Ɛsdrasi 8 - WE NU GALE 1995

Owinɔ wa 'dafa tɛ wa we si dɛ Yeruzalɛmɛ

¹ Nɛ zélé li okpasa wi nu fɛlɛ kulanɔ kɛ mi Ɛsdrasi, lɛ zi do wa tɛ kɔlɔ 'duli tɛ Babilɔnɛ i, do 'da fala kɛ Artasɛrsɛsi zi a gã nwa, nɛ lɛ si do wa dɛ Yeruzalɛmɛ ni. Li owinɔ ni a:

² Gɛrsɔmɛ, nu fɛlɛ kula 'da Pinasi Daniɛlɛ, nu fɛlɛ kula 'da Itamarɛ Hatusɛ, nu fɛlɛ kula 'da Davidi

³ mbe kpo kɔ benɔ 'da Sɛkania Zakaria, nu fɛlɛ kula 'da Parɔsi, a zi do Owi wili 150.

⁴ Eliohenai, be 'da Zeraya, nu fɛlɛ kula 'da Pahatɛ-Moabɛ, a zi do owi wili 200.

⁵ Sɛkania, be 'da Yaziɛlɛ, nu fɛlɛ kula 'da Zatu, a zi do Owi wili 300.

⁶ Ebɛdɛ, be 'da Yonatanɛ, nu fɛlɛ kula 'da Adinɛ, a zi do Owi wili 50.

⁷ Yɛsaya, be 'da Atalia, nu fɛlɛ kula 'da Elamɛ, a zi do owi wili 70.

⁸ Zebadia, be 'da Mikaɛlɛ, nu fɛlɛ kula 'da Sɛfatia, a zi do owi wili 80.

⁹ Obadia, be 'da Yehiɛlɛ, nu fɛlɛ kula 'da Yoabɛ, a zi do Owi wili 218.

¹⁰ Sɛlɔmitɛ, be 'da Yɔsifia, nu fɛlɛ kula 'da Bani, a zi do owi wili 160.

¹¹ Zakaria, be 'da Bebai, nu fɛlɛ kula 'da Bebai, a zi do owi wili 28.

¹² Yohananɛ, be 'da Hakatanɛ, nu fɛlɛ kula 'da Azgadɛ, a zi do owi wili 110.

¹³ Elifelɛtɛ, Yeiɛlɛ do Sɛmaya, obe 'do kɔ nu fɛlɛ kula 'da Adonikamɛ, wa zi do owi wili 60.

¹⁴ Utai do Zakurɛ, nu fɛlɛ kula 'da Bigvai, wa zi do Owi wili 70.

Ɛsdrasi 'dafa we si dɛ Yeruzalɛmɛ

¹⁵ Mi ngbula li winɔ vɛ̃ dɛ nu lì kɛ ma fo do kɔ le Ahava ni, nɛ lɛ ɔa di ni tũ talɛ. Nɛ mi zɔa na, sanga owinɔ ni, onganga wa boe, nɛ nde fo levitɛ kpo bina.

¹⁶ Nɛ mi sa mɔ hã okpasa wi kusi, kɛ li wa a Eliezɛrɛ, Ariɛlɛ, Sɛmaya, Ɛlnatanɛ, Yaribɛ, Ɛlnatanɛ, do Natanɛ, Zakaria, do Mɛsulamɛ. Nɛ mi sa 'bɔ mɔ hã owi be mbula bɔa, Yoyaribɛ do Ɛlnatanɛ.

¹⁷ Nɛ mi ba nu mi hã wa na, wa nɛ 'da Ido, wi fɔmɔ le Kasifia, nɛ wa aka a, fala nɛ kpo do ongba a, kɛ wa dɛ to tɛ fala dɔnggɔ do Gale di ni ni na, wa tombo Owele hã lɛ we dɛ to kɔ Tɛmpɛloe 'da Gale 'da lɛ.

¹⁸ Wa nɛa, nɛ Gale 'da lɛ gala wa, nɛ wa kpula tɛ wa do Serebia, wele kɛ a ĩ ti mɔ wena ni, do onya a, do benɔ 'da a vɛ̃, Owele 'bu ngɔ wa ngbɛ'dɛ'dɛ. Serebia ni a wi nu fɛlɛ kula 'da Mali, obe zã Levi, be 'da Yakɔbɔ.

