɔ ĩ zi 'bako hã lɛ, ma kɛ lɛ kpasa, nɛ lɛ dungu nza gɛ.

¹⁴ Kɔ lɛ nɛ dɛ 'bɔ fala bɛ̃ mbula 'da mɔ nɛ nde? Nɛ lɛ nɛ ba 'bɔ wuko sanga tɛ ngba lɛ do ogele winɔ, kɛ wa dɛ 'dã mɛ la li ngele ni nɛ nde? Gɔ, lɛ dɛ́ sɛ 'bɔ ni gɔ, da dɛ kɔ zã mɔ nɔ̃́lɔ̃́ dɛ tɛ lɛ, kɔ mɔ kumu lɛ gɔ.

¹⁵ NWA Gale 'da lɛ obe Israɛlɛ, mɔ a wi bɔlɔ zu. Ma kɛ sɔɛ gɛ, lɛ fè gɔ, nɛ nde tala lɛ 'bana. Lɛ hɔa ti li mɔ do tole 'dã mɛnɔ 'da lɛ dɛ zu lɛ. Nɛ nde ma wè sɔ na, wele kpo yolo ti li mɔ gɔ.”