¹⁹ Nɛ wa tɛa 'bɔ do Hasabia, fala nɛ kpo do Yɛsaya, wi nu fɛlɛ kula 'da Mɛrari, do onya a, do obenɔ da wa vɛ̃, Owele 'bu wa bɔa.

²⁰ Wa tɛa zi 'bɔ fala nɛ kpo do Owele kama bɔa do 'bu wa bɔa. Wa saka owinɔ ni tati nɛ dɛ kɔ owanɔ wa gala Owi dɛ tonɔ fala dɔnggɔ do Gale ni. Owinɔ ni wa a obe zã winɔ kɛ nwa Davidi do ongba a, wa a zɛ́ wa we gala olevitɛnɔ ni, nɛ wa kɔma zi li wele do wele dɛ kɔ mbɛti.

Ɛsdrasi sambala Gale

²¹ Yolo do nu lì Ahava i, nɛ mi ba nu mi na, lɛ vɛ̃ lɛ bɛ̃́ nyɔngɔmɔ we dɔnggɔ Gale 'da lɛ, nɛ lɛ ba tɛ lɛ dɛ nù dati a. Lɛ dɛa ni, takɔ wila nu 'da a te ngɔ lɛ, do nu fɛlɛ kulanɔ, do omɛnɔ 'da lɛ, hã lɛ nɛ gɛnɛ do dia nɛ.

²² Mi kɔ̃̀ zi we aka gã nwa na, a hã ogili soda do owi kũ mbalatanɔ we bi ngɔ lɛ, 'da fala kɛ lɛ kpa sɛ ngba lɛ do owi sɛnɛ lɛ li wala i ni gɔ. Ɔ do kɛ mi aka sɔ a, nɛ mɛ sɔ a sape wena. We kɛ lɛ tɔ̃a zi hã gã nwa na, Gale a wele nu a tɛ winɔ vɛ̃ kɛ wa élé dɛ olo nu a gɔ ni, nɛ zã a nɔ̃lɔ̃ dɛ tɛ owanɔ kɛ wa siki 'do wa hã a ni, nɛ a hã etumbu hã wa.

²³ Ma kɛ lɛ bɛ̃a nyɔngɔmɛ we dɔnggɔ do Gale, nɛ lɛ aka a na, a fɔmɔ lɛ li wala. Nɛ Gale zila sambala 'da lɛ.

²⁴ Nɛ 'do nɛ, nɛ mi sa mɔ hã onwa nganga 'bu ngɔ wa bɔa, do Serebia, do Hasabia do ongba wa 'bu.

²⁵ Nɛ mi kala fɛ̃a mɔ bolo, do mɔ mbali, do okpana olo gã golenɔ, nɛ mi a ngɔ kilo dɛ gbali wa. Mɛnɔ ni mɛ a mɛnɔ kɛ gã nwa, do Owi tɔ̃ mbula hã a, do owi olo li a, do tala obe Yudanɔ ngɔ nùi ni, wa hã zi ma, we 'dafa do Tɛmpɛloe 'da Gale 'da lɛ ni. Nɛ mɛnɔ vɛ̃ kɛ mi a ngɔ kiloe ni, mi hã ma hã onganganɔ ni.

²⁶ Mɛnɔ mi hã zi hã wa ni a: fɛ̃a mɔ bolo tɔnɛ 'bu nɛ bɔa, odia mɔ kɛ wa dɛa do fɛ̃a mɔ bolo tɔnɛ talɛ, mɔ mbali tɔnɛ talɛ,

²⁷ kɔpɔ mɔ mbali 'bu nɛ bɔa, kɛ gole nɛ wia do mɔ mbali koto kpo, dia mbilika bɔa, kɛ wa dɛa do mɔ bolo kɛ ma ndi ndila, nɛ gole nɛ wia kɔ̃ do mbilika mɔ mbali ni.

²⁸ Nɛ mi tɔ̃a hã wa na: “Ɔ nɛ kɛ nɛ a Owele kɛ nɛ hã tɛ nɛ we toe 'da NWA Gale ni, mɛnɔ kɛ wa hã hã nɛ ni, ma 'bɔ we toe 'da a. Fɛ̃a mɔ bole do mɔ mbali vɛ̃ a mɛnɔ kɛ owinɔ wa hã zi do dia kɔ sila, we dɔnggɔ do NWA Gale 'da oyaa lɛ.

²⁹ Ma wia na, nɛ fɔmɔ fala kpamɛnɔ ni do dia nɛ gbaa na, nɛ hɔ nɛ Yeruzalɛmɛ i. Nɛ hɔ́ i mɔ, nɛ nɛ nɛ́ do nɛ tɛ kɔ 'bili tɔa 'do Tɛmpɛloe 'da nwa, kɛ wa usu do mɛnɔ ni, nɛ nɛ á 'bɔ ma ngɔ kilo dɛ gbali ogã nwa nganganɔ, do olevitɛnɔ, do okpasa wi nu fɛlɛ kulanɔ.”

³⁰ Ma kɛ onganganɔ do olevitɛnɔ, wa ba to zɔ mɔ tɛ mɛnɔ ni dɛ kɔ̃ wa. Mɛ zi a mɛnɔ vɛ̃ wa a ngɔ kilo ni: fɛ̃a mɔ bolo, do mɔ mbali, do okpana olo gã gole, we si nɛ dɛ kɔ Tɛmpɛloe 'da Gale 'da lɛ tɛ Yeruzalɛmɛ.

Owinɔ wa hɔa tɛ Yeruzalɛmɛ

³¹ Ma hɔa kɔ̃ zɛkɛ 'bu ngɔ nɛ bɔa, zɛkɛ 'da kpo, nɛ lɛ kulu ngɔ do wa nu lì Ahava we si dɛ Yeruzalɛmɛ. Nɛ wila nui 'da Gale 'da lɛ zi do lɛ tɛ li wala si 'da lɛ. A fɔmɔ lɛ ti kɔ̃ Owi sɛnɛ lɛ, do owi zũnɔ, kɛ wa usu kɛ zã wala ni.

³² Nɛ lɛ hɔa Yeruzalɛmɛ, nɛ lɛ kpia tɛ lɛ 'do tũ talɛ.

³³ Nɛ do nalɛ kɔ tũi, nɛ lɛ nɛ tɛ Tɛmpɛloe i. Nɛ lɛ a fɛ̃a mɔ bolo do mɔ mbali, do okpana olo gã gole ngɔ kilo, nɛ lɛ hã ma hã nganga Mɛremɔtɛ, be 'da Uria. Mɛremɔtɛ tɛa zi do Elazarɛ, be 'da Pinasi, do olevitɛnɔ gɛ: Yozabadɛ, be 'da Yesua, do Noadia, be 'da Binui.

³⁴ Lɛ tɔlɔ mɛnɔ ni vɛ̃, nɛ lɛ a ngɔ kilo, nɛ lɛ kɔma odĩ nɛ do ngɔ ogili nɛ vɛ̃ dɛ kɔ mbɛti.

³⁵ Nɛ Oyudanɔ vɛ̃ kɛ wa yula kɔlɔ 'duli, nɛ wa si ni, wa dɔa sa'de we dɔnggɔ do Gale 'da wa obe Israɛlɛ. Wa hã wili ngɔmbɔ 'bu ngɔ nɛ bɔa, nɛ wili bata 'bu nɛ kusi ngɔ nɛ gazɛlɛ, nɛ obe bata 'bu nɛ sambo ngɔ nɛ sambo, do dua 'bu ngɔ nɛ bɔa. Wa hã mɛnɔ ni hã Gale we obe Israɛlɛ vɛ̃, takɔ Gale fo ku'da 'dã mɔ zu wa. Wa dɔa sa'denɔ ni hã NWA Gale, nɛ wa ngutu vɛ̃.

³⁶ Nɛ 'do nɛ, nɛ wa kala mbɛtinɔ kɛ gã nwa Artasɛrsɛsi dɛa mbula 'da a ngɔ nɛ ni, nɛ wa nɛa nɛ hã owi olo li a, do owi fɔmɔ lenɔ kulu lì Efratɛ, kɛ si 'biti gɛ̃a wese ni. Kɔ owinɔ ni wa nɛa we tɔlɔ ma, nɛ wa gala obe Israɛlɛ we dɛ Tɛmpɛloe 'da Gale.